Ko e Māmani Palataisí
‘E fetongi faka‘aufuli ‘e Sihova ‘a e kovi kotoa kuo fai ‘e Sētané. Kuo ‘ai ‘e Sihova ‘a Sīsū ke Tu‘i ki he māmaní kotoa. ‘I he‘ene pulé, ‘e ‘ai ai ‘a e māmaní ke hoko ko ha palataisi.—Tāniela 7:13, 14; Luke 23:43.
‘Oku tala‘ofa mai ‘e Sihova ‘a e ngaahi me‘á ni:
-
MOHU ME‘ATOKONI: “Kuo foaki ‘e he kelekele hono fua: ‘e tapuaki‘i kitautolu ‘e Elohimi ko hotau ‘Otua.” “Ke mafola mai ‘a e koane ‘i he fonua, pea lea hange ko Lepanoni hono fua ‘i he funga mo‘unga.”—Sāme 67:6; 72:16.
-
‘IKAI KE TOE ‘I AI HA TAU: “Ha‘u ‘o mamata ki he ngaahi ngaue ‘a Sihova, hono kuo ne fai me‘a fakailifia ‘i he fonua! ‘Oku ne lolololo ‘a e ngaahi tau ‘o a‘u ki he ngata‘anga ‘o mamani.”—Sāme 46:8, 9.
-
‘IKAI HA KAKAI KOVI: “He ko e kau ta‘e fai totonu ‘e tu‘usi ia . . . ‘Io ‘oku toe si‘i pea mole ‘a ia ‘oku fai kovi; ‘io te ke hakule ‘a e potu na‘e ‘i ai, ka ‘oku ‘ikai.”—Sāme 37:9, 10.
-
‘IKAI HA MAHAKI, MAMAHI PE MATE: “‘E toki fakaava ‘a e mata ‘o e kui, pea to‘o ‘a e telinga ‘o e tuli. Toki hopo ‘a e heke hange ha tia, pea hiki mavava ‘a e ‘elelo ‘o e noa.”—‘Aisea 35:5, 6.
“Ko e ‘Otua ‘oku kau ma‘anautolu, ‘io, ko honau ‘Otua. Pea te ne holoholo ‘a e lo‘imata kotoa pē mei honau mata; pea ‘e ‘ikai toe ai ha mate, pea ‘e ‘ikai toe ai ha mamahi, pe ha tangi, pe ha ongosia; kuo mole ‘a e ngaahi me‘a mu‘a.”—Fakahā 21:3, 4.
‘Oku ‘ikai ‘aupito ke loi ‘a Sihova, ‘oku mātu‘aki kehe ia meia Sētane mo e kau tēmenioó. Kuo pau ke hoko ‘o mo‘oni ‘a e me‘a kotoa ‘okú ne tala‘ofa maí. (Luke 1:36, 37) ‘Oku ‘ofa mai ‘a Sihova kiate koe pea ‘okú ne loto ke ke nofo ‘i he Palataisi te ne ngaohí. Ko ia fetu‘utaki ki he Kau Fakamo‘oni ‘a Sihová ke ke ako lahi ange ‘o kau ki he ngaahi mo‘oni fakaofo ‘oku ma‘u ‘i he Folofola ‘a e ‘Otuá. Kapau te ke ngāue‘aki ‘a e mo‘oní ‘i ho‘o mo‘uí, ‘e fakatau‘atāina‘i ai koe mei he nofo pōpula ki he ngaahi loí mo e manavahē ta‘e‘uhingá mo e ta‘e‘iló. ‘E faifai atu pē pea te ke a‘u ‘o tau‘atāina mei he ha‘isia ki he angahalá mo e maté. Hangē ko ia na‘e lea‘aki ‘e Sīsuú: “Pea ‘e faifai pea mahino kiate kimoutolu ‘a e mo‘oni, pea ‘e fakatau‘atāina ‘a kimoutolu ‘e he mo‘oni.”—Sione 8:32.
Te Ke Fie Vakai Foki ki Heni
AKONAKI MAHU‘INGA
Ko e Hā ‘a e Pule‘anga ‘o e ‘Otuá?
‘I he ngāue fakafaifekau ‘a Sīsū ‘i he māmaní, na‘á ne faiako fekau‘aki mo e Pule‘anga ‘o e ‘Otuá ‘o lahi ange ia ‘i ha toe kaveinga. Kuo laui senituli ‘a e lotu ‘a hono kau muimuí ke hoko mai ‘a e Pule‘anga ko iá.
