SIO kia Sāmiuela ‘okú ne lilingi ‘a e lolo ‘i he ‘ulu ‘o e tangatá ni. Ko e me‘a ‘eni na‘a nau fai ki ha tokotaha ke fakahā kuo ‘osi fili ia ke hoko ko e tu‘i. Na‘e tala ‘e Sihova kia Sāmiuela ke lilingi ha lolo ‘i he ‘ulu ‘o Saulá. Ko e lolo makehe ‘oku namu-lelei.

Na‘e fakakaukau ‘a Saula ‘oku ‘ikai ke fe‘unga ia ke hoko ko ha tu‘i. Na‘á ne tala kia Sāmiuela: ‘ ‘Oku ou kau ki he matakali ‘o Penisimaní, ko e si‘isi‘i taha ia ‘i ‘Isileli. Ko e hā ‘okú ke pehē ai te u hoko ko e tu‘í?’ Na‘e sai‘ia ‘a Sihova ‘ia Saula koe‘uhi he na‘e ‘ikai te ne fakangalingali ko e lahi ia pe ko ha tokotaha mahu‘inga. Ko hono ‘uhinga ia na‘á Ne fili ai ia ko e tu‘í.

Ka ko Saulá na‘e ‘ikai ke masiva pe ko ha tangata si‘isi‘i ia. Na‘e tupu ia mei ha fāmili koloa‘ia pea ko ha tangata lōloa mo talavou ia. Na‘á ne lōloa‘aki ‘a e fute ‘e taha ‘i ha taha pē ‘i ‘Isileli! Ko Saulá ko e tokotaha na‘e ve‘e vave ‘aupito, pea ko e tangata ivi lahi. Na‘e fiefia ‘a e kakaí ‘i hono fili ‘e Sihova ‘a Saula ko e tu‘í. Na‘a nau kaila kotoa: ‘⁠Ke mo‘ui fuoloa ‘a e tu‘i!’

Na‘e fu‘u mālohi ‘aupito ‘a e ngaahi fili ‘o e kau ‘Isilelí. Na‘a nau kei fakatupu ha faingata‘a‘ia lahi ki he kau ‘Isilelí. Taimi nounou pē mei hono fakanofo tu‘i ‘o Saulá, na‘e ha‘u ‘a e kau ‘Āmoní ke tau mo kinautolu. Ka na‘e tānaki ‘e Saula ha kau tau tokolahi, pea na‘á ne ikuna ‘a e kau ‘Āmoní. Na‘e ‘ai ‘e he me‘á ni ke fiefia ‘a e kakaí ‘i he hoko ‘a Saula ko e tu‘í.

‘I he faai mai ‘a e ngaahi ta‘u, na‘e taki ‘e Saula ‘a e kau ‘Isilelí ‘o lahi ‘enau ikuna‘i honau ngaahi filí. Na‘e ‘i ai foki mo e foha loto-to‘a ‘o Saula ko Sionatane. Pea na‘e tokoni ‘a Sionatane ki he kau ‘Isilelí ‘o nau ikuna‘i ai ‘a e ngaahi tau lahi. Na‘e kei hoko pē ‘a e kau Filisitiá ko e fili kovi taha ia ‘o e kau ‘Isilelí. ‘I he ‘aho ‘e taha na‘e ha‘u ha kau Filisitia ‘e laui afe ke faitau mo e kau ‘Isilelí.

Na‘e fakahā ‘e Sāmiuela kia Saula ke tatali kae‘oua ke ne ha‘u ‘o fai ha feilaulau, pe me‘a‘ofa, kia Sihova. Ka na‘e tuai mai ‘a Sāmiuela. Na‘e ilifia ‘a Saula na‘a kamata ‘a e taú ‘e he kau Filisitiá, ko ia na‘á ne fai leva ‘e ia ‘a e feilaulau. ‘I he taimi na‘e toki ha‘u ai ‘a Sāmiuelá, na‘á ne tala ange kia Saula kuó ne talangata‘a. Na‘e pehē ange ‘e Sāmiuela: ‘ ‘E fili ‘e Sihova ha tangata kehe ke tu‘i ki ‘Isileli.’

Ki mui ai na‘e toe talangata‘a ‘a Saula. Ko ia na‘e fakahā ki ai ‘e Sāmiuela: ‘ ‘Oku lelei ange ke talangofua kia Sihova ‘i ha foaki ha me‘a‘ofa kiate ia ‘aki ‘a e sipi lelei tahá. Koe‘uhi ko ho‘o talangata‘a kia Sihová, he‘ikai ke kei tuku koe ‘e Sihova ke ke tu‘i ki ‘Isileli.’

‘Oku tau ako ha me‘a lelei mei heni. ‘Oku fakahā heni ‘a hono mahu‘inga ke talangofua ma‘u pē kia Sihová. ‘Oku toe fakahā heni ‘e lava pē ke liliu ‘o hoko ‘o kovi ha tangata na‘e lelei ‘o hangē pē ko Saulá. ‘Oku ‘ikai ‘aupito te tau fiema‘u ke tau hoko ‘o kovi, ‘ikai ko ia?