SIO kia Mōsese ‘okú ne hola mei ‘Isipite. ‘Okú ke sio ki he ongo tangata ‘okú na tuli iá? ‘Okú ke ‘ilo hono ‘uhinga ‘okú na fiema‘u ai ke tāmate‘i ‘a Mōsesé? Tau feinga ke ‘ilo ‘a hono ‘uhingá.

Na‘e tupu hake ‘a Mōsese ‘i he fale ‘o Felo, ko e pule ia ‘o ‘Isipité. Na‘á ne hoko ko e tangata lahi mo poto ‘aupito. Na‘e ‘ilo ‘e Mōsese ‘oku ‘ikai ko ha ‘Isipite ia, ka ko ‘ene ongo mātu‘a mo‘oní ko e ongo pōpula ‘Isileli.

‘I he ‘aho ‘e taha, ‘i hono ta‘u 40, na‘e fakakaukau ‘a Mōsese ke ‘alu ‘o sio pe ‘oku fēfē ‘a e anga ‘o e nofo ‘a hono kakaí. Na‘e fu‘u fakamamahi ‘a e me‘a na‘e hoko kiate kinautolú. Na‘á ne sio ki ha tangata ‘Isipite na‘á ne tā ha pōpula ‘Isileli. Na‘e sio holo ‘a Mōsese, pea ‘i he ‘ikai ha taha ‘oku sio maí, na‘á ne taa‘i ‘a e tokotaha ‘Isipité, pea na‘e mate ia. Pea na‘e tanu leva ‘e Mōsese ‘a e ‘anga‘angá ni ‘i he ‘one‘oné.

‘I he ‘aho hono hokó na‘e toe ‘alu ‘a Mōsese ‘o sio ki hono kakaí. Na‘á ne fakakaukau te ne lava ‘o tokoni‘i kinautolu ke ‘oua te nau toe hoko ko e kau pōpula. Ka na‘á ne sio ki ha ongo tangata ‘Isileli ‘okú na fuhu, ko ia na‘e lea ‘a Mōsese ki he tangata na‘e halaiá: ‘⁠Ko e hā ‘okú ke taa‘i ai ho tokouá?’

Na‘e pehē ‘e he tangata: ‘⁠Ko hai na‘á ne ‘ai koe ko homau pule mo fakamaau? Te ke tāmate‘i au ‘o hangē ko ho‘o tāmate‘i ‘a e tangata ‘Isipité?’

Na‘e kamata leva ke ilifia ‘a Mōsese. Na‘á ne ‘ilo kuo ‘ilo‘i ‘e he kakaí ‘a ‘ene me‘a na‘e fai ki he tangata ‘Isipité. Na‘e a‘u foki ‘o fanongo ai ‘a Felo, peá ne fekau ‘a e kau tangata ke nau tāmate‘i ‘a Mōsese. Ko hono ‘uhinga ia na‘e pau ke hola ai ‘a Mōsese mei ‘Isipité.

‘I he mavahe ‘a Mōsese mei ‘Isipité, na‘á ne ‘alu ki he fonua mama‘o ko Mitiane. ‘I he fonua ko ‘ení na‘á ne fe‘iloaki ai mo e fāmili ‘o Setelō, pea na‘e mali ai ia mo e taha ‘o hono ngaahi ‘ofefiné na‘e hingoa ko Sīpola. Na‘e hoko ‘a Mōsese ko e tauhi-sipi pea na‘á ne tauhi mo tokanga‘i ‘a e fanga sipi ‘a Seteloó. Na‘á ne nofo ‘i he fonua ko Mitiané ‘i he ta‘u ‘e 40. Kuo a‘u ‘eni ki hono ta‘u 80. Pea ‘i he ‘aho ‘e taha, lolotonga ‘a e nofo ‘a Mōsese ‘o tokanga‘i ‘a e fanga sipi ‘a Seteloó, na‘e hoko ha me‘a fakaofo na‘á ne liliu lahi ‘a e mo‘ui ‘a Mōsesé. Huke‘i ‘a e peesí, pea te tau sio ai pe ko e hā ‘a e me‘a fakaofo ko ‘ení.