‘Oku ‘ikai loto ‘a Sētane mo ‘ene kau tē­menioó ke ke tauhi ‘a e ‘Otuá. ‘Oku nau loto ke fakatafoki‘i ‘a e tokotaha kotoa mei he ‘Otuá ‘o kapau te nau malava. ‘Oku anga-fēfē ‘enau feinga ke fai ení? Ko e founga ‘e tahá ‘oku fakafou ia ‘i he lotu loí. (2 Kolinito 11:13-15) ‘Oku loi ha lotu kapau ‘oku ‘ikai te ne ako‘i ‘a e mo‘oni mei he Tohitapú. ‘Oku hangē ‘a e lotu loí ko e pa‘anga loí​—‘e hangē nai ko e me‘a mo‘oní, ka ‘oku ta‘e‘aonga ia. ‘E lava ke ne fakatupunga ha faingata‘a lahi kiate koe.

Ko e loi fakalotú ‘oku ‘ikai ‘aupito lava ke ne fakahōifua‘i ‘a Sihova, ko e ‘Otua ‘o e mo‘oní. ‘I he taimi na‘e ‘i māmani ai ‘a Sīsuú, na‘e ‘i ai ha kulupu fakalotu na‘a nau loto ke tāmate‘i ia. Na‘a nau fakakaukau ko ‘enau founga lotú ko e founga totonú ia. Na‘a nau pehē: “‘Oku taha pē ‘emau tamai, ko e ‘Otua.” Na‘e loto-tatau mo ia ‘a Sīsū? ‘Ikai! Na‘á ne pehē kiate kinautolu: “Ko e tamai kuo mou tupu mei ai ko e Tevolo.” (Sione 8:41, 44) ‘I he ‘ahó ni ‘oku tui ‘a e kakai tokolahi ‘oku nau lotu ki he ‘Otuá, ka ‘oku nau tauhi mo‘oni pē ‘enautolu ‘a Sētane mo ‘ene kau tēmenioó!​—1 Kolinito 10:20.

 Hangē pē ko e ‘omai ‘a e fua koví ‘e ha fu‘u ‘akau kovi, ‘oku ‘omai ‘e he lotu loí ‘a e kakai ‘oku nau fai ‘a e ngaahi me‘a ‘oku kovi. ‘Oku fonu ‘a e māmaní ‘i he faingata‘a koe‘uhi ko e ngaahi me‘a kovi ‘oku fai ‘e he kakaí. ‘Oku ‘i ai ‘a e ‘ulungaanga ta‘etaau, ko e tau, kaiha‘a, fakafe‘ātungia, fakapō, mo e tohotoho. Ko e tokolahi ‘oku nau fai ‘a e ngaahi me‘a kovi ko ení ‘oku ‘i ai ‘enau lotu, ka ‘oku ‘ikai ue‘i kinautolu ‘e he‘enau lotú ke nau fai ‘a e me‘a ‘oku leleí. ‘Oku ‘ikai lava ke nau hoko ko e ngaahi kaume‘a ‘o e ‘Otuá kae ‘oua kuo tuku ‘enau fai ‘a e ngaahi me‘a ‘oku koví.​—Mātiu 7:17, 18.

‘Oku ako‘i ‘e he lotu loí ‘a e kakaí ke nau lotu ki he ngaahi ‘aitolí. ‘Oku folofola mai ‘a e ‘Otuá ke ‘oua ‘e lotu ki he ngaahi ‘aitolí. ‘Oku ‘uhinga lelei eni. Te ke sai‘ia ‘o kapau ‘oku ‘ikai ‘aupito talanoa atu ha tokotaha ia kiate koe kae talanoa pē ia ki ho fakatātaá? ‘E lava ke hoko ‘a e tokotaha ko iá ko ho kaume‘a mo‘oni? ‘Ikai, ‘e ‘ikai malava. ‘Oku fiema‘u ‘e Sihova ‘a e kakaí ke nau talanoa ange kiate ia, ‘o ‘ikai ki ha maka fakamanatu pe ko ha fakatātā, ‘a ia ‘oku ‘ikai ha‘ane mo‘ui.​—Ekisoto 20:4, 5.

‘Oku ako‘i ‘e he lotu loí ‘oku sai pē ke tāmate‘i ‘a e ni‘ihi kehé ‘i he taimi ‘o e taú. Na‘e pehē ‘e Sīsū ko e ngaahi kaume‘a ‘o e ‘Otuá te nau fe‘ofa‘aki. ‘Oku ‘ikai ke tau tāmate‘i ‘a e kakai ‘oku tau ‘ofa aí. (Sione 13:35) ‘Oku a‘u ‘o hala ke tau tāmate‘i ‘a e kakai koví. ‘I he taimi na‘e ha‘u ai ‘a e ngaahi fili ‘o Sīsuú ke puke iá, na‘e ‘ikai te ne tuku ‘a ‘ene kau ākongá ke nau faitau ke malu‘i ia.​—Mātiu 26:51, 52.

‘Oku ako‘i ‘e he lotu loí ‘e mamahi ‘a e fulikivanú ‘i ha afi ‘o heli. Neongo ia, ‘oku ako‘i ‘e he Tohitapú ‘oku iku ‘a e angahalá ki he mate. (Loma 6:23) Ko Sihová ko ha ‘Otua ia ‘o e ‘ofa. ‘E fakamamahi‘i ‘e ha ‘Otua ‘ofa ‘a e kakaí ‘o ta‘engata? Ko e mo‘oni, ‘e ‘ikai! ‘I Palataisi, ‘e ‘i ai ‘a e lotu pē ‘e taha, ‘a e taha ko ia ‘oku hōifua ki ai ‘a Sihová. (Fakahā 15:4) Ko e lotu kotoa pē ‘oku makatu‘unga ‘i he ngaahi loi ‘a Sētané ‘e mole atu ia.