NA‘E nofo ‘a Lote mo hono fāmilí fakataha mo ‘Ēpalahame ‘i he fonua ko Kēnaní. ‘I he ‘aho ‘e taha na‘e pehē ai ‘e ‘Ēpalahame kia Lote: ‘ ‘Oku ‘ikai fe‘unga ‘a e fonuá ni ki he‘eta fanga manú kotoa. Kātaki, ke ta mavaeua. Kapau te ke ‘alu koe ki hē pea te u ‘alu au ki hē.’

Na‘e vakai ‘a Lote ki he konga fonuá. Na‘á ne sio ki ha konga fonua ‘oku lelei ‘aupito pea ‘oku ‘i ai ha vai pea mo e ngaahi mohuku lelei ki he‘ene fanga manú. Ko e Vahefonua ia ‘o Sioataní. Ko ia na‘e hiki ki ai ‘a Lote mo hono fāmilí mo ‘ene fanga manú. Faifai atu pea na‘a nau nofo ‘i he kolo ko Sōtoma.

Ko e kakai ‘o Sōtomá na‘e kovi ‘aupito. Na‘e fakalotomamahi ‘eni kia Lote, koe‘uhi he ko e tangata lelei ia. Na‘e loto-mamahi foki mo e ‘Otuá. Faifai atu pē, pea na‘e fekau mai ‘e he ‘Otuá ha ongo ‘āngelo ke fakatokanga kia Lote te ne faka‘auha ‘a Sōtoma pea mo e kolo ofi ki ai ko Komola, koe‘uhi ko e kovi ‘a e kakaí.

Na‘e pehē ‘e he ongo ‘āngeló kia Lote: ‘⁠Vave! ‘Alu mo ho uaifí mo ho ongo ‘ofefiné pea hola mei heni!’ Na‘e ki‘i fakatuotuai ‘a Lote mo hono fāmilí ke ‘alu, ko ia na‘e puke ‘e he ongo ‘āngeló honau nimá ‘o taki atu kinautolu ki tu‘a mei he koló. Pea na‘e toki pehē ‘e he ‘āngelo ‘e taha: ‘⁠Lele ka mou mo‘ui! ‘Oua ‘e sio ki mui. Lele ki he mo‘ungá, ke ‘oua te mou mate.’

Na‘e talangofua ‘a Lote mo hono ongo ‘ofefiné pea na‘a nau hola mei Sōtoma. Na‘e ‘ikai te nau toe tatali, pea na‘e ‘ikai te nau toe sio ki mui. Ka na‘e talangata‘a ‘a e uaifi ‘o Loté. Hili pē ‘enau ‘alu mei Sōtomá, na‘á ne tu‘u ‘o sio ki mui. Pea na‘e hoko ai ‘a e uaifi ‘o Loté ko e fu‘u pou māsima. ‘Okú ke sio ki ai ‘i he fakatātaá?

‘Oku tau ako ha me‘a lelei mei heni. ‘Okú ne fakahā mai kiate kitautolu ‘oku fakahaofi ‘e he ‘Otuá ‘a kinautolu ‘oku talangofua kiate iá, ka ko kinautolu ‘oku talangata‘a kiate iá ‘e mole ‘enau mo‘uí.