Na‘e hoko ‘a Saula ko e ‘uluaki tu‘i ‘o ‘Isileli. Ka na‘e taliteke‘i ia ‘e Sihova pea na‘e fili ‘a Tēvita ko e tu‘i ko hono fetongi. Te tau ako ki ha ngaahi me‘a lahi ‘o kau kia Tēvita. ‘I he‘ene kei talavoú, na‘á ne tau mo e saiāniti ko Kolaiate. Ki mui na‘á ne hola mei he Tu‘i meheka ko Saulá. Pea na‘e ta‘ofi ia ‘e he fefine faka‘ofo‘ofa ko ‘Apikalé mei he‘ene fai ‘a e me‘a na‘e mei ngali vale.

Ko hono hokó, te tau ako ai ha ngaahi me‘a lahi ‘o fekau‘aki mo e foha ‘o Tēvita ko Solomone, ‘a ia na‘á ne fetongi ‘a Tēvita ko e tu‘i ‘o ‘Isileli. Ko e ‘uluaki ngaahi tu‘i ‘e tolu ‘o ‘Isilelí na‘a nau taki taha pule ‘i he ta‘u ‘e 40. Hili ‘a e mate ‘a Solomoné, na‘e mavaeua ‘a ‘Isileli ki he pule‘anga ‘e ua, ko e pule‘anga ‘i he tokelaú mo e pule‘anga ‘i he tongá.

Ko e pule‘anga matakali ‘e 10 ‘i he tokelaú, na‘e fe‘unga pē hono fuoloá mo e ta‘u ‘e 257 ki mu‘a pea faka‘auha ia ‘e he kau ‘Asīliá. Pea ‘osi ‘a e ta‘u ‘e 133 mei ai, na‘e toe faka‘auha foki mo e pule‘anga matakali ‘e ua ‘i he tongá. ‘I he taimi ko ‘ení na‘e taki pōpula ai ‘a e kau ‘Isilelí ki Pāpilone. Ko ia ko e Konga FĀ ‘okú ne lau ki he vaha‘a taimi ko e ta‘u ‘e 510 ‘o e hisitōliá, ko e vaha‘a taimi ia na‘e lahi ai ‘a e ngaahi me‘a mālie ‘a ia te tau ako ki ai.