KAMATAʻI HA FETALANOAʻAKI
LĒSONI 4
Anga-Fakatōkilalo
Tefitoʻi Moʻoní: “ʻAki ʻa e anga-fakatōkilalo ʻo mou vakai ki he niʻihi kehé ʻoku nau māʻolunga ange ʻiate kimoutolu.”—Fil. 2:3.
Meʻa Naʻe Fai ʻe Paulá
1. Sio ʻi he VITIOÓ, pe lau ʻa e Ngāue 26:2, 3. Fakakaukau leva ki he ongo fehuʻi ko ení:
-
a. Naʻe anga-fēfē hono fakahaaʻi ʻe Paula ʻa e anga-fakatōkilaló ʻi he founga ʻene lea kia Tuʻi ʻAkilipá?
-
e. Naʻe anga-fēfē hono tohoakiʻi ʻe Paula ʻa e tokangá kia Sihova mo e Folofolá kae ʻikai kiate ia?—Sio ki he Ngāue 26:22.
Ko e Hā ʻOku Tau Ako meia Paulá?
2. ʻOku fakamānako ange ʻetau pōpoakí ʻi he taimi ʻoku tau lea ai ʻi he anga-fakatōkilalo mo e anga-fakaʻapaʻapa.
Faʻifaʻitaki kia Paula
3. ʻOua ʻe siolalo. Fakaʻehiʻehi mei hono ʻai ke pehē ʻokú ke ʻiloʻi ʻa e meʻa kotoa pea ko e tokotaha ʻe tahá ʻoku ʻikai ke ne ʻilo ha meʻa. Lea kiate ia ʻi he anga-fakaʻapaʻapa.
4. ʻAi ke mahino ko e Tohi Tapú ko e matavai ia ʻo e ngaahi moʻoni ʻokú ke vahevahé. Ko e Folofola ʻa e ʻOtuá ʻoku ʻi ai ʻa e ngaahi fakakaukau ʻoku maongo ki he loto ʻo e kakaí. ʻI he taimi ʻoku tau ngāueʻaki ai iá, ʻoku tau langa hake ai ʻenau tuí ʻi he makatuʻunga totonú.
5. Nofoʻaki anga-malū. ʻOua ʻe tuʻukāivi ke fakamoʻoniʻi ha foʻi poini. ʻOku ʻikai ke tau loto ke fakafekiki. Fakahāhā ʻa e anga-fakatōkilaló ʻaki ʻa e hanganaki nonga pea ʻiloʻi ʻa e taimi ke mavahe aí. (Pal. 17:14; Tai. 3:2) Ko ha tali malū te ne kei fakaava atu nai ʻa e matapā ki ha fetalanoaʻaki ola lelei ʻi he kahaʻú.
