TALANOA 12
Na‘e Langa ‘e he Kau Tangata ha Fu‘u Taua
NA‘E ‘osi atu ha ngaahi ta‘u lahi. Na‘e tokolahi ‘a e fānau ‘a e ngaahi foha ‘o Noá. Pea na‘e lalahi hake ‘enau fānaú ‘o toe ‘i ai mo ‘enau fānau foki. Na‘e ‘ikai ke fu‘u fuoloa kuo tokolahi ‘a e kakai ‘i he māmaní.
Ko e tokotaha ‘o e kakai ko ení ko e mokopuna hono ua ‘o Noa na‘e hingoa ko Nimilote. Ko e tangata kovi na‘á ne tuli manu mo tāmate‘i fakatou‘osi ‘a e fanga manú mo e tangatá. Na‘e toe ‘ai pē foki ‘e Nimilote ia ko e tu‘i ke pule ki he kakai kehé. Na‘e ‘ikai ke sai‘ia ‘a e ‘Otuá ‘ia Nimilote.
Ko e kakai kotoa ‘i he taimi ko iá na‘a nau lea ‘i he lea pē ‘e taha. Na‘e fiema‘u ‘e Nimilote ke fakataha‘i ai pē ‘a e kakaí kae lava ke ne pule‘i kinautolu. Ko ia, ‘okú ke ‘ilo ‘a e me‘a na‘á ne faí? Na‘á ne tala ki he kakaí ke nau langa ha kolo mo ha fu‘u taua ‘i ai. Vakai kiate kinautolu ‘i he fakatātaá ‘oku nau ngaohi ‘a e ngaahi piliki.
Na‘e ‘ikai ke fiefia ‘a Sihova ko e ‘Otuá ‘i he langa ko ‘ení. Na‘e fiema‘u ‘e he ‘Otuá ‘a e kakaí ke mafola atu pea nofo‘i ‘a e māmaní kotoa. Ka na‘e pehē ‘e he kakaí: ‘ ‘E, tau langa ha‘atau kolo, mo ha taua ‘o fu‘u mā‘olunga fau ke a‘u hono tumutumú ki he langí. Pea ‘e ‘iloa ai kitautolu!’ Na‘e fiema‘u pē ‘e he kakaí ‘a e lāngilangi ma‘anautolu pē, kae ‘ikai ma‘á e ‘Otuá.
Ko ia na‘e ‘ai ‘e he ‘Otuá ‘a e kakaí ke tuku hono langa ‘a e tauá. ‘Okú ke ‘ilo pe na‘e anga-fēfē ‘ene fai iá? ‘Aki ‘ene ‘ai fakafokifā ‘a e kakaí ke nau lea ‘i he ngaahi lea kehekehe, kae ‘ikai ko e lea pē ‘e taha. Na‘e ‘ikai toe femahino‘aki ‘a e kau langá. Ko hono ‘uhinga ia na‘e ui ai honau koló ko Pēpeli, pe Pāpilone, ko hono ‘uhinga ko e “Maveuveu.”
Na‘e kamata leva ke hiki ‘a e kakaí mei Pēpeli. Na‘e ‘alu ‘a e kakai na‘a nau lea ‘i he lea tataú ‘o nofo fakataha ‘i he ngaahi feitu‘u kehekehe ‘o māmaní.