‘I HE hili ‘a e mate ‘a Tu‘i Selopoamé, na‘e kovi ‘a e ngaahi tu‘i kotoa na‘e pule ‘i he pule‘anga matakali ‘e 10 ‘o ‘Isileli ‘i he tokelaú. Ko Tu‘i ‘Ēhapi ko e tu‘i kovi taha ia ‘iate kinautolu. ‘Okú ke ‘ilo hono ‘uhingá? Ko e ‘uhinga lahi ‘e taha ko hono uaifí, ko e Kuini kovi ‘aupito ko Sisipeli.

Na‘e ‘ikai ko ha fefine ‘Isileli ‘a Sisipeli. Ko e ‘ofefine ia ‘o e tu‘i ‘o Saitoni. Na‘e lotu ia ki he ‘otua loi ko Pēali, pea na‘á ne ‘ai ‘a ‘Ēhapi mo e kau ‘Isileli tokolahi ke nau lotu foki kia Pēali. Na‘e fehi‘a ‘a Sisipeli kia Sihova pea na‘á ne tāmate‘i ‘a e tokolahi ‘o ‘ene kau palōfitá. Na‘e pau ke toi ‘a e ni‘ihi kehé ‘i ha ngaahi ‘ana ke ‘oua na‘a tāmate‘i kinautolu. Kapau na‘e fiema‘u ‘e Sisipeli ha me‘a, na‘e a‘u ‘o ne tāmate‘i ha taha kae ma‘u ia.

‘I ha ‘aho ‘e taha na‘e mātu‘aki loto-mamahi ai ‘a Tu‘i ‘Ēhapi. Ko ia na‘e ‘eke kiate ia ‘e Sisipeli: ‘⁠Ko e hā ‘okú ke loto-mamahi ai ‘i he ‘aho ní?’

Na‘e tali ‘e ‘Ēhapi: ‘⁠Koe‘uhi ko e me‘a na‘e lea mai ai ‘a Nēpote. Na‘á ku fie fakatau ‘ene ngoue vainé. Ka na‘á ne tala mai he‘ikai lava ke u fakatau ia.’

Na‘e pehē ‘e Sisipeli: ‘ ‘Oua te ke tokanga ki ai. Te u ma‘u ia ma‘au.’

Ko ia na‘e fai ‘e Sisipeli ha ngaahi tohi ki ha kau tangata ‘iloa ‘i he kolo ko ia na‘e nofo ai ‘a e tangata ko ‘eni ko Nēpoté. Na‘á ne tala kiate kinautolu: ‘ ‘Ai ha kau tangata kovi ke nau pehē kuo lau‘ikovi‘i ‘e Nēpote ‘a e ‘Otuá mo e tu‘í. Pea toki ‘ave ‘a Nēpote ki he tu‘a koló ‘o tolomaka‘i ke mate.’

‘I he ‘ilo pē ‘e Sisipeli kuo mate ‘a Nēpoté, na‘á ne pehē kia ‘Ēhapi: ‘ ‘Alu ‘o ma‘u ‘ene ngoue vainé.’ ‘Ikai ‘okú ke loto-tatau na‘e totonu ke tautea ‘a Sisipeli ki hono fai ha me‘a fakalilifu pehē?

Ko ia, na‘e fekau ai ‘e Sihova ha tangata ko Sehu ke ne tautea ia. ‘I he fanongo pē ‘a Sisipeli kuo ha‘u ‘a Sehú, na‘á ne valivali hono matá mo feinga‘i ia ke hā faka‘ofo‘ofa. Ka ‘i he ha‘u ‘a Sehu ‘o ne sio kia Sisipeli ‘i he matapā sio‘atá, na‘á ne ui ki he kau tangata ‘i he pālasí: ‘⁠Lī hifo ia!’ Na‘e talangofua ki ai ‘a e kau tangatá, ‘o hangē ko ia ‘okú ke sio ki ai ‘i he fakatātaá. Na‘a nau lī hifo ia, ‘o ne mate ai. Ko e ngata‘anga ia ‘o e Kuini kovi ‘aupito ko Sisipelí.