Ko kitautolu kotoa kuo pau ke tau fai ha fili. Pe te tau tauhi ‘a Sihova pe te tau tauhi ‘a Sētane mo ‘ene kau tēmenioó. ‘Oku ‘ikai malava ke tau fai ‘a e ongo me‘á ni fakatou‘osi. Ko ha toki me‘a fakapotopoto ē ke tauhi ‘a Sihova!

Hangē ko ia kuo tau ‘ilo ki aí, ‘oku ma‘u ‘e he kau tēmenioó ‘a e fiefia ‘i hono fakamamahi‘i mo kākaa‘i ‘a e kakaí. ‘Oku ‘ikai ke pehē ‘a Sihova ia. ‘Okú ne ‘ofa ki he fa‘ahinga ‘o e tangatá ‘o hangē ko e ‘ofa ‘a ha tamai ki he‘ene fānaú. Ko e Tokotaha-Foaki ia ‘o e “foaki lelei kotoabe moe foaki haohaoa kotoabe.” (Sēmisi 1:17, PM) ‘Oku ‘ikai te ne ta‘ofi ha me‘a lelei mei he fa‘ahinga ‘o e tangatá, neongo ‘ene hoko ko e fakamole lahi kiate ia tonu.​—‘Efesō 2:4-7.

Fakakaukau atu ki he ngaahi me‘a na‘e fai ‘i he māmaní ‘e Sīsū, ko e ‘Alo ‘o e ‘Otuá. Na‘á ne ‘ai ke lea ‘a e kau noá pea ‘ai ke sio ‘a e kau kuí. Na‘á ne fakamo‘ui ‘a e kau kiliá mo e heké. Na‘á ne kapusi ‘a e kau tēmenioó pea fakamo‘ui ‘a e alangamahaki kotoa pē. ‘I he mafai ‘o e ‘Otuá, na‘e a‘u ‘o fokotu‘u ‘e Sīsū ‘a e kau maté ke nau toe mo‘ui.​—Mātiu 9:32-35; 15:30, 31; Luke 7:11-15.

‘I he ‘ikai ke tala mai ‘e he ‘Otuá ha ngaahi loi ke takihala‘i‘aki kitautolú, ‘oku tala mai ma‘u pē ‘e he ‘Otuá ‘a e mo‘oní. ‘Oku ‘ikai ‘aupito ke ne kākaa‘i ha taha.​—Nōmipa 23:19.

‘Oku hangē tofu pē ko hono puke ‘e he matamatakupenga ‘o e hiná ha lango, ko hono puke ma‘u ‘a e kakai ‘e laui miliona ‘e he manavahē ta‘e‘uhingá mo e loí. ‘Oku nau manavahē ki he kau maté. ‘Oku nau manavahē ki he kau tēmenioó. ‘Oku nau hoha‘a ‘o kau ki he ngaahi talatuki, ngaahi faka‘ilonga mo e ngaahi me‘a ke ‘omi monū. ‘Oku ha‘isia kinautolu ‘e he ngaahi tui mo e ngaahi talatukufakaholo ‘oku makatu‘unga ‘i he ngaahi loi ‘a Sētane ko e Tēvoló. ‘Oku ‘ikai ke ‘efihia ‘a e kau sevāniti ‘a e ‘Otuá ia ‘i he ngaahi me‘a peheé.

‘Oku mālohi mama‘o ange ‘a Sihova ‘ia Sētane. Kapau te ke tauhi ‘a Sihova, te ne malu‘i koe mei he kau tēmenioó. (Sēmisi 4:7) He ‘ikai ke hoko kiate koe ‘a e ngaahi talatuki‘í. Ko e fakatātaá, ‘i Naisīlia, na‘e talatuki‘i ‘e he kau faito‘o fakafa‘ahikehe mālohi ‘e toko tolu ‘e tāmate‘i ha taha ‘o e Kau Fakamo‘oni ‘a Sihová na‘á ne fakafisi ke mavahe mei he koló. ‘I he ‘ikai ke lavame‘a ‘a e talatuki‘i na‘e faí, na‘e hoko ‘o ilifia ha taha ‘o e kau faito‘o fakafa‘ahikehé ‘o ne ‘alu ki he tokotaha Fakamo‘oní ‘o kole ha meesi.

Kapau ‘oku fakahoha‘asi koe ‘e he kau tēmenioó, ‘oku malava ke ke ui ‘a e huafa ‘o Sihová pea te ne malu‘i koe. (Palōveepi 18:10) Ka ke ma‘u ‘a e malu‘i mei he ‘Otuá, kuo pau ke ke fakamavahe‘i koe mei he me‘a kotoa pē ‘oku fekau‘aki mo e fakaha‘ele fa‘ahikehé mo e lotu ki he kau tēmenioó. Na‘e fai pehē ‘a e kau lotu ki he ‘Otuá ‘i ‘Efesō ‘o e kuonga mu‘á. Na‘a nau tānaki mai ‘enau ngaahi tohi kotoa pē na‘e fekau‘aki mo e mēsikí pea nau tutu ia. (Ngāue 19:19, 20) Kuo pau ke fai ‘e he kau sevāniti ‘a e ‘Otuá ‘i he ‘ahó ni ‘a e me‘a tatau pē. Faka‘atā koe mei he ngaahi me‘a ‘oku kahoa pe ‘ai ki he sinó ko e ‘omi monū, ko e ngaahi vesa ‘oku tui ke malu‘i kita, ngaahi tohi ‘o fekau‘aki mo e mēsikí, pea mo ha fa‘ahinga me‘a kehe pē ‘oku fekau‘aki mo e ngaahi tō‘onga fakaha‘ele fa‘ahikehé.

Kapau ‘okú ke loto ke fakahōifua‘i ‘a e ‘Otuá, ‘oku ‘ikai ke fe‘unga pē ke li‘aki ‘a e lotu loí pea ta‘ofi ‘a hono fai ‘a e ngaahi me‘a ‘oku koví. Kuo pau ke ke kau longomo‘ui ki he lotu ma‘á. ‘Oku fakahā ‘e he Tohitapú ‘a e me‘a ‘oku fiema‘ú:

‘Oku ‘i ai ‘a e kakai ‘a Sētane mo ‘ene kau tēmenioó ‘i māmani ‘oku nau ako‘i pea fai ‘a e ngaahi me‘a ‘oku halá. Ka ‘oku toe ‘i ai ‘a e kakai ‘a Sihova. Ko e Kau Fakamo‘oni ‘a Sihova kinautolu. (‘Aisea 43:10) ‘Oku lahi hake ‘i he toko ono miliona ‘a e Kau Fakamo‘oní ‘i māmani lahi. Ko kinautolu hono kotoa ‘oku nau feinga mālohi ke fai ‘a e ngaahi me‘a ‘oku leleí pea ako‘i ‘a e mo‘oní ki he kakaí. ‘I he ngaahi fonua lahi, ‘oku malava ke ke fe‘iloaki mo kinautolu ‘i he Kingdom Hall, ‘a e feitu‘u te nau talitali māfana ai koe.

Ko ‘enau ngāué ke tokoni‘i ‘a e ni‘ihi kehé ke tauhi ‘a e ‘Otuá. Te nau ako ‘a e Tohitapú fakataha mo koe ‘i ho ‘apí, ‘o tokoni‘i koe ke ke ako ki he founga totonu ke lotu ai kia Sihová. ‘Oku ‘ikai fiema‘u ke ke fai ha totongi ki he me‘á ni. ‘Oku fiefia ‘a e Kau Fakamo‘oní ke ako‘i atu ‘a e mo‘oní he ‘oku nau ‘ofa ki he kakaí pea ‘oku nau ‘ofa kia Sihova ko e ‘Otuá.