NA‘E fe‘unga nai mo e māhina ‘e ua ‘o e mavahe ‘a e kau ‘Isilelí mei ‘Isipité, ne nau a‘u ai ki he Mo‘unga Sainaí, ‘a ia na‘e toe ui foki ko Hōlepi. Ko e feitu‘u tatau pē ‘eni na‘e lea ai ‘a Sihova kia Mōsese ‘i he ‘akau na‘e uló. Na‘e ‘apitanga heni ‘a e kakaí pea nau ki‘i nofo ai.

‘I he tatali ‘a e kakaí ‘i laló, na‘e kaka ‘a Mōsese ki he mo‘ungá. ‘I ai ‘i he funga mo‘ungá, na‘e tala ‘e Sihova kia Mōsese ‘okú Ne fiema‘u ‘a e kau ‘Isilelí ke talangofua ange kiate Ia pea ke nau hoko ko ‘Ene kakai makehe. ‘I he foki hifo ‘a Mōsesé, na‘á ne tala ki he kau ‘Isilelí ‘a e me‘a na‘e lea‘aki ‘e Sihová. Pea na‘e pehē ‘e he kakaí te nau talangofua kia Sihova, koe‘uhi ‘oku nau sai‘ia ke hoko ko ‘ene kakai.

Na‘e toki fai leva ‘e Sihova ha me‘a ngalikehe. Na‘á ne ‘ai ‘a e funga mo‘ungá ke kohu, mo ne fakatupunga ha mana le‘o lahi. Na‘á ne toe lea ki he kakaí: ‘⁠Ko au ko Sihova ko homou ‘Otua ‘a ia na‘á ne ‘omi kimoutolu mei ‘Isipite.’ Pea na‘á ne tu‘utu‘uni: ‘⁠Kuo pau ke ‘oua na‘a mou lotu ki ha toe ‘otua kehe ka ko au pē.’

Na‘e toe ‘oange foki ‘e he ‘Otuá ki he kau ‘Isilelí ha toe fekau, pe ngaahi lao, ‘e hiva. Na‘e ilifia ‘aupito ‘a e kakaí. Na‘a nau tala kia Mōsese: ‘⁠Ke ke lea kiate kimautolu, koe‘uhi he ‘oku mau ilifia he kapau ‘e lea mai ‘a e ‘Otuá kiate kimautolu te mau mate nai.’

Ki mui mai ai na‘e tala ‘e Sihova kia Mōsese: ‘⁠Ha‘u kiate au ki he mo‘ungá. Te u ‘oatu kiate koe ha maka lafalafa ‘e ua kuo u hiki ai ‘a e ngaahi lao ‘oku ou fiema‘u ke tauhi ‘e he kakaí.’ Ko ia na‘e toe ‘alu hake ai ‘a Mōsese ki he mo‘ungá. Na‘á ne nofo ai ‘i he ‘aho mo e pō ‘e 40.

Na‘e lahi ‘aupito ‘a e ngaahi lao ‘a e ‘Otuá ki he‘ene kakaí. Na‘e hiki ‘e Mōsese ‘a e ngaahi lao ko ‘eni. Na‘e toe ‘oange ‘e he ‘Otuá kia Mōsese ‘a e ongo maka lafalafa. Na‘e ‘osi tohi ai ‘e he ‘Otuá ia ‘a e ngaahi lao ‘e 10 ‘a ia na‘á ne lea‘aki ki he kakaí kotoa. Na‘e ui ia ko e Fekau ‘e Hongofulu.

Ko e Fekau ‘e Hongofulú ko e ngaahi lao mahu‘inga ia. Ka na‘e pehē pē mo e ngaahi lao kehe na‘e ‘oange ‘e he ‘Otuá ki he kau ‘Isilelí. Ko e taha ‘o e ngaahi lao ko ‘ení: ‘⁠Kuo pau ke ke ‘ofa kia Sihova ko ho ‘Otuá ‘aki ‘a e kotoa ho lotó, kotoa ho ‘atamaí, mo ho‘o mo‘uí kotoa pea mo e kotoa ho iví.’ Pea ko e taha ‘o e ngaahi laó: ‘⁠Kuo pau ke ke ‘ofa ki ho kaungā‘apí ‘o hangē pē ko ho‘o ‘ofa kiate koe.’ Na‘e pehē ‘e he ‘Alo ‘o e ‘Otuá, ‘a Sīsū Kalaisi, ko e ongo lao mahu‘inga lahi taha ‘eni na‘e ‘oange ‘e Sihova ki he‘ene kakai ‘Isilelí. Te tau ako ‘amui ange ki ha ngaahi me‘a lahi ‘o fekau‘aki mo e ‘Alo ‘o e ‘Otuá mo ‘ene ngaahi akonakí.