SIO ki he loto-mamahi mo e ‘ikai ha ‘amanaki ‘a e tamasi‘i ko ‘ení. Ko Siosifa ia. Na‘e toki fakatau atu ia ‘e hono ngaahi tokouá ki he kau tangata ko eni ko ‘enau fononga ki ‘Isipite. Na‘e hoko ai ‘a Siosifa ko e pōpula. Ko e hā na‘e fai ai kia Siosifa ‘a e me‘a ‘oku koví ni ‘e hono ngaahi tokoua tamai tahá? Koe‘uhi na‘a nau meheka kia Siosifa.

Na‘e fu‘u sai‘ia lahi ‘a ‘enau tamai ko Sēkopé ‘ia Siosifa. Na‘á ne fakahā ‘ene lelei‘ia ‘iate iá ‘aki ‘ene ‘ai ke ngaohi ha kote faka‘ofo‘ofa mo‘o Siosifa. ‘I he sio ‘a hono ngaahi ta‘okete ‘e toko 10 ki he ‘ofa pehē ‘a Sēkope ‘ia Siosifá, na‘a nau kamata ke meheka mo fehi‘a kia Siosifa. Ka na‘e toe ‘i ai mo e ‘uhinga na‘a nau fehi‘a ai ‘iate iá.

Na‘e ‘i ai ‘a e ongo misi ‘a Siosifa. ‘I he ongo misi fakatou‘osi ‘a Siosifá na‘e punou ange ‘a hono ngaahi tokouá kiate ia. ‘I hono tala ‘e Siosifa ‘a e ongo misi ko ení ki hono ngaahi tokouá, na‘e toe lahi ange ai ‘enau fehi‘á.

‘I ha ‘aho ‘e taha na‘e tokanga‘i ‘e he ngaahi ta‘okete ‘o Siosifá ‘a e fanga sipi ‘a ‘enau tamaí, na‘e fekau ‘e Sēkope ‘a Siosifa ke ‘alu ‘o vakai pe ‘oku nau fēfē. ‘I he sio atu pē ‘a e ngaahi tokoua ‘o Siosifá ki he‘ene ha‘ú, na‘e pehē ‘e honau ni‘ihi: ‘⁠Tau tāmate‘i ia!’ Ka na‘e pehē ange ‘e Lūpeni ko e lahi tahá ia: ‘ ‘Ikai, ‘oua te mou fai ia!’ Ka na‘a nau puke ‘a Siosifa ‘o lī ia ki he vaikeli kuo maha. Pea na‘a nau toki tangutu leva ‘o fakakaukau‘i pe ko e hā ‘a e me‘a ‘e fai kiate iá.

Fe‘unga mo e taimi ko ení na‘e fononga mai ai ha kau tangata ‘Isime‘eli. Na‘e pehē ange ‘e Siuta ki hono ngaahi tokoua tamai tahá: ‘⁠Tau fakatau atu ia ki he kau ‘Isime‘elí.’ Pea ko e me‘a ia na‘a nau faí. Na‘a nau fakatau atu ‘a Siosifa ‘aki ‘a e konga siliva ‘e 20. Ko e toki me‘a mā‘ulalo mo ta‘eanga-‘ofa eni!

Ko e hā leva ‘a e me‘a ‘e fakahā ‘e he ngaahi tokouá ni ki he‘enau tamaí? Na‘a nau tāmate‘i ha kosi pea toutou unu ‘a e kofu faka‘ofo‘ofa ‘o Siosifá ‘i he toto ‘o e kosí. Pea nau toki ‘alu leva mo e kofú ki honau ‘apí ki he‘enau tamai ko Sēkopé ‘o nau pehē: ‘⁠Na‘a mau ma‘u ‘eni. Vakai mai ki ai, pe ‘oku ‘ikai ko e kofu ‘eni ‘o Siosifá.’

Na‘e sio atu pē ‘a Sēkope ko e kofu ia ‘o Siosifá. Na‘á ne tangi ‘o pehē: ‘⁠Ko e manu fekai na‘á ne tāmate‘i ‘a Siosifa.’ Pea ko e me‘a ia na‘e loto ‘a e ngaahi tokoua ‘o Siosifá ke tui ki ai ‘a ‘enau tamaí. Na‘e fu‘u loto-mamahi ‘aupito ‘a Sēkope. Na‘á ne tangi he ngaahi ‘aho lahi. Ka na‘e ‘ikai ke mate ‘a Siosifa ia. Tau sio ange pe ko e hā ‘a e me‘a na‘e hoko ki ai ‘i he feitu‘u na‘e ‘ave ki aí.