‘I HE Tohitapú te ke ma‘u ai ‘a e tohi ‘oku ui ko Lute. Ko e talanoa ia ‘o fekau‘aki mo e fāmili na‘a nau mo‘ui lolotonga ‘a e taimi na‘e kei ‘i ‘Isileli ai ‘a e kau fakamaaú. Ko Luté ko ha fefine kei talavou mei he fonua ko Mōape; na‘e ‘ikai ke kau ia ki he pule‘anga ‘a e ‘Otuá ko ‘Isileli. Ka ‘i he ako ‘a Lute ‘o ‘ilo ‘a e ‘Otua mo‘oni ko Sihová, na‘á ne hoko ‘o ‘ofa lahi kiate ia. Ko Nāomi ko e fefine motu‘a angé ko ia na‘á ne tokoni kia Lute ke ako ‘o fekau‘aki mo Sihová.

Ko Nāomí ko e fefine ‘Isileli ia. Ko ia mo hono husepānití mo hona ongo foha na‘a nau hiki ki he fonua ko Mōapé ‘i he taimi na‘e si‘isi‘i ai ‘a e me‘akaí ‘i ‘Isileli. Pea na‘e mate ai ‘a e husepāniti ‘o Nāomí. Ki mui mai ai na‘e mali ‘a e ongo tama tangata ‘a Nāomí mo e ongo ta‘ahine mei Mōape na‘e hingoa ko Lute mo Opa. Ka na‘e ‘osi ‘a e ta‘u nai ‘e 10, na‘e mate ‘a e ongo tama tangata ‘a Nāomí. Ko ha loto-mamahi ē ka ko Nāomi mo e ongo fefiné! Ko e hā nai ‘e fai ‘e Nāomí?

‘I he ‘aho ‘e taha na‘e fakakaukau ai ‘a Nāomi ke fai ha‘ane fononga mama‘o ‘o foki ki hono ‘apí mo hono kakaí. Na‘e fie nofo pē ‘a Lute mo Opa pea mo Nāomi, ko ia na‘a na ō mo ia. Ka ‘i he hili pē ‘enau fononga si‘i atu he halá, na‘e hanga hake ‘a Nāomi ki he ongo fefiné ‘o ne pehē: ‘⁠Foki kimoua ki ‘api ‘o taki taha nofo mo ho‘omo fa‘ē.’

Na‘e ‘uma māvae ange leva ‘a Nāomi ki he ongo fefiné ni. ‘I he me‘á ni na‘á na kamata tangi koe‘uhi he na‘á na ‘ofa lahi ‘ia Nāomi. Na‘á na pehē ange: ‘ ‘Ikai! Te ma ‘alu mo koe ki ho kakaí.’ Ka na‘e tali ange ‘e Nāomi: ‘⁠Kuo pau ke mo foki, ‘a hoku ongo ‘ofefine. ‘E lelei ange pē homo ‘apí kiate kimoua.’ Ko ia na‘e kamata leva ke foki ‘a Opa ki hono ‘apí. Ka na‘e ‘ikai pē ke foki ‘a Lute ia.

Na‘e hanga hake ‘a Nāomi kiate ia ‘o ne pehē: ‘⁠Kuo foki ‘a Opa. ‘Alu mo koe ke mo foki ki ‘api.’ Ka na‘e tali ‘e Lute: ‘ ‘Oua te ke feinga‘i au ke u li‘aki koe! Tuku pē au ke ta ō. Ko e feitu‘u te ke ‘alu ki aí te u ‘alu ai, pea ko e feitu‘u te ke nofo aí te u nofo ai. Ko ho kakaí ko hoku kakai, pea ko ho ‘Otuá ko hoku ‘Otua. Ko e feitu‘u te ke mate aí te u mate ai, pea ko e feitu‘u ia ‘e tanu ai au.’ ‘I he ‘osi pē hono lea‘aki ‘eni ‘e Luté, na‘e ‘ikai leva ke toe feinga ‘a Nāomi ke ‘ai ia ke foki ki ‘api.

Na‘e faifai pea a‘u atu ‘a e ongo fefiné ni ki ‘Isileli. Pea na‘á na nofo ai. Na‘e kamata ngāue leva ‘a Lute ‘i he ngoue‘angá, koe‘uhi he ko e taimi ‘eni ki hono tānaki ‘o e pa‘alé. Na‘e fakangofua ‘e he tangata na‘e hingoa ko Pōasi ke ne tānaki pa‘ale ‘i he‘ene ngoue‘angá. ‘Okú ke ‘ilo pe ko hai ‘a e fa‘ē ‘a Pōasí? Ko Lēhapi mei he kolo ko Sielikō.

‘I he ‘aho ‘e taha na‘e pehē ‘e Pōasi kia Lute: ‘⁠Kuó u fanongo he me‘a kotoa ‘o fekau‘aki mo koe, pea mo ho‘o anga-lelei kuo fai kia Nāomí. ‘Oku ou ‘ilo kuó ke li‘aki ho‘o tamaí mo ho‘o fa‘ē mo ho fonuá pea mo ho‘o ha‘u ‘o nofo ‘i he kakai na‘e te‘eki ai te ke ‘ilo ki mu‘a. ‘Ofa ke failelei ‘a Sihova kiate koe!’

Na‘e tali ange ‘e Lute: ‘ ‘Okú ke fu‘u anga-lelei kiate au, tangata‘eiki. Kuó ke ‘ai au ke u ongo‘i fiemālie ange ‘aki ho‘o ngaahi lea kuo fai mai kiate aú.’ Na‘e sai‘ia ‘aupito ‘a Pōasi ‘ia Lute, pea na‘e ‘ikai fuoloa kuó na mali. Ko e me‘a fakafiefia ‘eni kia Nāomi! Ka na‘e toe fiefia ange ‘a Nāomi ‘i he ma‘u ‘e Lute mo Pōasi hona ‘uluaki fohá, na‘e fakahingoa ko ‘Ōpeti. Ki mui mai na‘e hoko ‘a ‘Ōpeti ko e kui tangata ia ‘a Tēvita, ‘a ia te tau toki ako lahi ‘o kau ki ai ‘amui ange.