SIO ki he me‘a ‘oku hokó. ‘Oku tuku atu ki tu‘a ‘a ‘Ātama mo ‘Ivi mei he ngoue faka‘ofo‘ofa ko ‘Ītení. ‘Okú ke ‘ilo hono ‘uhingá?

Koe‘uhi he na‘á na fai ‘a e me‘a na‘e kovi ‘aupito. Ko ia ai, na‘e tautea ai kinaua ‘e Sihova. ‘Okú ke ‘ilo ‘a e me‘a na‘e kovi na‘e fai ‘e ‘Ātama mo ‘Iví?

Na‘á na fai ‘a e me‘a na‘e tala ‘e he ‘Otuá ke ‘oua te na fai. Na‘e fakahā ‘e he ‘Otuá kiate kinaua ‘e lava ke na kai mei he ngaahi ‘akau ‘o e ngoué. Ka na‘e pehē ‘e he ‘Otuá ke ‘oua te na kai mei he fu‘u ‘akau ‘e taha, na‘a na mate. Na‘e tuku ‘e he ‘Otuá ‘a e fu‘u ‘akau ko ‘ení ma‘ana pē. Pea ‘oku tau ‘ilo ‘oku kovi ke tau to‘o ha me‘a ‘a ha tokotaha kehe, ‘ikai ko ia? Sai, ko e hā ‘a e me‘a na‘e hokó?

‘I he nofo toko taha ‘a ‘Ivi ‘i he ngoué ‘i ha ‘aho ‘e taha, na‘e lea ha ngata kiate ia. Fakakaukau ange ki ai! Na‘á ne tala ange kia ‘Ivi ke ne kai ‘a e fua ‘o e ‘akau na‘e tala ‘e he ‘Otuá ke ‘oua te na kaí. Ka, ‘i he taimi na‘e ngaohi ai ‘e Sihova ‘a e fanga ngatá na‘e ‘ikai te ne ‘ai kinautolu ke nau lava ‘o lea. Ko ia ‘oku ‘uhinga ‘eni na‘e ‘i ai ha tokotaha kehe na‘á ne ‘ai ‘a e ngatá ke lava ‘o lea. Ko hai nai ia?

Na‘e ‘ikai ko ‘Ātama ia. Ko ia kuo pau pē ko e taha ‘o e fa‘ahinga na‘e ngaohi ‘e Sihova ki mu‘a fuoloa peá ne toki ngaohi ‘a e māmaní. Ko e fa‘ahinga ko iá ko e kau ‘āngelo, pea ‘oku ‘ikai lava ke tau mamata kiate kinautolu. Ko e ‘āngelo ko ‘ení ‘e taha na‘e hoko ‘o loto-mahikihiki ‘aupito. Na‘e kamata ke ne fakakaukau ‘oku totonu ke ne hoko ko ha pule ‘o hangē ko e ‘Otuá. Peá ne fiema‘u ‘a e kakaí ke talangofua ange ki ai kae ‘ikai kia Sihova. Ko ia ‘a e ‘āngelo na‘á ne ‘ai ‘a e ngatá ke leá.

Na‘e malava ‘a e ‘āngelo ko ‘ení ‘o kākaa‘i ‘a ‘Ivi. ‘I he‘ene tala kia ‘Ivi te ne hoko ‘o tatau mo e ‘Otuá ‘o kapau te ne kai ‘a e fua‘i‘akaú, na‘e tui ki ai ‘a ‘Ivi. Ko ia na‘á ne kai, pea pehē foki mo ‘Ātama. Na‘e talangata‘a ‘a ‘Ātama mo ‘Ivi ki he ‘Otuá, pea ko e ‘uhinga ia na‘e mole ai hona ‘api ko e ngoue faka‘ofo‘ofá.

Ka ‘e ‘i ai ‘a e ‘aho ‘e ‘ai ‘e he ‘Otuá ke hoko ‘a e māmaní kotoa ke faka‘ofo‘ofa ‘o hangē ko e ngoue ko ‘Ītení. Te tau toki ako ‘amui ange ki he anga ‘o ha‘o malava ke kau ki he ngāué ni. Ka ‘i he taimí ni, te tau vakai atu ki he me‘a na‘e hoko kia ‘Ātama mo ‘Iví.