KAU FAKANOFONOFO ʻOku vaheʻi ʻa e kau fakanofonofó ke nau tokoniʻi koe. Kātaki ʻo fengāueʻaki kakato mo kinautolu ʻaki ʻa e muimui ki heʻenau fakahinohino fekauʻaki mo e tauʻanga meʻalelé, ko hono mapuleʻi lelei ʻa e fuʻu kakaí, taʻofi nofoʻangá mo ha toe ngaahi meʻa kehe.

KOLOA MOLE Ko e koloa mole kotoa pē ʻoku totonu ke ʻave ia ki he Potungāue Koloa Molé. Kapau kuo mole haʻo meʻa, ʻalu ki he potungāue ko ʻení ʻo vakaiʻi hoʻo koloá. Ko e fānau kuo nau hē mei heʻenau ngaahi mātuʻá ʻo nau pulí ʻoku totonu ke ʻave ki he potungāue ko ʻení. Kae kehe, ke fakaʻehiʻehi mei he loto-mafasia ʻoku ʻikai fiemaʻu ki he faʻahinga kotoa ʻoku kau ki aí, kātaki ʻo tokangaʻi hoʻo fānaú pea ʻai ke nau nofo maʻu mo koe.

NOFOʻANGA Kātaki ʻo fakaʻatuʻi ʻa e niʻihi kehé. Manatuʻi, ʻoku lava ke taʻofi ha ngaahi nofoʻanga ki he faʻahinga pē ʻi he fāmilí, mo e faʻahinga ʻoku fononga mai mo koe ʻi he meʻalele tatau, nofo mo koe ʻi he ʻapi tatau, pe lolotonga ako Tohi Tapu mo koe. Kātaki ʻoua ʻe tuku ha ngaahi meʻa ʻi he ngaahi nofoʻanga ʻoku ʻikai te ke taʻofí.

NGAAHI TOKONI ʻI ha fuʻu fakamole lahi, kuo fai ai ha ngaahi fokotuʻutuʻu ke tokonaki ha nofoʻanga feʻunga, ko ha meʻa-fakaleʻolahi, naunau vitiō, pea mo e ngaahi sēvesi kehe, ʻa ia ʻoku nau ʻai ke fakafiefia ʻa hono maʻu ʻa e fakataha-lahí pea tokoniʻi kitautolu ke ʻunuʻunu ofi ange kia Sihova. Ko hoʻomou ngaahi tokoni loto-fiefoakí ʻoku tokoni ia ke totongiʻaki ʻa e ngaahi fakamole ko ʻení mo poupouʻiʻaki foki ʻa e ngāue ʻi māmani lahí. Ke faingamālie kiate kimoutolú, ʻoku ʻi ai ha ngaahi puha tokoni ʻoku fakaʻilongaʻi mahino ʻoku fokotuʻu takai ʻi he faiʻanga fakatahá. Kae kehe, kapau ʻe malava, kātaki ʻo fakahoko hoʻo tokoní ʻi he ʻinitanetí ʻaki hoʻo ʻalu ki he donate.pr418.com. ʻOku mātuʻaki fakahoungaʻi ʻa e ngaahi tokoni kotoa pē. ʻOku fie fakamālō atu ʻa e Kulupu Pulé ki hoʻomou poupou nima-homo ki he ngaahi meʻa ʻo e Puleʻangá.

NGĀUE POLE Kapau ʻokú ke fie pole ke tokoni ki he ngāue ʻo fekauʻaki mo e fokotuʻutuʻu ʻo e fakataha-lahí, kātaki ʻo fakahā ia ki he Potungāue Fakamatalá mo e Ngāue Polé.

PAPITAISO Ko e ngaahi nofoʻanga kuo taʻofi ki he kau teu papitaisó ʻe ʻi he nofoʻanga tefitó ia ʻi muʻa ʻi he siteisí tuku kehe ʻo ka toki fakahaaʻi atu. Ko e kau teu papitaisó ʻoku totonu ke nau nofo ai ki muʻa ke kamata ʻa e malanga papitaisó ʻi he pongipongi Tokonakí. ʻOku totonu ke ʻomai ʻe he tokotaha taki taha ha tauveli mo ha vala taau.

ʻULUAKI FUOFUA TOKONI Kātaki ʻo manatuʻi, ko e meʻa eni ia ki he ngaahi meʻa fakavavevavé pē.