SIO! ‘Oku kolosi ‘a e kau ‘Isilelí ‘i he Vaitafe Sioataní! Ka ko e fē ‘a e vaí? Koe‘uhi he na‘e lahi ‘a e ‘uha na‘e tō ‘i he taimi ko ia ‘o e ta‘ú, pea na‘e fonu ‘a e vaitafé ‘i he ngaahi momeniti si‘i ki mu‘a atu. Ka ‘i he taimí ni kuo ‘osi kotoa ‘a e vaí! Pea kuo fononga atu ‘a e kau ‘Isilelí ‘i he fonua mōmoa ‘o hangē pē ko ia na‘e hoko ‘i he Tahi Kulokulá! Na‘e ‘alu kotoa ‘a e vaí ki fē? Tau vakai ange.

‘I he hoko ‘a e taimi ke kolosi ai ‘a e kau ‘Isilelí ‘i he Vaitafe Sioataní, ko e me‘a eni na‘e fekau ‘e Sihova kia Siōsiua ke tala ki he kakaí: ‘⁠Ko e kau taula‘eikí ke nau hiki ‘a e puha ‘o e fuakavá pea ‘alu mu‘omu‘a ‘iate kitautolu. Pea ‘i he tu‘u honau va‘é ki he vai ‘o e Vaitafe Sioataní, pea ‘e tu‘u leva ‘a e tafe ia ‘a e vaí.’

Ko ia na‘e fua ‘e he kau taula‘eikí ‘a e puha ‘o e fuakavá, pea nau mu‘omu‘a ‘i he kakaí. ‘I he‘enau a‘u ki he Vaitafe Sioataní, na‘e hopo atu ‘a e kau taula‘eikí ki he loto vaí. Na‘e tafe mālohi mo loloto. Ka ‘i he taimi pē na‘e a‘u ai honau va‘é ki he vaí, na‘e kamata ke tu‘u ‘a e tafe ‘a e vaí! Ko ha mana lahi ē! Na‘e ta‘ofi ‘e Sihova ‘a e vaí. Ko ia, na‘e taimi si‘i pē kuo ‘ikai toe ‘i ai ha vai ‘i he vaitafé!

Ko e kau taula‘eiki na‘a nau to‘o ‘a e puha ‘o e fuakavá na‘a nau ‘alu ki he loto mālie ‘o e vaitafé kuo mōmoa. ‘Okú ke sio ki ai ‘i he fakatātaá? ‘I he‘enau tu‘u ko ‘ená, na‘e ‘alu kotoa ‘a e kau ‘Isilelí ‘o kolosi ‘i he Vaitafe Sioataní ‘i he fonua mōmoa!

‘I he ‘osi ‘a e kolosi ‘a e kakai kotoa pē, na‘e fakahā ‘e Sihova kia Siōsiua ke tala ki he kau tangata mālohi ‘e toko 12: ‘⁠Mou ‘alu ki he loto vaitafé ki he feitu‘u ‘oku tu‘u ai ‘a e kau taula‘eikí mo e puha ‘o e fuakavá. Pea to‘o ha ngaahi maka ‘e 12, pea fokotu‘utu‘u ia ‘i he feitu‘u te mou nofo kotoa ai ‘apō. Pea ‘i he kaha‘ú, ka ‘eke ‘e ho‘omou fānaú ‘a e ‘uhinga ‘o e ngaahi maka ko ‘ení, pea te mou tala ange kiate kinautolu na‘e tu‘u ‘a e tafe ‘a e vaí ‘i he taimi na‘e hiki atu ai ‘a e puha ‘o e fuakava ‘a Sihová ‘o kolosi ‘i Sioataní. Ko e ngaahi maká ko e fakamanatu kiate kimoutolu ‘o e maná ni!’ Na‘e toe fokotu‘utu‘u foki ‘e Siōsiua ‘a e ngaahi maka ‘e 12 ‘i he feitu‘u na‘e tu‘u ai ‘a e kau taula‘eikí ‘i he tafe‘anga ‘o e vaitafé.

Ko hono faka‘osí na‘e pehē ‘e Siōsiua ki he kau taula‘eiki na‘a nau fua ‘a e puha ‘o e fuakavá: ‘⁠Mou ‘alu hake mei he Vaitafe Sioataní.’ Pea ‘i he taimi pē na‘a nau ‘alu hake aí, na‘e kamata leva ke toe tafe mai ‘a e vaí.