Sioloto atu ki he talanoa ko ení: Kuo kaume‘a eni ‘a Heta mo Maikolo ‘i he māhina pē ‘e ua, ka ‘oku ongo‘i ‘e Heta hangē kuó ne ‘osi ‘ilo‘i ‘e ia ‘a Maikolo he laui ta‘u. ‘Okú na fe‘ave‘aki pōpoaki ma‘u pē mo talanoa lau houa ‘i he taimi ‘e ni‘ihi he telefoní, pea a‘u pē ‘o na femahino‘aki ‘i he anga ‘ena fakakaukaú! Ka ‘i he taimi ní ‘oku fiema‘u ‘e Maikolo ia ha me‘a lahi ange ‘i he fetalanoa‘akí pē.

Lolotonga ‘a e māhina ‘e ua kuohilí, na‘e ‘ikai ha me‘a ‘e toe fai ‘e Maikolo mo Heta ka ko e piki nima pē mo e ki‘i ‘uma. ‘Oku ‘ikai ke loto ‘a Heta ke fakalaka atu ai. Ka, ‘oku ‘ikai ke ne loto ke tukuange ‘a Maikolo. ‘Oku ‘ikai ha taha te ne ‘ai ia ke ne ongo‘i ‘okú ne ma‘a lahi mo makehe mo‘oni. ‘Okú ne pehē loto pē, ‘ko au mo Maikoló ‘okú ma fu‘u fe‘ofa‘aki . . .’

Kapau ‘okú ke ta‘umotu‘a fe‘unga ke faisō pea na‘á ke ‘i he tu‘unga ‘o Hetá, ko e hā te ke faí?

Kapau te ke feinga ke puna hangē ko e manupuná mei ha fu‘u ‘akau, te ke faingata‘a‘ia ‘i hono ngaahi nunu‘á. Ko e me‘a tatau pē ‘e hoko kapau te ke talangata‘a ki he lao fakae‘ulungāngá, hangē ko ia ‘oku fakahaa‘i mai ‘i he 1 Tesalonaika 4:3 ke “faka‘ehi‘ehi mei he fe‘auakí.”

Ko e hā ‘a e ngaahi nunu‘a ‘o e talangata‘a ki he fekau ko iá? ‘Oku pehē ‘e he Tohi Tapú: “Ko ia ‘okú ne tō‘onga‘aki ‘a e fe‘auakí ‘oku faiangahala ia ki hono sino pē ‘o‘oná.” (1 Kolinitō 6:18) ‘Oku anga-fēfē ‘ene mo‘oni iá?

 Kuo ‘ilo‘i ‘e he kau fakatotoló ko e to‘utupu tokolahi kuo nau fehokotaki fakasino ki mu‘a ke malí ‘oku nau fa‘a hokosia ha taha pe lahi ange ‘o e ngaahi nunu‘a ko ení.

• LOTO-MAFASIA. ‘Oku pehē ‘e he tokolahi taha ‘o e to‘utupu na‘a nau fehokotaki fakasino ki mu‘a ke malí, na‘a nau faka‘ise‘isa hili hono fai iá.

• MOLE FALALÁ. Hili ‘a e fehokotaki fakasino ‘a ha ongo me‘a, ‘oku kamata ke na fifili, ‘Ko hai ha toe taha na‘e fehokotaki fakasino mo ia?’

• ‘AMANAKI-TŌNOA. ‘Oku sai‘ia ‘a e tamaiki fefine tokolahi ‘i ha taha te ne malu‘i kinautolú, kae ‘ikai ko hono ngāue‘aki kinautolu. Pea ‘oku ‘ilo‘i ‘e he tamaiki tangata tokolahi ‘oku ‘ikai ke nau manako ‘i he tamaiki fefine ‘oku nau tōngofuá.

• Ko e me‘a mahu‘inga tahá: Kapau te ke fehokotaki fakasino ki mu‘a ke malí, ‘okú ke tuku hifo ai koe ‘aki hono fakamoleki ha me‘a mahu‘inga. (Loma 1:24) ‘Oku mātu‘aki mahu‘inga ‘aupito ho sinó ke ‘oua ‘e foaki tavale ia!

Fakahaa‘i ‘okú ke ma‘u ‘a e mālohi ke “faka‘ehi‘ehi mei he fe‘auakí.” (1 Tesalonaika 4:3) Kapau te ke mali ‘i ha ‘aho, ‘e lava leva ai ke ke fehokotaki fakasino. Pea ‘e malava ke ke fiefia kakato ai ‘o ‘ikai ha hoha‘a, faka‘ise‘isa mo ongo‘i ta‘emalu, ‘a ia ‘oku fa‘a hoko ia ko e konga ‘o e nunu‘a ‘o e fehokotaki fakasino ki mu‘a ke malí.—Palōveepi 7:22, 23; 1 Kolinitō 7:3.

• ‘E hanga ‘e ha taha ‘oku ‘ofa mo‘oni ‘iate koé ‘o ‘ai koe ke ke faingata‘a‘ia fakaesino mo fakaeongo?

• ‘E hanga ‘e ha taha ‘oku tokanga mo‘oni kiate koé ‘o fakatauele‘i koe ke maumau‘i ho vaha‘angatae mo e ‘Otuá?—Hepelū 13:4.