KO E ngaahi me‘a lelei kotoa pē ‘oku tau ma‘u ‘oku mei he ‘Otuá. Na‘á ne ngaohi ‘a e la‘aá ke tau ma‘u ai ‘a e maama ‘i he ‘ahó, pea mo e māhiná mo e ngaahi fetu‘ú koe‘uhi ke tau ma‘u ai ha maama ‘i he po‘ulí. Pea na‘e ngaohi ‘e he ‘Otuá ‘a e māmaní ke tau nofo ai.

Ka ko e la‘aá, ko e māhiná, ko e ngaahi fetu‘ú mo e māmaní na‘e ‘ikai ko e ngaahi me‘a ia na‘e ‘uluaki ngaohi ‘e he ‘Otuá. ‘Okú ke ‘ilo‘i ‘a e me‘a na‘e ‘uluaki ngaohí? Na‘e ‘uluaki ngaohi ‘e he ‘Otuá ‘a e fa‘ahinga hangē ko iá. ‘Oku ‘ikai lava ke tau mamata ki he fa‘ahinga ko ‘ení ‘o hangē tofu pē ko e ‘ikai lava ke tau mamata ki he ‘Otuá. ‘I he Tohitapú ‘oku ui ai ‘a e fa‘ahinga ko ení ko e kau ‘āngelo. Na‘e ngaohi ‘e he ‘Otuá ‘a e kau ‘āngeló ke nau nofo fakataha mo ia ‘i hēvani.

Na‘e mātu‘aki makehe ‘a e ‘uluaki ‘āngelo na‘e ngaohi ‘e he ‘Otuá. Ko e ‘uluaki ‘Alo ia ‘o e ‘Otuá, pea na‘á ne ngāue fakataha mo ‘ene Tamaí. Na‘á ne tokoni ki he ‘Otuá ke ngaohi ‘a e ngaahi me‘a kehe kotoa pē. Na‘á ne tokoni ki he ‘Otuá ‘i hono ngaohi ‘a e la‘aá, māhiná, ngaahi fetu‘ú pea pehē ki hotau māmaní.

Na‘e fēfē ‘a e māmaní ‘i he taimi ko iá? ‘I he kamata‘angá na‘e ‘ikai lava ke mo‘ui ha taha ‘i he māmaní. Na‘e ‘ikai ha me‘a ka ko e tahi lahi pē na‘á ne ‘ufi‘ufi ‘a e fonuá kotoa. Ka na‘e loto ‘a e ‘Otuá ke mo‘ui ha kakai ‘i he māmaní. Ko ia na‘á ne kamata leva ke ne teuteu ‘a e ngaahi me‘a ma‘atautolu. Ko e hā ‘a e me‘a na‘á ne faí?

Na‘e ‘uluaki fiema‘u ‘a e maama ki he māmaní. Ko ia na‘e ‘ai ‘e he ‘Otuá ‘a e maama mei he la‘aá ke ulo ki he māmaní. Na‘á ne ‘ai ke malava fakatou‘osi ‘a e taimi po‘uli mo e taimi ‘aho. Hili iá, na‘e ‘ai leva ‘e he ‘Otuá ‘a e fonua ke ‘alu hake ‘o mā‘olunga ange ‘i he fukahi vai ‘o e tahí.

‘I he kamatá na‘e ‘ikai ha me‘a ‘i he funga fonuá. Na‘e hangē pē ‘ene ‘así ko e fakatātā ko ‘ení. Na‘e ‘ikai ke ‘i ai ha ngaahi matala‘i‘akau pe ha ngaahi ‘akau pe fanga manu. Na‘a mo e fanga ika ‘i he tahí na‘e ‘ikai ke ‘i ai. Na‘e kei toe ha ngāue lahi ke fai ‘e he ‘Otuá ke ‘ai ‘a e māmaní ko ha feitu‘u lelei mo‘oni ki he fanga manú mo e kakaí ke nau mo‘ui ai.