•  Lea Kamata 2

•  Koloa mei he Folofola ʻa e ʻOtuá 3-5

  •  Malanga 3

  •  Makakoloa Fakalaumālie 4

  •  Lau Tohi Tapu 5

•  Tokangataha ki he Ngāue Fakamalangá 6-14

  •  Kamataʻi ha Fetalanoaʻaki 7

  •  Toe Foki 8

  •  Ngaohi Ākonga 9

  •  Fakamatalaʻi Hoʻo Tuí 10

  •  Malanga 11

  •  Kaveinga 12

  •  ʻĀtakaí 13

  •  Ngāueʻaki ʻa e Ngaahi Vitiō mo e Tohí 14

•  Moʻui ko ha Kalisitiane 15-16

  •  Ako Tohi Tapu ʻa e Fakatahaʻangá 16

•  Lea Fakaʻosi 17

•  Fakaongoongolelei mo e Akonaki 18

•  Taimi 19

•  ʻAʻahi ʻa e ʻOvasia Sēketí 20

•  Uike ʻo e ʻAsemipilií pe Fakataha-Lahí 21

•  Uike ʻo e Fakamanatú 22

•  ʻOvasia ʻo e Fakataha ki he Moʻuí mo e Ngāue Fakafaifekaú 23

•  Sea ʻo e Fakataha ki he Moʻuí mo e Ngāue Fakafaifekaú 24

•  Tokotaha Faiakonaki Tokoní 25

•  Holo Hono Ua 26

•  Ngaahi Vitiō 27

1. Ko e ngaahi fakahinohino ko ení ʻe tokoni ia ki he tokotaha kotoa ʻoku ʻi ai haʻane konga ʻi he fakataha Ko ʻEtau Moʻui Faka-Kalisitiané mo e Ngāue Fakafaifekaú. Ki muʻa ke teuteu ʻenau kongá, ʻoku totonu ke nau fakamanatu ʻa e ngaahi fakahinohino ki heʻenau kongá ʻo fakatatau ki he fakamatala ʻoku hā ʻi he Polokalama Ngāue ki he Fakataha Moʻuí mo e Ngāue Fakafaifekaú mo fakatatau ki he ngaahi fakahinohino ko ení. ʻOku totonu ke fakaafeʻi ʻa e kotoa ʻo e kau malangá ke fakafaingamālieʻi kinautolu ke nau fakahoko ʻa e ngaahi konga ki he kau akó. ʻE kau nai ki ai mo e niʻihi ʻoku nau feohi longomoʻui mo e fakatahaʻangá kapau ʻoku nau loto-tatau mo e ngaahi akonaki ʻa e Tohi Tapú pea ʻoku fehoanaki ʻenau moʻuí mo e ngaahi tefitoʻi moʻoni faka-Kalisitiané. Ko e ʻovasia ʻo e Fakataha ki he Moʻuí mo e Ngāue Fakafaifekaú ʻoku totonu ke ne lāulea ki he ngaahi fiemaʻu ke hū ki he akó mo ha tokotaha pē ʻoku ʻikai ko ha tokotaha malanga ka ʻokú ne holi ke hū ʻo kau ʻi he akó, pea tala ange leva ki he tokotahá pe ʻokú ne taau. ʻOku totonu ke fai eni ʻi he ʻi ai ʻa e tokotaha ʻoku ako Tohi Tapu mo iá (pe ʻi he ʻi ai ha mātuʻa tauhi fānau ʻoku tui). Ko e ngaahi fiemaʻú ʻoku tatau pē ia mo e ngaahi fiemaʻu ki ha tokotaha ke hoko ko ha tokotaha malanga teʻeki papitaiso.—od vahe 8 pal. 8.

2. Miniti ʻe taha. ʻI he uike taki taha, hili ha hiva kamata mo e lotu, ko e sea ʻo e Fakataha ki he Moʻui mo e Ngāue Fakafaifekaú te ne fakatupulekina ha fakatuʻamelie atu ki he polokalamá. Ko e seá ʻoku totonu ke ne tokangataha ki he ngaahi poini ʻe ʻaonga taha ki he fakatahaʻangá.

 3. Malanga: Miniti ʻe hongofulu. Ko e kaveingá mo ha ʻautilaine ʻo ha poini tefito ʻe ua pe tolu, ʻoku ʻomai ia ʻi he Polokalama Ngāue ki he Fakataha Moʻuí mo e Ngāue Fakafaifekaú. Ko e malanga ko ení ʻe vaheʻi ia ki ha mātuʻa pe ko ha sevāniti fakafaifekau taau. ʻI he taimi ʻoku fakataimitēpileʻi foʻou ai ha tohi Tohi Tapu ʻi he lau Tohi Tapu fakauiké, ʻe huluʻi ha vitiō talateu ʻo e tohi ko iá. ʻE fakafehoanaki nai ʻe he tokotaha ʻokú ne fai ʻa e malangá ʻa e vitioó mo e kaveingá. Kae kehe, ʻoku totonu ke ne fakapapauʻi ke lave ki he ngaahi poini ʻoku hā ʻi he polokalama ngāué. Pehē foki, fakatatau ki he taimí, ʻoku totonu ke ne ngāueleleiʻaki ʻa e ngaahi taá ʻa ia ʻoku fakataumuʻa ke tokoni ke mahinoʻi ʻa e fakamatala ʻe lāulea ki aí. ʻE lava ke ne toe fakakau ki ai mo ha ngaahi maʻuʻanga fakamatala kehe ʻo kapau pē ʻe tokoni ia ke fakatupulekina ʻa e ngaahi poini ʻi he kupu ko iá.

 4. Makakoloa Fakalaumālie: Miniti ʻe hongofulu. Ko ha konga fehuʻi mo e tali eni ʻoku ʻikai fiemaʻu ki ai ha talateu pe fakamulituku. ʻOku totonu ke fakahoko eni ʻe ha mātuʻa pe ko ha sevāniti fakafaifekau taau. Ko e tokotaha ʻokú ne fai ʻa e kongá ʻoku totonu ke ne ʻeke ʻa e ongo fehuʻí ki he kau fanongó. Pehē foki, te ne fili nai pe ʻe lau pe ʻikai ʻa e veesi ʻi he ʻuluaki fehuʻí. Ko e faʻahinga ʻe talí ʻoku totonu ke nau tali ʻi he sekoni ʻe 30 pe siʻi ai.

 5. Lau Tohi Tapu: Miniti ʻe fā. ʻE vaheʻi ʻa e konga ko ení ki ha tokotaha ako ko ha tangata. ʻOku totonu ke lau ʻe he tokotaha akó ʻa e fakamatala ʻoku vaheʻi atú ʻo ʻikai fai ha talateu pe ko ha fakamulituku. Ko e sea ʻo e fakatahá te ne tokanga tefito ki hono tokoniʻi ʻa e kau akó ke nau lau tonu matematē, mahino, pōtoʻi lea, fakamamafaʻi totonu, fetūkuaki ʻo e leʻó, mālōlō feʻungamālie mo fakanatula. Koeʻuhi ko e lau Tohi Tapu ʻe niʻihi ʻoku nounou ange pea lōloa ange ʻa e niʻihi, ko e ʻovasia ʻo e Fakataha ki he Moʻui mo e Ngāue Fakafaifekaú ʻoku totonu ke ne fakakaukau ki he malava ʻa e tokotaha akó ʻi hono vaheʻi ʻa e ngaahi kongá.

6. Miniti ʻe 15. Ko e konga ko eni ʻo e fakatahá ʻoku fokotuʻutuʻu ia ke ʻoatu ki he tokotaha kotoa ʻa e faingamālie ke nau teuteu ki he ngāue fakamalangá pea ke fakaleleiʻi ʻenau pōtoʻi ʻi he fetalanoaʻakí mo e malava ke malanga mo faiakó. ʻO ka fiemaʻu, ʻe kau nai ʻa e kau mātuʻá ʻi he akó. Ko e tokotaha ako taki taha ʻoku totonu ke ne ngāue ki he poini ako mei he polosiua Faiakó pe ʻOfa ki he Kakaí ʻa ia ʻoku haʻi ʻi he tafaʻaki ʻo e kongá ʻi he Polokalama Ngāue ki he Fakataha Moʻuí mo e Ngāue Fakafaifekaú. ʻI he taimi ʻe niʻihi, ʻe ʻi ai ha konga ko ha fetalanoaʻaki. ʻOku totonu ke fakahoko eni ʻe ha mātuʻa pe ko ha sevāniti fakafaifekau taau.—Sio ki he  palakalafi 15 ki he founga ke fakahokoʻaki ʻa e ngaahi konga ʻoku fetalanoaʻakí.

 7. Kamataʻi ha Fetalanoaʻaki: Ko e konga ko ení ʻe vaheʻi nai ia ki ha tokotaha ako ko ha tangata pe fefine. ʻOku totonu ko e tokotaha tokoní ko e tangata kapau ko ha tangata, pe fefine kapau ko ha fefine, pe ko ha mēmipa ʻi hono fāmilí. Ko e tokotaha akó mo e tokotaha tokoní ʻe lava nai ke na tangutu pe tuʻu. Ki ha fakamatala lahi ange fekauʻaki mo e kaveinga ke lāulea ki aí pe ko e ʻātakai ʻe fakahoko ai ʻa e konga ko ení, sio ki he  palakalafi 12 mo e  13.

 8. Toe Foki: Ko e konga ko ení ʻe vaheʻi nai ia ki ha tokotaha ako ko ha tangata pe fefine. ʻOku totonu ko e tokotaha tokoní ko e tangata kapau ko ha tangata, pe fefine kapau ko ha fefine. (km 5/97 p. 3) Ko e tokotaha akó mo e tokotaha tokoní ʻe lava nai ke na tangutu pe tuʻu. ʻOku totonu ke fakahāhaaʻi ʻe he tokotaha akó ʻa e meʻa ke leaʻaki ʻi he taimi ʻoku toe foki ai ʻo hoko atu ha fetalanoaʻaki ki muʻa. Ki ha fakamatala lahi ange fekauʻaki mo e kaveinga ke lāulea ki aí pe ko e ʻātakai ʻe fakahoko ai ʻa e konga ko ení, sio ki he  palakalafi 12 mo e  13.

 9. Ngaohi Ākonga: Ko e konga ko ení ʻe vaheʻi nai ia ki ha tokotaha ako ko ha tangata pe fefine. ʻOku totonu ko e tokotaha tokoní ko e tangata kapau ko ha tangata, pe fefine kapau ko ha fefine. (km 5/97 p. 3) Ko e tokotaha akó mo e tokotaha tokoní ʻe lava nai ke na tangutu pe tuʻu. ʻOku totonu ke fakahāhaaʻi ʻi he konga ko ení ha kiʻi konga ʻo ha ako Tohi Tapu kuo ʻosi fakahoko. ʻOku ʻikai fiemaʻu ha talateu pe ko ha fakamulituku tuku kehe kapau ko e meʻa ia ʻoku ngāue ki ai ʻa e tokotaha akó. ʻOku ʻikai ke fiemaʻu ia ke lau leʻo-lahi ʻa e kotoa ʻo e fakamatalá, neongo ʻe lava ke fai pehē.

 10. Fakamatalaʻi Hoʻo Tuí: Kapau ko e kongá ko ha malanga, ʻoku totonu ke vaheʻi ia ki ha tokotaha ako ko ha tangata. Kapau ko e kongá ko ha fakahāhā, ʻe vaheʻi nai ia ki ha tokotaha ako ko ha tangata pe fefine. ʻOku totonu ko e tokotaha tokoní ko e tangata kapau ko ha tangata, pe fefine kapau ko ha fefine, pe ko ha mēmipa ʻi hono fāmilí. ʻOku totonu ke ʻomai ʻe he tokotaha akó ha tali māʻalaʻala mo fakapotopoto ki he fehuʻi ʻi he kaveingá ʻo ngāueʻaki ʻa e fakamatala ʻi he maʻuʻanga fakamatala kuo tokonakí. ʻE fili nai ʻa e tokotaha akó pe te ne lave ki he maʻuʻanga fakamatala ʻoku toʻo mei ai ʻa e fakamatalá ʻi he lolotonga ʻene kongá pe ʻikai.

 11. Malanga: Ko e konga ko ení ʻe vaheʻi ia ki ha tokotaha ako ko ha tangata pea ʻe fakahoko ia ko ha malanga ki he fakatahaʻangá. ʻI he taimi ʻoku fakatefito ai ʻa e malangá ʻi ha poini mei he fakamatala fakalahi A ʻo e polosiua ʻOfa ki he Kakaí, ʻoku totonu ke fakamamafaʻi ʻe he tokotaha akó ʻa e founga ʻe lava ke ngāueʻaki ai ʻa e konga Tohi Tapú ʻi he ngāue fakamalangá. Ko e fakatātaá, ʻe lava nai ke ne fakamatalaʻi ʻa e taimi ke ngāueʻaki ai ʻa e konga Tohi Tapú, ko e ʻuhinga ʻo e konga Tohi Tapú, pea mo e founga ke fakaʻuhinga ai mo ha tokotaha ʻi he konga Tohi Tapú. ʻI he taimi ʻoku fakatefito ai ʻa e malangá ʻi ha poini mei he taha ʻo e ngaahi lēsoni ʻi he polosiua ʻOfa ki he Kakaí, ʻoku totonu ke tokangataha ʻa e tokotaha akó ki he founga ke ngāueʻaki ai ʻa e poini ko iá ʻi he ngāue fakamalangá. Te ne fakamamafaʻi nai ʻa e faʻifaʻitakiʻanga ʻoku hā ʻi he poini 1 ʻo e lēsoní pe fakamamafaʻi ha niʻihi ʻo e ngaahi veesi tānaki ʻoku fakakau ʻi he lēsoní, ʻo kapau ʻe tokoni.

   12. Kaveinga: Ko e fakamatala ʻi he palakalafi ko ení pea mo e palakalafi hokó ʻoku ngāueʻaki ia ki he konga “Kamataʻi ha Fetalanoaʻaki” mo e “Toe Foki”. Tuku kehe ka toki fakahaaʻi atu, ko e taumuʻa ʻa e tokotaha akó ke vahevahe ha moʻoni Fakatohitapu faingofua ʻa ia ʻoku feʻungamālie ki he tokotaha ʻokú ne talanoa mo iá pea ke fakatoka ʻa e makatuʻunga ki ha fetalanoaʻaki ʻi he kahaʻú. ʻOku totonu ke fili ʻe he tokotaha akó ha kaveinga ʻoku taimi totonu mo ola lelei ki he tuʻunga fakalotofonuá. Te ne fili nai pe te ne tuʻuaki ha tohi pe vitiō mei heʻetau Puha Meʻangāue Fakafaiakó pe ʻikai. ʻOku totonu ke ngāueʻaki ʻe he kau akó ʻa e pōtoʻi ʻi he fetalanoaʻakí, hangē ko hono fakahāhā ʻa e mahuʻingaʻia fakafoʻituituí mo e fakanatulá kae ʻikai ko hono fakahāhā ha tuʻuaki kuo ʻosi ako maʻuloto.

   13. ʻĀtakaí: ʻOku totonu ke ngāueʻaki ʻe he tokotaha akó ʻa e ʻātakai kuo vaheʻí ki he ngaahi tuʻunga fakalotofonuá. Ko e fakatātaá:

1.  (1) Fale ki he Fale: ʻOku kau ki heni ʻa e malanga mei he fale ki he falé—pe ʻoku fakahoko mata ki he mata, ʻi he telefoní, pe faitohi—pea toe foki ʻo muimuiʻi ha fetalanoaʻaki mo ha tokotaha naʻe maʻu ki muʻa ʻi he ngāue fakafaifekau fale-ki-he-falé.

2.  (2) Founga ʻIkai Anga-Maheni: ʻOku kau ki heni ʻa hono ngāueʻaongaʻaki ʻa e ngaahi faingamālie ke afeʻi ʻa e fetalanoaʻaki anga-mahení ki ha faifakamoʻoni. ʻE kau nai ki ai hono vahevahe ha fakakaukau Fakatohitapu ki he faʻahinga ʻoku ke fetaulaki mo ia ʻi he ngāueʻangá, ʻi he ʻapiakó, ʻi ho kaungāʻapí, ʻi ha meʻalele uta pāsese, pe ʻi ha feituʻu pē lolotonga hoʻo ngaahi ngāue fakaʻahó.

3.  (3) ʻI he Feituʻu Kakaí: ʻE kau nai ki heni ʻa e faifakamoʻoni ʻi he papá, malanga ki he kakai ʻi he ngaahi feituʻu pisinisí, faifakamoʻoni ʻi he halá, pe faifakamoʻoni ʻi he ngaahi paʻaké, tauʻanga meʻalelé, pe ko ha feituʻu pē ʻe maʻu ai ʻa e kakaí.

 14. Ngāueʻaki ʻa e Ngaahi Vitiō mo e Tohí: ʻE fili nai ha tokotaha ako ke tuʻuaki ha vitiō pe ko ha tohi ʻo fakatatau pē ki he tuʻungá. Kapau ko e konga ʻa e tokotaha akó ʻoku fakakau ai ha vitiō pe kapau ʻoku fili ʻa e tokotaha akó ke tuʻuaki ha vitiō, ʻoku totonu ke ne fakaʻaliʻali ʻa e vitioó pea fetalanoaʻaki ai kae ʻoua ʻe huluʻi.

15. Hili ha hiva, ko e miniti ʻe 15 hoko ʻo e konga ko ení ʻe ʻi ai ʻa e konga ʻe taha pe ua ʻoku fokotuʻutuʻu ke tokoniʻi ʻa e kau fanongó ke nau ngāueʻaki ʻa e Folofola ʻa e ʻOtuá. Tuku kehe ka toki fakahaaʻi atu, ʻe vaheʻi nai ʻa e ngaahi konga ko ení ki he kau mātuʻá pe ki he kau sevāniti fakafaifekau tāú, ka ko e konga ki he fiemaʻu fakalotofonuá, ʻoku totonu ke fai ia ʻe ha mātuʻa. Kapau ko e kongá ko ha fetalanoaʻaki, ko e tokotaha ʻokú ne fakahoko ʻa e kongá ʻe lava ke ne ʻeke ha ngaahi fehuʻi kehe lolotonga ʻa e kongá ʻo tānaki ki he ngaahi fehuʻi kuo ʻomaí. ʻOku totonu ke nounou pē ʻene talateú ke fakaʻatā ha taimi feʻunga ke lāulea ai ki he ngaahi poini tefitó pea tali mo e kau fanongó. Kapau ʻoku ʻi ai ha fakaʻekeʻeke, ʻoku lelei ange ke fakaʻekeʻeke ʻa e tokotahá mei he siteisí kae ʻikai fakaʻekeʻeke mei hono nofoʻangá, kapau ʻoku malava.

  16. Ako Tohi Tapu ʻa e Fakatahaʻangá: Miniti ʻe 30. Ko e konga ko ení ʻe vaheʻi nai ia ki ha mātuʻa taau. (Kapau ʻoku tokosiʻi ʻa e kau mātuʻá ʻe ngāueʻaki nai ʻa e kau sevāniti fakafaifekau tāú.) Ko e kulupu ʻo e kau mātuʻá ʻoku totonu ke nau fakapapauʻi ʻa e faʻahinga ko ia ʻoku taau ke nau tataki ʻa e Ako Tohi Tapu ʻa e Fakatahaʻangá. Ko e faʻahinga taau ko ení ʻoku totonu ke nau maʻu ʻa e malava ke tataki lelei pea ʻi ha founga mohu ʻuhinga ʻa e akó koeʻuhí ke tauhi ʻa e taimí, fakamamafaʻi ʻa e ngaahi konga Tohi Tapu tefitó, pea tokoniʻi ʻa e tokotaha kotoa ke nau mahinoʻi ʻa e ngaahi poini ʻaonga naʻe fai ki ai ʻa e lāuleá. Te nau maʻu ʻaonga ʻi heʻenau toe fakamanatu ʻa e fakahinohino ki he founga hono tataki ʻa e ngaahi konga fehuʻi mo e talí. (w23.04 p. 24, puha) Hili hono ʻosiki fakalelei ʻa e fakamatala naʻe vaheʻí, ʻoku ʻikai fiemaʻu ke toe fakalōloa e akó. Kapau ʻe malava, ʻoku totonu ke ngāueʻaki ha kau faiako mo ha kau lautohi kehekehe ʻi he uike taki taha. Kapau ʻe fiemaʻu ʻe he sea ʻo e Fakataha ki he Moʻuí mo e Ngāue Fakafaifekaú ke fakanounouʻi ʻa e akó, ʻe fiemaʻu ki he faiakó ke ne fili ʻa e founga ke fakanounouʻi ai ʻa e akó. Te ne fili nai ke ʻoua ʻe lau ha ngaahi palakalafi ʻe niʻihi.

17. Miniti ʻe tolu. Ko e sea ʻo e Fakataha ki he Moʻuí mo e Ngāue Fakafaifekaú te ne fakamanatu ʻa e ngaahi poini mātuʻaki ʻaonga mei he fakatahá. ʻOku totonu ke ne toe lave ki he fakamatala ʻo e uike hokó. Te ne fanongonongo nai ʻa e hingoa ʻo e kau ako ʻoku vaheʻi ke nau fai ʻa e ngaahi konga ʻi he uike hono hokó, ʻo kapau ʻoku kei toe ʻa e taimí. Tuku kehe ka toki fakahaaʻi atu, ka ʻi ai ha fanongonongo pe ngaahi tohi ʻoku mahuʻinga ʻoku totonu ke lau ia ki he fakatahaʻangá ʻe he seá ʻi he lolotonga ʻene lea fakaʻosí. Ko e fanongonongo anga-maheni hangē ko e fokotuʻutuʻu ki he ngāue fakamalangá mo e taimi-tēpile fakamaʻa holó, ʻoku ʻikai totonu ke fanongonongo ia mei he peletifōmú ka ʻoku totonu ke fakapipiki ia ʻi he papa fakahinohinó. Kapau ʻoku ʻikai lava ha fanongonongo pe ko ha tohi ke lau ko e siʻi ʻa e taimi ʻi he lea fakaʻosi ʻa e seá, ʻoku totonu ke kole ʻe he seá ki he fanga tokoua ʻoku nau fai ʻa e ngaahi konga ʻi he Moʻui ko ha Kalisitiané ke fakanounou ʻenau ngaahi kongá ʻo ka fiemaʻu. (Sio ki he  palakalafi 16 mo e  19.) ʻE fakaʻosi ʻa e fakatahá ʻaki ʻa e hiva mo e lotu.

18. Hili ʻa e konga taki taha ʻa e kau akó, ʻe maʻu nai ʻe he sea ʻo e Fakataha ki he Moʻuí mo e Ngāue Fakafaifekaú ha miniti ʻe taha ke fakaongoongoleleiʻi mo fai ha akonaki ʻo makatuʻunga ʻi he poini ako kuo vaheʻí. ʻI hono fakafeʻiloaki ʻe he seá ha konga ʻa ha tokotaha ako, heʻikai te ne fakahaaʻi mai ʻa e poini akó. Kae kehe, ʻi he ʻosi ʻa e konga ʻa e tokotaha akó, pea ʻi he hili ha fakaongoongolelei feʻungamālie, ʻe fakahaaʻi nai ʻe he seá ʻa e poini ako ʻoku ngāue ki ai ʻa e tokotaha akó pea fakahaaʻi ʻa e ʻuhinga mo e founga naʻe fakahoko lelei ai ʻe he tokotaha akó ʻa e poini ko iá pe fakamatalaʻi anga-ʻofa ange ʻa e ʻuhinga ʻoku totonu ki he tokotaha akó ke ne toe tokanga ange ai ki he meʻa naʻá ne ngāue ki aí. ʻE toe lave nai ʻa e tokotaha seá ki ha tafaʻaki kehe ʻo e fakahāhaá kapau ʻokú ne ongoʻi ʻe ʻaonga eni ki he tokotaha akó pe ko e kau fanongó. Ko ha toe akonaki fakatupu langa hake makatuʻunga ʻi he polosiua ʻOfa ki he Kakaí, ko e polosiua Faiakó pe tohi Ako Fakafaifekau, ʻe ʻoatu fakafoʻituitui nai ia ʻi he hili ʻa e fakatahá pe ko ha taimi kehe makatuʻunga ʻi he poini ako naʻe ngāue ki aí pē ko ha toe poini ako kehe.—Ki ha fakamatala lahi ange fekauʻaki mo e fatongia ʻo e sea ki he Fakataha ki he Moʻuí mo e Ngāue Fakafaifekaú pea mo e fatongia ʻo e tokotaha faiakonaki tokoní, sio ki he  palakalafi 19,  24 mo e  25.

19. ʻOku totonu ke ʻoua ʻe ʻovataimi ha konga, naʻa mo e poupou ʻa e sea ʻo e Fakataha ki he Moʻuí mo e Ngāue Fakafaifekaú. Neongo ko e Polokalama Ngāue ki he Fakataha Moʻuí mo e Ngāue Fakafaifekaú ʻoku fakahaaʻi pau mai ai ʻa e taimi ʻo e konga taki taha, kapau kuo ʻosi fakahoko kakato ʻa e kongá, ʻoku ʻikai fiemaʻu ia ke toe tānaki atu ha fakamatala koeʻuhí pē ke fakakakato ʻa e taimí. Kapau ʻe ʻovataimi ʻa e ngaahi konga ʻi he fakatahá, ʻoku totonu ke fai ʻe he sea ʻo e Fakataha ki he Moʻuí mo e Ngāue Fakafaifekaú pe ko e tokotaha faiakonaki tokoní ha akonaki fakafoʻituitui ki he tokotaha naʻe ʻovataimí. (Sio ki he  palakalafi 24 mo e  25.) Ko e fakatahá kotoa, kau ai ʻa e hivá mo e lotú, ʻoku totonu ke houa ʻe 1 mo e miniti ʻe 45.

20. ʻI he taimi ʻoku ʻaʻahi mai ai ʻa e ʻovasia sēketí ki he fakatahaʻangá, ʻoku totonu ke fai ʻa e polokalamá ʻo hangē ko ia ʻoku hā ʻi he Polokalama Ngāue ki he Fakataha Moʻuí mo e Ngāue Fakafaifekaú tuku kehe ʻa e meʻá ni: Ko e Ako Tohi Tapu ʻa e Fakatahaʻangá ʻi he konga Moʻui ko ha Kalisitiané ʻe fetongiʻaki ia ha malanga ngāue miniti ʻe 30 ʻe fai ʻe he ʻovasia sēketí. Ki muʻa ʻi he malanga ngāué, ʻe fakamanatu ʻe he sea ʻo e Fakataha ki he Moʻuí mo e Ngāue Fakafaifekaú ʻa e polokalama naʻe toki faí, lave nounou ki he polokalama ki he uike hono hokó, fai ha fanongonongo ʻoku fiemaʻu, lau ha tohi pē ʻoku fiemaʻu pea fakafeʻiloaki leva ʻa e ʻovasia sēketí. Hili ʻa e malanga ngāué, ʻe fakaʻosi ʻe he ʻovasia sēketí ʻa e fakatahá ʻaki ha hiva te ne fili. Te ne fili nai ha tokoua ke fakahoko ʻa e lotu fakaʻosí. ʻOku ʻikai totonu ke fai ha ako ʻi he holo hono uá ʻi he lea ʻa e fakatahaʻangá lolotonga ʻa e ʻaʻahi ʻa e ʻovasia sēketí. Ko ha kulupu ʻe lava nai ke fai ʻenau fakatahá lolotonga ʻa e ʻaʻahi ʻa e ʻovasia sēketí ki he fakatahaʻanga ʻoku nau talitali iá. Kae kehe, ʻoku totonu ki he kulupú ke nau kau fakataha mo e fakatahaʻanga ʻoku nau talitali ʻa e ʻovasia sēketí ʻi heʻene malanga ngāué.

21. Lolotonga ʻa e uike ʻo e ʻasemipilií pe ko ha fakataha-lahi, heʻikai ke fai ai ha fakataha ʻa e fakatahaʻangá. ʻOku totonu ke fakamanatu ki he fakatahaʻangá ko e fakamatala naʻe fakataimitēpileʻi ki he ngaahi fakataha he lolotonga ʻo e uike ko iá ʻoku totonu ke lāulea fakafoʻituitui ki ai pe fakafāmili.

22. ʻI he tō ʻa e Fakamanatú ʻi ha ʻaho lolotonga ʻa e uiké, ʻe ʻikai fakahoko ai ha Fakataha ki he Moʻuí mo e Ngāue Fakafaifekaú.

23. Ko ha mātuʻa naʻe fili ʻe he kulupu ʻo e kau mātuʻá ʻe hoko ko e ʻovasia ʻo e Fakataha ki he Moʻuí mo e Ngāue Fakafaifekaú. Ko hono fatongiá ke fakapapauʻi ʻoku fokotuʻutuʻu lelei ʻa e fakatahá ni pea fakahoko ʻo fakatatau ki he fakahinohino ko ení. ʻOku totonu ke ne fetuʻutaki lelei maʻu pē mo e tokotaha faiakonaki tokoní. ʻI hono ala maʻu pē ʻa e Polokalama Ngāue ki he Fakataha Moʻuí mo e Ngāue Fakafaifekaú, ʻe vahe ʻe he ʻovasia ʻo e Fakataha ki he Moʻuí mo e Ngāue Fakafaifekaú ʻa e ngaahi kongá kotoa ki he fakataha lolotonga e uiké ki he māhina ʻe ua ko iá. ʻOku kau ki heni hono vahe ʻa e ngaahi konga kehé pea mo e sea ki he fakataha lolotonga e uiké ki he faʻahinga kuo tali ʻe he kulupu ʻo e kau mātuʻá pea pehē foki ki he konga ʻa e kau akó. (Sio ki he  palakalafi 3-16 mo e  24.) ʻI hono vahe ʻa e ngaahi konga ʻa e kau akó, ʻoku totonu ke ne fakakaukau ki he taʻumotuʻa mo e taukei ʻa e tokotaha akó pea mo ʻene tauʻatāina ke lea fekauʻaki mo e fakamatala ʻoku lāulea ki aí. ʻOku totonu ke ne ngāueʻaki ʻa e fakafuofua tatau ʻi heʻene vahe ʻa e ngaahi konga kehe ʻo e fakatahá. Ko e konga ʻa e tokotaha taki taha ʻoku totonu ke tufa ʻi ha uike ʻe tolu ki muʻa ʻi he ʻaho ʻe fakahoko ai ʻa e kongá. Ko e foomu Ko ʻEtau Moʻui Faka-Kalisitiané mo e Ngāue Fakafaifekaú Konga ki he Fakatahá (S-89) ʻoku totonu ke ngāueʻaki ia ki he ngaahi konga ʻa e kau akó. Ko e ʻovasia ʻo e Fakataha ki he Moʻuí mo e Ngāue Fakafaifekaú ʻoku totonu ke ne fakapapauʻi ʻoku fakapipiki ha tatau ʻo e taimi-tēpile ki he konga ʻo e fakatahá kotoa ʻi he papa fakahinohinó. ʻE vaheʻi nai ʻe he kulupu ʻo e kau mātuʻá ha mātuʻa pe ko ha sevāniti fakafaifekau ke tokoni kiate ia. Kae kehe, ko e kau mātuʻá pē ʻoku totonu ke ngāueʻaki ke vahe ʻa e ngaahi konga ʻoku ʻikai vaheʻi ki he kau akó.

24. ʻI he uike taki taha, ʻe hoko ʻa e mātuʻa ʻe toko taha ko e sea ʻi he lolotonga ʻo e Fakataha ki he Moʻuí mo e Ngāue Fakafaifekaú. (Kapau ʻoku tokosiʻi ʻa e kau mātuʻá ʻe ngāueʻaki nai ʻa e kau sevāniti fakafaifekau tāú.) Ko hono fatongiá ke teuteu ʻa e talateú mo e lea fakaʻosí. Te ne toe fakafeʻiloaki ʻa e kongá kotoa, pea makatuʻunga ʻi he tokolahi ʻo e kulupu ʻo e kau mātuʻá, ko hono fatongiá nai ke toe fakahoko ha konga kehe ʻi he fakatahá, tautefito ki he ngaahi konga ʻoku huluʻi ai ha vitiō ʻo ʻikai fai ha lāulea ki ai. Ko e ngaahi fakamatala ʻi he hili ʻa e ngaahi konga taki taha ʻoku totonu ke nounou. ʻE fili ʻe he kulupu ʻo e kau mātuʻá pe ko hai ʻa e kau mātuʻa ʻoku taau ke nau fakahoko ʻa e fatongia ko ení pea mei he taimi ki he taimi ʻe vaheʻi ʻa e kau mātuʻa tāú ko eni ke sea. Makatuʻunga ʻi he ngaahi tuʻunga fakalotofonuá, ko e ʻovasia ki he Fakataha ki he Moʻuí mo e Ngāue Fakafaifekaú ʻe ngāueʻaki lahi ange ia ke ne hoko ko e sea ʻi he toenga ʻo e kau mātuʻa taau kehé. Kapau ʻoku taau ha mātuʻa ke ne fai ʻa e Ako Tohi Tapu ʻa e Fakatahaʻangá, ngalingali te ne taau ke hoko ko e sea ʻo e fakatahá. Kae kehe, kātaki ʻo manatuʻi, ko e mātuʻa ʻoku hoko ko e seá ʻoku fiemaʻu ke ne fai ha fakaongoongoleleiʻi anga-ʻofa mo ʻaonga pea, ʻo ka fiemaʻu, te ne fai ha akonaki ki he faʻahinga ʻoku ʻi ai ʻenau ngaahi konga ʻi he akó. Ko e toe fatongia ia ʻo e seá ke fakapapauʻi ʻoku ʻosi taimi totonu ʻa e fakatahá. (Sio ki he  palakalafi 17 mo e  19.) Kapau ʻoku fiemaʻu ʻe he seá pea kapau ʻoku ʻatā pē ʻa e peletifōmú, ʻe fokotuʻu nai ʻi ai ha tuʻuʻanga maika koeʻuhí ke ne fakafeʻiloaki mai ai ʻa e konga taki taha lolotonga iá ko e tokoua ʻokú ne fai ʻene kongá ʻoku tuʻu ia ʻi he maika he tuʻunga malangá. Pehē foki, ʻe fiemaʻu nai ʻe he tokotaha-seá ke ne tangutu ʻi he siteisí ʻi haʻane tēpile lolotonga ʻa e konga lau Tohi Tapú mo e konga Tokangataha ki he Ngāue Fakamalangá. ʻE tokoni nai ia ke tauhi ʻa e taimí.

25. Kapau ʻe malava, ʻoku lelei ke ngāueʻaki ha mātuʻa ʻa ia ko ha tokotaha-malanga taukei ke ne fakahoko ʻa e fatongia ko ení. Ko e fatongia ʻo e tokotaha faiakonaki tokoní ko hono fai ha akonaki fakafoʻituitui ki he kau mātuʻá mo e kau sevāniti fakafaifekaú ʻo kapau ʻe fiemaʻu, ʻo fekauʻaki mo ha malanga naʻa nau fakahoko, kau ai ha ngaahi konga ʻi he Fakataha ki he Moʻuí mo e Ngāue Fakafaifekaú, malanga maʻá e kakaí, mo haʻanau tataki pe lautohi ʻi he Ako Taua Leʻo pe Ako Tohi Tapu ʻa e Fakatahaʻangá. (Sio ki he  palakalafi 19.) Kapau ʻoku tokolahi ʻa e kau mātuʻa ʻoku taukei ʻi he malangá mo e faiakó ʻi he fakatahaʻangá, ʻe lava ke nau fetongitongi ʻi heʻenau hoko ko ha tokotaha faiakonaki tokoni ʻi he taʻu taki taha. ʻOku ʻikai fiemaʻu ia ki he tokotaha faiakonaki tokoní ke ne fai ha akonaki hili ʻa e konga taki taha.

26. Makatuʻunga ʻi he tokolahi ʻa e kau akó, ʻe fakahoko nai ʻe he fakatahaʻangá ha ako ʻi he holo hono ua ki he ngaahi konga ʻa e tokotaha akó. Ko e ako ʻi he holo hono uá ʻoku totonu ke ʻi ai hano tokotaha faiakonaki taau, ko e lelei tahá kapau ko ha mātuʻa. Kapau ʻe fiemaʻu, ʻe vaheʻi nai eni ki ha sevāniti fakafaifekau mātuʻaki taau. ʻOku totonu ke fili ʻe he kulupu ʻo e kau mātuʻá ʻa e tokotaha ki he fatongia ko ení pea tatau ai pē pe ʻe fetongitongi ʻa e fatongiá. ʻOku totonu ke muimui ʻa e tokotaha faiakonakí ki he founga ʻoku fakamatalaʻi ʻi he  palakalafi 18. Kapau ʻoku ʻi ai ha ako ʻi he holo hono uá, ʻoku totonu ke kole ki he kau akó ke nau ʻalu ki he loki akó ʻi he hili ʻa e konga Keli ki he Makakoloa Fakalaumālié ʻi he konga Koloa mei he Folofola ʻa e ʻOtuá. ʻOku totonu ke nau foki ke kau fakataha mo e toenga ʻo e fakatahaʻangá ʻi he hili ʻa e konga fakaʻosi ʻi he akó.

27. ʻE ngāueʻaki ʻa e ngaahi vitiō kuo ʻosi filifili fekauʻaki mo e fakataha ko ení. Ko e ngaahi vitiō ki he fakataha lolotonga ʻo e uiké ʻoku ʻi he JW Library® pea ʻe ala maʻu ia ʻi hono ngāueʻaki ʻo e ngaahi meʻangāue fakaʻilekitulōnika kehekehe.

© 2023 Watch Tower Bible and Tract Society of Pennsylvania

S-38-TO 11/23