‘E ‘ikai ke faka‘atā ‘e Sihova ‘a e kakai koví ke nau maumau‘i ‘a e Palataisí. Ko hono ngaahi kaume‘á pē te nau nofo aí. Ko e hā ‘e hoko ki he kakai koví? Ke ‘ilo‘i ‘a e talí, fakakaukau atu ki he talanoa mo‘oni ‘o fekau‘aki mo Noá. Na‘e mo‘ui ‘a Noa ‘i he ta‘u ‘e laui afe kuohilí. Ko ha tangata lelei ia ‘a ia na‘á ne feinga mālohi ma‘u pē ke ne fai ‘a e finangalo ‘o Sihová. Ka na‘e fai ‘e he kakai kehe ia ‘i he fo‘i māmaní ‘a e ngaahi me‘a kovi. Ko ia na‘e tala ai ‘e Sihova kia Noa te Ne ‘omai ha lōmaki ke ne faka‘auha ‘a e kotoa ‘o e kakai fuli­kivanu ko iá. Na‘á ne tala kia Noa ke ne langa ha ‘a‘ake koe‘uhi ke ‘oua te ne mate mo hono fāmilí ‘i he taimi ‘e hoko mai ai ‘a e Lōmakí.​—Senesi 6:9-18.

Na‘e langa ‘e Noa mo hono fāmilí ‘a e ‘a‘aké. Na‘e fakatokanga ‘a Noa ki he kakaí ‘e hoko mai ‘a e Lōmakí, ka na‘e ‘ikai te nau fanongo kiate ia. Na‘a nau hokohoko atu ‘a hono fai ‘o e ngaahi me‘a na‘e koví. Hili e ‘osi ‘a e ‘a‘aké, na‘e ‘ave ‘e Noa ‘a e fanga monumanu ki he ‘a‘aké, pea ko ia mo hono fāmilí na‘a nau toe hū mo kinautolu ki loto. Ne ‘omai leva ‘e Sihova ha fu‘u afā. Na‘e tō ‘a e ‘uhá ‘o fe‘unga mo e ‘aho ‘e 40 pea mo e pō ‘e 40. Na‘e fakafonu ‘e he vaí ‘a e kotoa ‘o e fo‘i māmaní.​—Senesi 7:7-12.

 Na‘e mole ‘a e mo‘ui ‘a e kakai fulikivanú, ka na‘e hao ‘a Noa mo hono fāmilí. Na‘e fakahaofi mai kinautolu ‘e Sihova ‘i he Lōmakí ki ha fo‘i māmani kuo fakama‘a mei he tu‘unga fulikivanú. (Senesi 7:22, 23) ‘Oku pehē ‘e he Tohitapú ‘e toe hoko mai ha taimi ‘a ia ‘e faka‘auha ai ‘e Sihova ‘a e fa‘ahinga ko ia ‘oku nau fakafisi ke fai ‘a e me‘a ‘oku totonú. ‘E ‘ikai ke faka‘auha ‘a e kakai leleí. Te nau mo‘ui ta‘engata ‘i he fo‘i māmani Palataisí.​—2 Pita 2:5, 6, 9.

‘Oku fai ‘e he kakai tokolahi ‘i he ‘ahó ni ‘a e ngaahi me‘a ‘oku kovi. ‘Oku fonu ‘a e māmaní ‘i he faingata‘á. ‘Oku toutou fekau‘i ‘e Sihova ‘a ‘ene Kau Fakamo‘oní ke nau fakatokanga ki he kakaí, neongo ia ‘oku ‘ikai ke loto ‘a e tokolahi tahá ke nau fanongo ki he ngaahi folofola ‘a Sihová. ‘Oku ‘ikai te nau loto ke liliu ‘enau ngaahi foungá. ‘Oku ‘ikai te nau loto ke tali ‘a e me‘a ‘oku folofola‘aki ‘e he ‘Otuá ‘o fekau‘aki mo e tonú pea mo e halá. Ko e hā ‘e hoko ki he kakaí ni? ‘E ‘i ai ha ‘aho te nau liliu ai? ‘E ‘ikai ‘aupito ke liliu ‘a e tokolahi. ‘Oku hoko mai ‘a e taimi ‘a ia ‘e faka‘auha ai ‘a e kakai fulikivanú pea ‘e ‘ikai ‘aupito te nau toe mo‘ui.​—Sāme 92:7.

‘E ‘ikai ke faka‘auha ‘a e fo‘i māmaní; ‘e ngaohi ia ko ha palataisi. Ko e fa‘ahinga ko ia ‘oku nau hoko ko e ngaahi kaume‘a ‘o e ‘Otuá te nau mo‘ui ta‘engata ‘i he Palataisi ‘i he fo‘i māmaní.​—Sāme 37:29.