‘I HE ‘aho ‘e taha na‘e tala ange ai ‘e Sīsū ki ha tangata ‘oku totonu ke ne ‘ofa ki hono kaungā‘apí. Na‘e ‘eke ‘e he tangata kia Sīsū: ‘⁠Ko hai hoku kaungā‘apí?’ Na‘e ‘ilo ‘e Sīsū ‘a e fakakaukau ‘a e tangata ko ‘ení. Na‘e fakakaukau ‘a e tangatá ko e kakai pē ‘o hono matakalí mo e lotu ‘okú ne kau ki aí ko hono ngaahi kaungā‘apí pē ia. Ko ia tau sio ange pe ko e hā na‘e tala ange ‘e Sīsū kiate iá.

‘I he taimi ‘e ni‘ihi na‘e faiako ‘a Sīsū ‘aki ha‘ane fai ha talanoa. Ko e me‘a ia na‘á ne fai ‘i he taimi ko ení. Na‘á ne fai ha talanoa ‘o kau ki ha Siu mo ha Samēlia. Kuo tau ‘osi ako ‘o ‘ilo na‘e ‘ikai ke sai‘ia ‘a e tokolahi taha ‘o e kau Siú ‘i he kau Samēliá. Sai, ko e talanoa ‘eni ‘a Sīsuú:

‘I he ‘aho ‘e taha na‘e ‘i ai ha tangata Siu na‘e ‘alu hifo ‘i he hala ‘i he mo‘ungá ki Sielikō. Ka na‘e ‘ohofi ia ‘e ha kau kaiha‘a. Na‘a nau to‘o ‘ene pa‘angá mo taa‘i ia ‘o ne meimei mate.

Ki mui mai ai, na‘e ha‘u ha taula‘eiki Siu ‘i he halá. Na‘á ne sio ki he tangata kuo ‘osi hono taa‘í. ‘Okú ke fakakaukau, ko e hā ‘a e me‘a na‘á ne faí? Na‘á ne ‘alu pē ia ki he tafa‘aki ‘e taha ‘o e halá ‘o hoko atu ai ‘a ‘ene fonongá. Pea na‘e toe ha‘u mo ha tokotaha lotu ‘e taha. Ko ha Līvai ia. Na‘á ne tu‘u? ‘Ikai, na‘e ‘ikai te ne tu‘u foki mo ia ke tokoni ki he tangata kuo ‘osi hono taa‘í. ‘Oku lava ke ke sio ki he taula‘eikí mo e Līvaí ‘okú na fononga atu ‘i he halá.

Ka ke sio ange ki he tokotaha ko ‘ení mo e tangata kuo ‘osi hono taa‘í. Ko ha tokotaha Samēlia ia. Pea ‘okú ne tokoni ki he Siú. Na‘á ne ‘ai ‘a e faito‘o ki hono ngaahi laveá. ‘I he ‘osi ko iá, na‘á ne ‘ave ‘a e Siú ki ha feitu‘u ‘a ia na‘e lava ke ne mālōlō ai kae‘oua ke sai.

‘I he ‘osi ‘a e talanoa ‘a Sīsuú, na‘á ne pehē ki he tangata na‘á ne ‘eke kiate ia ‘a e fehu‘í: ‘⁠Ko hai ‘i he toko tolu ko ‘ení ‘okú ke fakakaukau na‘á ne fai ‘o hangē ha kaungā‘api ki he tangata na‘e taa‘í? Ko e taula‘eikí, pe ko e Līvaí pe ko e Samēliá?

Na‘e tali ange ‘e he tangatá: ‘⁠Ko e tangata Samēliá. Na‘á ne fai ‘ofa ki he tangata na‘e taa‘í.’

Na‘e pehē ange ‘e Sīsū: ‘ ‘Okú ke tonu. Ko ia ‘alu mo fai pehē ki he ni‘ihi kehé ‘o hangē ko ‘ene faí.’

‘Ikai ‘okú ke sai‘ia ‘i he founga faiako ‘a Sīsuú? ‘Oku lava ke tau ako ‘a e ngaahi me‘a mahu‘inga lahi ‘aupito ‘o kapau te tau fakaongo ki he me‘a na‘e lea‘aki ‘e Sīsū ‘i he Tohitapú, ‘ikai ko ia?