‘OKÚ KE ‘ilo ‘a e hingoa ‘o e tangata mālohi taha kuo mo‘ui mai? Ko e fakamaau ia na‘e hingoa ko Samisoni. Ko Sihova ia na‘á ne ‘oange kia Samisoni ‘a hono ivi mālohí. Na‘a mo e ki mu‘a ke fanau‘i ‘a Samisoní, na‘e tala ‘e Sihova ki he‘ene fa‘eé: ‘ ‘E vavé ni pē ke ke ma‘u ha tama tangata. Te ne taki ‘i hono fakahaofi ‘a e kau ‘Isilelí mei he kau Filisitiá.’

Ko e kau Filisitiá ko e kakai kovi na‘a nau nofo ‘i Kēnani. Na‘e ‘i ai ‘enau kau tangata tau tokolahi, pea na‘a nau fakamamahi‘i lahi ‘a e kau ‘Isilelí. ‘I he taimi ‘e taha, ‘i he ‘alu ‘a Samisoni ki he feitu‘u na‘e nofo ai ‘a e kau Filisitiá, na‘e ha‘u ha fu‘u laione ‘o ngungulu kiate ia. Ka na‘e tāmate‘i ‘e Samisoni ‘a e laioné ‘aki hono ongo nimá pē. Na‘á ne toe tāmate‘i foki ha laui teau ‘o e kau Filisitia koví.

Ki mui mai na‘e ‘ofa ‘a Samisoni ‘i ha fefine na‘e hingoa ko Tilila. Na‘e tala‘ofa ‘a e kau taki ‘o Filisitiá kia Tilila te nau taki taha ‘oange kiate ia ‘a e konga siliva ‘e 1,100 ‘o kapau te ne tala ange kiate kinautolu pe ko e hā ‘okú ne ‘ai ‘a Samisoni ke fu‘u mālohi pehē faú. Na‘e fiema‘u ‘e Tilila ‘a e fu‘u pa‘anga kotoa ko iá. Na‘e ‘ikai ko ha kaume‘a mo‘oni ia kia Samisoni pe ki he kakai ‘a e ‘Otuá. Ko ia na‘á ne toutou ‘eke kia Samisoni pe ko e hā ‘okú ne ‘ai ia ke fu‘u mālohi pehē faú.

Faifai atu pē, na‘e ‘ai ‘e Tilila ‘a Samisoni ke ne tala ange ‘a e fakapulipuli ki he tupu‘anga hono mālohí. Na‘e pehē ‘e Samisoni: ‘⁠Kuo te‘eki ai ‘aupito ke kosi hoku ‘ulú. Talu mei hoku fanau‘i, na‘e fili au ‘e he ‘Otuá ke hoko ko ha sevāniti makehe ‘a‘ana ‘oku ui ko e Nāsili. Kapau ‘e kosi hoku ‘ulú ‘e mole leva hoku mālohí.’

‘I hono ‘ilo‘i pē ‘eni ‘e Tililá, na‘á ne ‘ai leva ‘a Samisoni ke mohe ‘i hono fungá. Pea na‘á ne toki ui leva ha tangata ke hū ange ‘o kosi ‘a e ‘ulu ‘o Samisoní. ‘I he ‘ā hake ‘a Samisoní kuo mole hono mālohí. Na‘e hū mai leva ‘a e kau Filisitiá ‘o puke pōpula ia. Na‘a nau ta‘aki hono ongo matá pea ‘ai ia ko ‘enau pōpula.

‘I he ‘aho ‘e taha na‘e fai ‘e he kau Filisitiá ‘a e kātoanga lahi ke fai ‘enau lotu ki honau ‘otua ko Tākoni, pea na‘a nau ‘omi ‘a Samisoni mei he pilīsoné ‘o nau fakakata‘aki ia. Kuo toe tupu hake ‘a e lou‘ulu ‘o Samisoní. Na‘e pehē ‘e Samisoni ki he tamasi‘i na‘á ne taki ia ‘i hono nimá: ‘⁠Taki au ke u ala ki he ongo pou ‘okú na puke ‘a e falé.’ Pea na‘e lotu ‘a Samisoni kia Sihova ki ha mālohi, peá ne puke ‘a e ongo poú. Na‘á ne kalanga: ‘⁠Tuku au ke u mate mo e kau Filisitiá.’ Na‘e ‘i ai ‘a e kau Filisitia ‘e toko 3,000 ‘i he kātoangá, pea ‘i he tulolo atu pē ‘a Samisoni ‘o teke‘i ‘a e ongo fu‘u poú na‘e holo ‘a e falé ‘o tāmate‘i kotoa ‘a e kakai koví ni.