‘Oku ‘i ai ha kakai loto-totonu ‘i he ngaahi lotu kotoa pē. Ko e ongoongo lelei ia ‘a e ‘afio mai ‘a e ‘Otuá ki he kakai ko iá pea tokanga mai fekau‘aki mo kinautolu. Ka ko e me‘a fakamamahí, kuo ngāue‘aki ‘a e lotú ki he ngaahi taumu‘a kovi. (2 Kolinitō 4:3, 4; 11:13-15) Fakatatau ki he ngaahi ongoongó, ‘oku a‘u ‘a e ngaahi lotu ia ‘e ni‘ihi ‘o kau ‘i he ngāue fakaetautoitoí, faka‘auha fakafa‘ahingá, taú, mo e ngaohikovi‘i ‘a e fānaú. He fakalotomamahi ē ko e me‘á ni ki he kau tui loto-totonu ki he ‘Otuá!​—Lau ‘a e Mātiu 24:3-5, 11, 12.

Lolotonga ‘oku fakalāngilangi‘i ‘e he lotu mo‘oní ‘a e ‘Otuá, ‘oku ta‘efakahōifua‘i ia ‘e he lotu loí. ‘Okú ne ako‘i ‘e ia ‘a e ngaahi fakakaukau ‘oku ‘ikai ke ‘i he Tohi Tapú, ‘o kau ai ‘a e ngaahi akonaki loi fekau‘aki mo e ‘Otuá pea fekau‘aki mo e kau maté. Ka ‘oku fiema‘u ‘e Sihova ia ‘a e kakaí ke nau ‘ilo‘i ‘a e mo‘oni ‘o kau kiate iá.​—Lau ‘a e ‘Isikeli 18:4; 1 Tīmote 2:3-5.

Ko e me‘a fakafiefiá, ‘oku ‘ikai ke kākaa‘i ‘a e ‘Otuá ‘e he ngaahi lotu ‘oku nau taukave‘i ‘oku nau ‘ofa ‘iate ia ka ‘oku nau ‘ofa mo‘oni kinautolu ‘i he māmani ‘a Sētané. (Sēmisi 4:4) ‘Oku lave ‘a e Folofola ‘a e ‘Otuá ki he lotu loi kotoa pē ko “Pāpilone ko e Lahi.” Ko Pāpiloné ko e fu‘u kolo ia ‘i he kuonga mu‘á na‘e kamata ai ‘a e lotu loí hili ‘a e Lōmaki ‘o e ‘aho ‘o Noá. Kuo vavé ni, ke ‘omai ‘e he ‘Otuá ha ngata‘anga fakafokifā ki he lotu ko ia ‘okú ne kākaa‘i mo lōmekina ‘a e fa‘ahinga ‘o e tangatá.​—Lau ‘a e Fakahā 17:1, 2, 5, 16, 17; 18:8.

‘Oku ‘i ai ‘a e ongoongo lelei lahi ange. Kuo ‘ikai ngalo ‘ia Sihova ‘a e kakai loto-totonu ko ia ‘oku nau movetevete holo ‘i he lotolotonga ‘o e ngaahi lotu loí ‘i māmani lahí. ‘Okú ne fakafā‘ūtaha‘i ‘a e kakai peheé ‘aki hono ako‘i kiate kinautolu ‘a e mo‘oní.​—Lau ‘a e Maika 4:2, 5.

‘Oku tokanga mai ‘a Sihova fekau‘aki mo e kakai ko ia ‘oku nau ‘ofa ‘i he me‘a ‘oku mo‘oní mo leleí. ‘Okú ne enginaki kiate kinautolu ke nau mavahe mei he lotu loí. Ko e kakai ‘oku nau ‘ofa ‘i he ‘Otuá ‘oku nau loto-lelei ke fai ha ngaahi liliu ke fakahōifua‘i ia.​—Lau ‘a e Fakahā 18:4.

‘I he ‘uluaki senitulí, ‘i he taimi na‘e fanongo ai ‘a e kakai loto-totonú ki he ongoongo leleí mei he kau ‘apositoló, na‘a nau tali ia mo e fiefia. Na‘a nau ako ai ha founga mo‘ui fo‘ou meia Sihova, ko ha founga mo‘ui fiefia ange fakataha mo ha taumu‘a pea mo ha ‘amanaki. Ko ha fa‘ifa‘itaki‘anga lelei kinautolu kiate kitautolu ‘i he ‘aho ní koe‘uhí na‘a nau fai ha tali ki he ongoongo leleí ‘aki hono ‘ai ‘a Sihova ke mu‘omu‘a ‘i he‘enau mo‘uí.​—Lau ‘a e 1 Tesalonaika 1:8, 9; 2:13.

‘Oku talitali lelei ‘e Sihova ki hono fāmili ‘o ‘ene kau lotú ‘a e fa‘ahinga ko ia ‘oku nau tafoki mei he lotu loí. Kapau ‘okú ke tali ‘a e fakaafe loto-māfana ‘a Sihová, te ke hoko ai ko hono kaume‘a, ko ha fāmili fo‘ou mo ‘ofa ‘o e ngaahi kaungālotu kia Sihová, mo e mo‘ui ta‘engata.​—Lau ‘a e Ma‘ake 10:29, 30; 2 Kolinitō 6:17, 18.

Ko e fakamaau ‘o e lotu loí ‘oku tu‘unuku maí ko ha ongoongo lelei ia. Te ne ‘omai ‘a e nonga ki māmani lahi mei he fakafe‘ātungiá. ‘E ‘ikai ‘aupito ke toe hanga ‘e ha lotu loi ‘o takihala‘i mo fakamavahevahe‘i ‘a e fa‘ahinga ‘o e tangatá. Ko e fa‘ahinga kotoa pē ‘e mo‘uí te nau fā‘ūtaha ‘i he lotu ki he ‘Otua mo‘oni pē tahá.​—Lau ‘a e Fakahā 18:20, 21; 21:3, 4.