“Mahalo ko e tokolahi ʻo ʻetau kau lautohí ʻoku nau maheni mo ha faʻahinga ʻoku kui,” ko e lau ia ʻa e ʻīsiu ʻo e Watch Tower ʻo Sune 1, 1912. “ʻOku lava ke nau maʻu ha fakamatala ke lau taʻetotongi. . . . Ko e ʻū tohi ko eni ki he kau kuí ʻoku paaki ʻi he ngaahi mataʻitohi ʻoku māʻolunga hake ʻo lava ke lau ʻe he kau kuí.” Naʻe toe pehē ʻe he Watch Tower: “Ko e tokolahi ʻo e kau kuí ʻoku nau houngaʻia lahi ʻi he pōpoaki fekauʻaki mo ha ʻaho lāngilangiʻia ʻoku teu ke hoko mai ki he māmaní.”

 ʻI he taimi naʻe hiki ai ʻa e ngaahi lea ko iá, naʻe teʻeki ke ʻi ai ha faʻunga fakamāmani lahi ʻi he lea faka-Pilitāniá ki hono hiki ʻa e tohi ki he kau kuí. Neongo ia, ko e Kau Fakamoʻoni ʻa Sihová naʻa nau ʻosi ʻai ke ala maʻu ʻa e moʻoni Fakatohitapú “ʻi he ngaahi mataʻitohi ʻoku māʻolunga hake”​—ʻa ia ʻi he tohi maʻá e kau kuí. Pea ʻoku tau kei fai pē ia! ʻOku tau ala maʻu ʻi he taimí ni ʻa e ʻū tohi maʻá e kau kuí ʻi he lea ʻe 50 tupu. ʻOku anga-fēfē hono faʻu iá?

 Ko e ʻuluaki sitepu ʻi hono faʻu ʻa e tohi maʻá e kau kuí ko hono liliu ʻa e fakamatalá ki he ngaahi mataʻitohi maʻá e kau kuí. “ʻI he kuohilí, naʻa mau ngāueʻaki ʻa e ngaahi polokalama fakakomēsiale ki hono liliu ʻa e tohi maʻá e kau kuí, ka naʻe ʻikai ke maʻu ai ʻa e ngaahi lea kotoa naʻa mau fiemaʻú,” ko e fakamatala ia ʻa Michael Millen, ʻoku ngāue ʻi he Potungāue Text Processing ʻi Patterson, Niu ʻIoke. “ʻI he taimí ni ʻoku mau ngāueʻaki ʻa e Watchtower Translation System, ʻa ia ʻoku lava ke liliu ai ʻa e ʻū tohi maʻá e kau kuí ki he lahi taha ʻo e ngaahi lea ʻi he māmaní. ʻOku ou tui ʻoku ʻikai ha meʻa ʻe tatau mo ia ʻi ha toe feituʻu.”

 Ko e ʻū tohi maʻá e kau kuí ʻoku ʻikai ngata pē ʻi he fakamatalá ka ʻoku toe fakakau ai ʻa e fakamatala ʻo e fakatātaá. Ko e fakatātaá, ko e fakatātā ʻi he takafi ʻo e pulusinga maʻá e kau kuí ʻo e Fiefia ʻi he Moʻuí ʻo Taʻengata! ʻoku peheni hono fakamatalá: “Ko ha tangata ʻoku kamata ke ne lue atu ʻi ha hala ʻoku afe afe ʻo takatakaiʻi ʻe ha ngoue fakaʻofoʻofa, ngaahi tafungofunga mo e ʻotu moʻunga.” Ko Jamshed, ko ha sevāniti fakafaifekau mo ha tāimuʻa ʻoku kui, ʻokú ne pehē, “Ko e ngaahi fakamatala ko eni ʻo e fakatātaá ʻoku mahuʻinga taʻehanotatau ia kiate au.”

 Hili hono liliú, ʻoku ʻave ʻa e ʻū failé ki he ngaahi ʻōfisi vaʻa ʻoku nau paaki ke māʻolunga hake ʻa e ʻū tohi maʻá e kau kuí. ʻOku paaki ai ʻa e ʻū tohí ki ha pepa ʻoku tolonga ʻa ia heʻikai ke mahae lolotonga hono pākí pe ʻe holo ʻa e ngaahi mataʻitohí hili hano toutou ngāueʻaki. Hokó, ʻoku fakatahatahaʻi ʻa e ngaahi pēsí, fakatakafi pea fakafolau leva fakataha mo e ʻū tohi ʻa e fakatahaʻangá pe ʻave taʻetotongi ʻi he pōsiti ʻōfisí ʻo kapau ʻoku nau maʻu ʻa e sēvesi ko iá maʻá e kau kuí. ʻE aʻu ʻo fakafolau ʻe he ngaahi ʻōfisi vaʻá ʻi ha founga vave ʻa e ʻū tohi ki he fakatahá ʻa ia ʻoku fiemaʻu ʻe he fanga tokoua ʻoku nau kuí pe palopalema ʻenau sió ʻo ka fiemaʻu.

 Ko e ngāue kotoa ko ení ʻoku fiemaʻu ki ai ʻa e taimi mo e paʻanga lahi. Ko hono moʻoní, ko ʻetau fale pulusi ʻi Wallkill, Niu ʻIoké, ʻoku nau pulusi ʻa e Tohi Tapu ʻe 50,000 ʻi he taimi lahi tatau ʻoku nau paaki ai ha Tohi Tapu ʻe 2 pē maʻá e kau kuí. Ko e Tohi Tapu taki taha maʻá e kau kuí ʻi he lea faka-Pilitānia kalasi uá ʻoku feʻunga mo e voliume ʻe 25, pea ko e ngaahi naunau ʻoku fiemaʻu ke faʻuʻaki ʻa e ngaahi voliume ko iá ko hono mahuʻingá ʻoku liunga 123 ia ʻi he meʻa ʻoku fiemaʻu ke faʻuʻaki ha Tohi Tapu anga-maheni. a Ko e takafi ki he foʻi voliume ʻe 25 ko hono mahuʻingá ʻoku tola ʻAmelika ʻe $150 nai!

 ʻOku anga-fēfē ongoʻi ʻa e faʻahinga ʻoku nau faʻu ʻa e ʻū tohi maʻá e kau kuí fekauʻaki mo ʻenau ngāué? Ko Nadia, ʻoku ngāue ʻi he vaʻa ʻAfilika Tongá, ʻokú ne pehē: “Ko hotau fanga tokoua mo e fanga tuofāfine ʻoku kuí pe palopalema ʻenau sió ʻoku faingataʻa ʻa e moʻuí kiate kinautolu, ko ia ʻoku ou vakai ki ai ko ha tāpuaki ia ke faʻu ha meʻa ke tokoni kiate kinautolu. ʻOku fakamoʻoniʻi heni ʻoku ʻofa lahi ʻaupito ʻa Sihova ʻiate kinautolu.”

 Kae fēfē kapau ʻoku ʻikai lava ha tokotaha ʻoku kui ke lau ʻa e tohi maʻá e kau kuí? ʻI he ngaahi taʻu siʻi kuo maliu atú, naʻa tau tuku ange ai ʻa e Learn to Read Braille, ko ha pepa ngāue ʻa ia ʻoku fakatou maʻu ai ʻa e fakamatala maʻá e kau kuí mo e fakamatala kuo pulusi. ʻOku fakataumuʻa ia ki ha tokotaha ʻoku lava ʻo sio pea ki ha tokotaha ʻoku kui ke na ngāueʻaki fakataha ia. Ko e polosiuá ko e konga ia ʻo e naunau ʻa ia ʻoku kau ai ha ngaahi meʻangāue ʻe lava ke ngāueʻaki ʻe he tokotaha kuí ke tohi ʻaki ʻa e ngaahi mataʻitohi māʻolunga haké. ʻOku ʻai heni ke ne manatuʻi fuoloa ange ʻa e mataʻitohi taki taha pea tokoniʻi ia ke ne ʻiloʻi ʻi heʻene fāfā ki aí.

 Kuo anga-fēfē maʻu ʻaonga ʻa e fanga tokoua mo e fanga tuofāfine ʻoku nau kui pe palopalema ʻenau sió mei he ʻū tohí? Ko Ernst, ʻoku nofo ʻi Haiti, naʻá ne maʻu ʻa e fakatahá, ka naʻe ʻikai ke ʻi ai ha ʻū tohi maʻá e kau kuí. Ko e olá, naʻe pau ke ne mātuʻaki fakafalala ki heʻene manatú kae lava ke ne fai ha konga mo fai ha tali. “Ka ʻi he taimi ní,” ko ʻene leá ia, “ʻOku lava ke u hiki nima pea tali ʻi ha faʻahinga taimi pē. ʻOku ou ongoʻi fāʻūtaha moʻoni mo hoku fanga tokouá mo e fanga tuofāfiné. ʻOku mau maʻu kotoa ʻa e meʻakai fakalaumālie tatau!”

 “Ko ʻetau ʻū tohi maʻá e kau kuí ʻoku mahino ange ia ʻi ha toe tohi kehe kuó u lau,” ko e lea ia ʻa Jan, ko ha mātuʻa ʻi ʻAositulia ʻoku palopalema ʻene sió ʻa ia ʻokú ne fakahoko ʻa e Ako Taua Leʻo mo e Ako Tohi Tapu ʻa e Fakatahaʻangá. “Ko e fakatātaá, ʻoku ʻi ai ʻa e ngaahi fika ʻo e pēsí, fakamatala ʻi lalo ʻa ia ʻoku faingofua ke maʻu, pea mo e ngaahi fakamatala ʻo e fakatātaá ʻoku māʻalaʻala.”

 Ko Seon-ok, ko ha tāimuʻa ʻi Kōlea Tonga, ʻoku kui mo tuli. ʻI he kuohilí naʻá ne fakafalala pē ki ha tokotaha ke ne fai ha fakaʻilonga ʻaki hono nimá, ka ʻoku malava he taimí ni ke ne lau ʻa e ʻū tohi tokoni ki he ako Tohi Tapu maʻá e kau kuí. “Ko e ʻū tohi kehe maʻá e kau kuí ʻoku faingataʻa ke lau koeʻuhí ʻoku pulia ʻa e fanga foʻi totí, hipa ʻa e lainé pe fuʻu manifi ʻa e pepá,” ko ʻene leá ia. “Ka ko e Kau Fakamoʻoni ʻa Sihová ʻoku nau ngāueʻaki ʻa e pepa tolonga ange pea ʻai ʻa e fanga foʻi totí ke ʻilonga lelei, ʻo ʻai ai ke faingofua ange ke u lau.” ʻOkú ne toe pehē: “ʻI he kuohilí, naʻe toki lava pē ke u ako ʻa e ʻū tohi Fakatohitapú ʻi he tokoni ʻa e niʻihi kehé. Kae kehe, ʻi he taimí ni, ʻoku lava ke u ako pē ʻiate au. ʻOku ou fiefia ʻi he malava ke u teuteu ki heʻetau ngaahi fakataha faka-Kalisitiane fakauiké pea ke kau kakato ki ai. ʻOku ou lau ʻa e kotoa ʻetau ʻū tohi maʻá e kau kuí. ʻE lava ke ke pehē ʻoku ʻikai pē ke u ‘fiu au’ hono laú.”

 Hangē ko ʻetau ʻū tohi ʻoku pulusí, ko ʻetau ʻū tohi maʻá e kau kuí ʻoku fakakau ai ʻa e fakamatala ko ení: “Ko e tohí ni ʻoku ʻikai ke fakatau atu. ʻOku tokonaki ia ko ha konga ʻo ha ngāue fakaeako Tohi Tapu ʻi māmani lahi ʻa ia ʻoku poupouʻi ʻaki ʻa e ngaahi tokoni loto-fiefoaki.” Fakamālō atu ki hono fai ʻa e ngaahi tokoni ko ia fakafou ʻi he ngaahi founga ʻoku fakamatalaʻi ʻi he donate.pr418.com. Ko hoʻo tokoni nima-homó ʻokú ne ʻai ke ala maʻu ʻe he tokotaha kotoa ʻa e meʻakai fakalaumālié, kau ai ʻa e kau kuí mo e faʻahinga ʻoku palopalema ʻenau sió.