Ko e ngaahi me‘a kovi ko ia ‘oku hoko he taimí ni ‘i he fo‘i māmaní ‘oku fakahaa‘i ai ‘oku ofi ‘a e Palataisí. ‘Oku pehē ‘e he Tohitapú te tau sio ‘i ha ngaahi taimi fakalilifu ki mu‘a pē ‘i he hoko mai ‘a e Palataisí. ‘Oku tau mo‘ui ‘i he ngaahi taimi ko iá he taimí ni! Ko e ni‘ihi eni ‘o e ngaahi me‘a ‘oku pehē ‘e he Tohitapú ‘e hokó:

Ko e ngaahi tau lahi. “‘E tu‘u ha kakai ki ha kakai, mo ha pule‘anga ki ha pule‘anga.” (Mātiu 24:7) Kuo hoko mo‘oni ‘a e kikite ko ení. Talu mei he ta‘u 1914, mo e ‘i ai ‘a e ongo tau ‘e ua ‘a e māmaní pea mo e fanga ki‘i tau iiki ange lahi ‘aupito. Kuo mate ai ‘a e kakai ‘e laui miliona.

Mafolalahia ‘a e mahakí. ‘E ‘i ai “‘i he ngaahi potu kehekehe mo e ngaahi mahaki faka‘auha.” (Luke 21:11) Kuo hoko mo‘oni eni? ‘Io. Kuo tāmate‘i ‘e he kanisaá, mahaki mafú, tīpií, malēliá, ‘eitisí, mo e ngaahi mahaki kehe ‘a e kakai ‘e laui miliona.

Si‘i ‘a e me‘akaí. ‘I he māmaní kotoa ‘oku ‘i ai ‘a e kakai ‘oku ‘ikai ha‘anau me‘akai fe‘unga ke kai. ‘Oku mate ‘a e kakai ‘e laui miliona ‘i he fiekaiá he ta‘u kotoa pē. Ko e faka‘ilonga eni ‘e taha ‘o e vave ke ‘i heni ‘a e Palataisí. ‘Oku pehē ‘e he Tohitapú: “‘E ai ha ngaahi honge.”​—Maake 13:8.

 Ngaahi mofuike. “‘E ai ha ngahi . . . mofuike ‘i he ngahi potu kehekehe.” (Mātiu 24:7) Kuo toe hoko mo‘oni eni ‘i hotau taimí. Kuo mate ‘a e kakai laka hake ‘i he milioná ‘i he ngaahi mofuike talu mei he 1914.

Kakai anga-fulikivanu. Ko e kakaí te nau “‘ofa ki he pa‘anga” pea “‘ofa kiate kinautolu pe.” Te nau “‘ofa ki he malie ‘o ‘ikai ‘ofa ki he ‘Otua.” Ko e fānaú te nau “talangata‘a ki he matu‘a.” (2 Timote 3:1-5) ‘Ikai ‘okú ke loto-tatau ‘oku tokolahi ‘a e kakai hangē ko iá ‘i he ‘ahó ni? ‘Oku ‘ikai ha‘anau toka‘i ‘a e ‘Otuá, pea ‘oku nau fakahoha‘asi ‘a e fa‘ahinga ko ia ‘oku nau feinga ke ako ‘o fekau‘aki mo e ‘Otuá.

Faihia. ‘E toe hoko foki ha “ope ‘o e maumau lao.” (Mātiu 24:12) Ngalingali ‘okú ke loto-tatau ‘oku kovi ange ‘a e faihiá ‘i he tu‘unga ne ‘i ai he ngaahi ta‘u kuo maliu atú. Ko e kakai ‘i he feitu‘u kotoa pē ‘oku nau ‘i ha tu‘unga faka­tu‘u­tāmaki ‘i hono kaiha‘asia, kākaa‘i, pe fakalavea‘i.

Ko e kotoa ‘o e ngaahi me‘á ni ‘oku fakahaa‘i ai ‘oku ofi ‘a e Pule‘anga ‘o e ‘Otuá. ‘Oku pehē ‘e he Tohitapú: “Ka mou ka vakai kuo hoko ‘a e ngaahi me‘a ko ia, pea mou ‘ilo kuo ofi ‘a e Pule‘anga ‘o e ‘Otua.” (Luke 21:31) Ko e hā ‘a e Pule‘anga ‘o e ‘Otuá? Ko e founga-pule fakahēvani ia ‘a e ‘Otuá ‘a ia te ne ‘omai ‘a e Palataisí ki he fo‘i māmani ko ení. ‘E fetongi ‘e he Pule‘anga ‘o e ‘Otuá ‘a e ngaahi founga-pule fakaetangatá.​—Taniela 2:44.