‘OKÚ KE ‘ilo pe ko hai ‘a e kau tangata ko ‘ení pea ko e hā ‘enau me‘a ‘oku faí? ‘Oku nau ‘alu atu ki he tau, pea ko e kau tangata ‘i mu‘á ‘oku nau hiva. Ka mahalo te ke ‘eke: ‘⁠Ko e hā ‘oku ‘ikai ke ‘i ai ai ha ngaahi heletā mo ha ngaahi tao ‘a e kau hivá ke nau tau‘aki?’ Ka tau vakai ange.

Ko Sihosafaté ko e tu‘i ia ‘o e pule‘anga matakali ‘e ua ‘o ‘Isilelí. Na‘e mo‘ui ‘i he taimi tatau mo e Tu‘i ko ‘Ēhapi mo Sisipeli ‘o e pule‘anga matakali ‘e 10 ‘i he tokelaú. Ka ko e tu‘i lelei ‘a Sihosafate, pea ko ‘ene tamai ko ‘Asa ko e tu‘i lelei mo ia foki. Ko ia ‘i he ngaahi ta‘u lahi ko e kakai ‘o e pule‘anga matakali ‘e ua ‘i he tongá na‘a nau ma‘u ha mo‘ui lelei.

Ka na‘e toki hoko ha me‘a na‘e ‘ai ai ‘a e kakaí ke nau ilifia. Na‘e fakahā ‘e ha kau talafekau kia Sihosafate ‘o pehē: ‘ ‘Oku ha‘u ha fu‘u kau tau mei he ngaahi fonua ‘o Mōape, ‘Āmoni mo e Mo‘unga Sēiá ke ‘ohofi kimoutolu.’ Na‘e tokolahi ‘a e kau ‘Isileli na‘e fakatahataha ki Selusalema ke kumi ki ha tokoni ‘a Sihova. Na‘a nau ‘alu ki he temipalé, pea lotu ai ‘a Sihosafate: ‘ ‘E Sihova ko homau ‘Otua, ‘oku ‘ikai te mau ‘ilo pe ko e hā ‘a e me‘a te mau fai. He‘ikai te mau lava‘i ‘a e fu‘u kau tau ko ‘ení. ‘Oku mau hanga atu kiate koe ki ha tokoni.’

Na‘e fanongo mai ‘a Sihova, peá ne ‘ai ‘a e tokotaha ‘o ‘ene kau sevānití ke tala ki he kakaí: ‘ ‘Oku ‘ikai ke ‘amoutolu ‘a e taú, ka ‘oku ‘a e ‘Otuá. ‘E ‘ikai fiema‘u ke mou tau. Mou mamata pē, mo vakai ki he anga hono fakahaofi kimoutolu ‘e Sihová.’

Ko ia ‘i he pongipongi hono hokó na‘e tala ‘e Sihosafate ki he kakaí: ‘⁠Mou falala kia Sihova!’ Na‘á ne fokotu‘u leva ‘a e kau hiva ‘i mu‘a ‘i he‘ene kau sōtiá, pea ‘i he‘enau laká na‘a nau hiva fakamālō kia Sihova. ‘Okú ke ‘ilo ‘a e me‘a na‘e hoko ‘i he‘enau ofi atu ki he taú? Na‘e ‘ai ‘e Sihova ‘a e kau sōtia ‘a e filí ke nau fetau‘aki pē ‘iate kinautolu. Pea ‘i he a‘u atu ‘a e kau ‘Isilelí, kuo mate hono kotoa ‘a e kau sōtia ‘a e filí!

‘Ikai na‘e poto ‘a Sihosafate ‘i he‘ene falala kia Sihová? Te tau poto ‘o kapau te tau falala kiate Ia foki.