NA‘E ‘ikai ke kei malava ‘e Siosifa ke matu‘uaki ‘ene ngaahi ongo‘í. Na‘á ne fakahā ki he‘ene kau sevānití kotoa pē ke nau ‘alu ki tu‘a. Pea toe pē ‘a Siosifa mo hono ngaahi tokouá, na‘á ne kamata ke tangi. ‘E lava ke tau fakakaukau atu ki he fu‘u ‘ohovale ‘a hono ngaahi tokouá, koe‘uhi he na‘e ‘ikai te nau ‘ilo ‘a e ‘uhinga ‘okú ne tangi aí. Pea faifai atu na‘á ne pehē: ‘⁠Ko Siosifa au. ‘Oku kei mo‘ui ‘a ‘eku tamaí?’

Na‘e fu‘u ‘ohovale lahi fau hono ngaahi tokouá, na‘e ‘ikai lava ke nau toe lea. Na‘a nau ilifia. Ka na‘e pehē atu ‘e Siosifa: ‘⁠Kātaki ‘unu‘unu mai ke ofi.’ ‘I he‘enau ‘unu‘unu atú, na‘á ne pehē: ‘⁠Ko homou tokoua au ko Siosifá, ‘a ia na‘a mou fakatau ki ‘Isipité.’

Na‘e hoko atu ‘a e lea ‘a Siosifá ‘i ha founga anga-‘ofa: ‘ ‘Oua na‘a mou pehē ko kimoutolu ‘oku koví koe‘uhi ko ho‘omou fakatau mai au ki hení. Ko e ‘Otuá na‘á ne ‘omai au ki ‘Isipité ni ke fakahaofi ‘a e mo‘ui ‘a e kakaí. Kuo fokotu‘u au ‘e Felo ke u hoko ko e pule ‘o e fonuá ni kotoa. Ko ia foki fakavavevave ki he‘eku tamaí pea fakahā ki ai ‘a e me‘á ni. Pea tala ki ai ke hiki mai ‘o nofo ‘i heni.’

Pea na‘e toki fā‘ofua ‘a Siosifa ‘i hono ngaahi tokouá, peá ne kuku mo ‘uma kiate kinautolu kotoa. ‘I he fanongo ai ‘a Felo na‘e ha‘u ‘a e ngaahi tokoua ‘o Siosifá, na‘á ne tala kia Siosifa: ‘ ‘Oange kiate kinautolu ha saliote pea ‘omai ‘enau tamaí pea mo honau ngaahi fāmilí pea nau foki mai ki heni. Pea te u ‘oange kiate kinautolu ‘a e konga fonua lelei taha ‘i he fonua kotoa ‘o ‘Isipité.’

Ko e me‘a ia na‘a nau faí. ‘Okú ke sio heni ki he fe‘iloaki ‘a Siosifa mo ‘ene tamaí ‘i he‘ene ha‘u ki ‘Isipite mo hono fāmilí hono kotoa.

Na‘e tupu ‘a e fāmili ‘o Sēkopé ‘o fu‘u tokolahi. Ko hono lau fakakātoa ko e toko 70 ‘i he‘enau hiki ki ‘Isipité, ko hono lau ia ‘o Sēkope mo ‘ene fānaú mo e ngaahi makapuná. Ka na‘e ‘i ai foki mo honau ngaahi uaifi, pea mo e kau sevāniti foki. Na‘a nau nofo kotoa ‘i ‘Isipite. Na‘e ui kinautolu ko e kau ‘Isileli, koe‘uhi he na‘e ‘osi liliu ‘e he ‘Otuá ia ‘a e hingoa ‘o Sēkopé ko ‘Isileli. Na‘e hoko ‘a e kau ‘Isilelí ko e kakai mātu‘aki makehe ki he ‘Otuá, ‘o hangē ko ia te tau sio ki ai ‘amui angé.