KO E fakatātā ‘eni ‘o ha palataisi ‘o hangē ko ia na‘e fakahā nai ‘e he ‘Otuá ki he‘ene palōfita ko ‘Aiseá. Na‘e mo‘ui ‘a ‘Aisea taimi si‘i pē meia Siona.

Ko e ‘uhinga ‘o e palataisí ko ha “ngoue” pe “pa‘ake.” ‘Oku fakamanatu mai ‘e he fakatātā ko ‘ení ha me‘a ‘a ia na‘a tau ‘osi sio ai ‘i he tohí ni? ‘Oku hā ngalingali tatau mo e ngoue faka‘ofo‘ofa na‘e ngaohi ‘e he ‘Otua ko Sihová ma‘a ‘Ātama mo ‘Iví, ‘ikai ko ia? Ka ‘e hoko nai ‘a e māmaní hono kotoa ko ha palataisi?

Na‘e tala ‘e Sihova ki he‘ene palōfita ko ‘Aiseá ke ne tohi ‘o fekau‘aki mo e palataisi fo‘ou ‘e hoko mai ki he kakai ‘a e ‘Otuá. Na‘á ne pehē: ‘⁠Ko e fanga ulofí mo e fanga sipí te nau nofo fakataha ‘i he melino. ‘E kai fakataha ‘a e ‘uhiki‘i pulú mo e ‘uhiki‘i laioné, pea ‘e tokanga‘i kinautolu ‘e he fānau iiki. Na‘a mo ha pēpē ‘e ‘ikai ke lavea ia ‘i ha‘ane va‘inga ‘o ofi ki ha ngata huhu kona.’

‘E pehē ‘e he tokolahi, ‘ ‘E ‘ikai ‘aupito malava ke hoko ha me‘a pehē. Kuo ‘i ai ma‘u pē ‘a e ngaahi faingata‘a‘ia ‘i māmani, pea ‘e ‘i ai ma‘u ai pē ia.’ Ka ke fakakaukau ange ki ai: Ko e fa‘ahinga ‘api fēfē na‘e ‘oange ‘e he ‘Otuá kia ‘Ātama mo ‘Iví?

Na‘e tuku ‘e he ‘Otuá ‘a ‘Ātama mo ‘Ivi ki ha palataisi. Koe‘uhi pē ko ‘ena talangata‘a ki he ‘Otuá na‘e toki mole ai hona ‘api faka‘ofo‘ofá, peá na tupu ‘o motu‘a pea mate. ‘Oku tala‘ofa ‘e he ‘Otuá te ne ‘oange ki he kakai ‘oku nau ‘ofa kiate iá ‘a e ngaahi me‘a pē ko ia na‘e mole meia ‘Ātama mo ‘Iví.

‘I he palataisi fo‘ou ka hoko maí ‘e ‘ikai ke ‘i ai ha me‘a ke fakamamahi pe ke faka‘auha. ‘E ‘i ai ‘a e melino haohaoa. ‘E mo‘ui lelei mo fiefia ‘a e kakai kotoa pē. ‘E hangē pē ia ko ia na‘e fiema‘u ‘e he ‘Otuá ‘i he kamata‘angá. Ka te tau ako ki ai ‘amui ange ki he founga ‘e fakahoko mai ai ‘eni ‘e he ‘Otuá.