Ko e toko valu pē na‘e hao mo‘ui atu ‘i he Lōmakí, ka ‘i he ‘alu pē ‘a e taimí na‘a nau tupu ‘o laui afe. Pea hili ‘a e ta‘u ‘e 352 mei he Lōmakí, na‘e fā‘ele‘i ‘a ‘Ēpalahame. ‘Oku tau ako heni ki hono tauhi pau ‘e he ‘Otuá ‘ene tala‘ofá ‘i he‘ene ‘oange ha foha na‘e fakahingoa ko ‘Aisake kia ‘Ēpalahame. Pea na‘e fili ai ‘e he ‘Otuá ‘a Sēkope mei he ongo foha ‘o ‘Aisaké.

Na‘e ma‘u ‘e Sēkope ha fāmili tokolahi ko hono ngaahi foha ‘e toko 12 mo hono ngaahi ‘ofefine. Ko e ngaahi foha ‘e toko 10 ‘o Sēkope na‘a nau fehi‘a ‘i honau tehina ko Siosifa pea na‘a nau fakatau ia ke nofo pōpula ‘i ‘Isipite. Ki mui mai, na‘e hoko ‘a Siosifa ko e pule mahu‘inga ‘i ‘Isipite. ‘I he hoko ‘a ha fu‘u honge, na‘e ‘ahi‘ahi‘i ‘e Siosifa hono ngaahi tokouá ke ‘ilo pe kuo liliu honau lotó. Faifai atu pē, ko e fāmili kotoa ‘o Sēkopé, ko e kau ‘Isilelí, na‘a nau hiki ki ‘Isipite. Na‘e hoko ia hili ‘a e ta‘u ‘e 290 mei hono fā‘ele‘i ‘o ‘Ēpalahamé.

‘I he ta‘u ‘e 215 hoko mai ai na‘e nofo ‘a e kau ‘Isilelí ‘i ‘Isipite. ‘I he hili ‘a e mate ‘a Siosifá, na‘a nau hoko ko e kau pōpula ‘i ai. Faifai atu pea na‘e fā‘ele‘i ai ‘a Mōsese, pea na‘e ngāue‘aki ia ‘e he ‘Otuá ke fakahaofi ‘a e kau ‘Isilelí mei ‘Isipite. Ko hono fakakātoá, ko e ta‘u ‘e 857 ‘o e hisitōliá ‘oku lau ki ai ‘a e Konga UÁ.