“ʻIkai fuʻu fuoloa atu, ko hono maʻu ʻetau meʻakai fakalaumālié fakafou ʻi he founga fakaʻilekitulōniká naʻe mei faingataʻa ke sioloto atu ki ai ʻe hoko.” Naʻá ke maʻu ha ongoʻi meimei tatau mo ia? Ko e lea ko ení ko e konga ia ʻo ha malanga fakalototoʻa naʻe fakahoko ʻe Geoffrey Jackson ʻi he Līpooti ʻa e Kulupu Pulé Fika 6, 2020. Naʻá ne toe pehē: “Pea ʻi he taimi ní mahalo ʻoku tau fifili pe naʻe mei anga-fēfē ʻetau fekuki mo e mahaki fakaʻauhá ka ne taʻeʻoua ʻa e ngaahi meʻangāue hangē ko e JW Library. Kuo teuʻi ʻe Sihova kitautolu ʻi he faai mai ʻa e ngaahi taʻú ke tau mateuteu ki ha meʻa peheni.”

 Kuo anga-fēfē hono teuʻi ʻe Sihova kitautolú? Ko e hā naʻe kau ki hono faʻu ʻo e JW Library app, pea ko e hā ʻoku fiemaʻu ke tokangaʻi mo fakaleleiʻi ʻaki iá?

 ʻI Mē 2013, naʻe kole ʻe he Kulupu Pulé ki he potungāue MEPS Programming ʻi he ʻuluʻi ʻapitangá, ke nau faʻu ha app ʻoku kau ai ʻa e Liliu Tohi Tapu Māmani Foʻoú kuo fakaleleiʻí. “ʻI he taimi ko iá, naʻe teʻeki ke mau tuku ange ha app toʻotoʻo ʻi ha app store,” ko e lea ia ʻa Paul Willies, ʻokú ne ngāue ʻi he potungāue MEPS Programming. “Ka naʻa mau fakatahatahaʻi mai ha timi, taʻofi fakataimi ʻa e ngaahi poloseki ʻe niʻihi, pea ngāue fakataha mo e ngaahi potungāue kehé ke tisaini mo faʻu ʻa e app mo hono ngaahi naunaú. Naʻa mau faʻa lotu, pea ʻi he tokoni ʻa Sihová naʻe tuku ange ai ʻa e app ʻi he fakataha fakataʻú ʻi ha māhina pē ʻe nima ki mui ai!”

 Ko e pole hono hokó ko hono ʻai ʻa e app ke hangē ha laipeli moʻoní ʻo hā ai ha ʻū tohi lahi ange pea ʻi he ngaahi lea lahi ange. ʻI he aʻu mai ki Sanuali 2015, ko e lahi taha ʻetau ʻū tohi ki muí ni mai ʻi he lea faka-Pilitāniá naʻe ala maʻu ʻi he app, pea ʻi he māhina pē ʻe ono mei ai, naʻe lava ke download ʻa e ʻū tohi ko iá ʻi he lea ʻe laui ngeau kehe.

 Talu mei ai, kuo fakaleleiʻi ʻe hotau fanga tokouá ʻa e app ʻi he ngaahi founga lahi, ʻo fakakau ai ʻa e ngaahi vitiō, fakatahaʻi ʻa e ʻū tohi mo e mītia ki he ngaahi fakataha ʻa e fakatahaʻangá ʻi ha konga pē ʻe taha, pea ʻai ke hū hangatonu pē ʻa e faʻahinga ʻoku nau ngāueʻakí ki he ngaahi maʻuʻanga fakamatala ʻi he Tataki Fakaefekumi mei he ngaahi konga Tohi Tapú tonu.

 Ko e JW Library ʻoku fakaava ia ʻi he ngaahi meʻangāue fakaʻilekitulōnika ʻe 8 miliona ʻi he ʻaho kotoa pea ʻi he ngaahi meʻangāue fakaʻilekitulōnika ʻe 15 miliona ʻi he māhina kotoa! Ko e hā ʻoku fiemaʻu kae lele lelei ai ʻa e app ʻi he ngaahi meʻangāue fakaʻilekitulōnika ko iá? ʻOku pehē ʻe Tokoua Willies: “Ko ha app toʻotoʻo heʻikai ʻaupito ke ʻosi ʻa e ngāue ia ʻoku fai ki aí. ʻOku mau ngāue maʻu pē ke tānaki ki ai ha ngaahi tafaʻaki foʻou pea fakaleleiʻi ia ki hono ngāueʻaki ʻe ha tokotaha. Koeʻuhi ʻoku faʻa update maʻu pē ʻe he ngaahi kautaha fakakomēsialé ʻa e ngaahi polokalama ki he meʻangāue fakaʻilekitulōniká, ʻoku pau ke mau feʻunuʻaki maʻu pē ʻa e app ki he ngaahi polokalama ko iá. Naʻe pau foki ke mau tokangaʻi mo upgrade ʻetau polokalamá ʻi he ʻalu ke toe lahi ange ʻa e ʻū tohi mo e ngaahi hiki-leʻo ʻi he JW Library.” ʻI he kotoa ʻo e ngaahi leá ko e ʻū tohi ʻe 200,000 nai mo e ngaahi vitiō mo e hiki-leʻo ʻe 600,000 tupu ʻoku ala maʻu ʻi he JW Library!

 Ke hokohoko atu ʻa e ngāue ko eni ki he app, ʻoku fiemaʻu ʻa e meʻa lahi ange ʻi hono maʻu pē ʻa e ngaahi naunau fakakomipiutá. ʻOku toe fiemaʻu foki ke fakatau mai ʻa e laiseni ki he ngaahi polokalamá. Ko e laiseni ʻe taha ʻoku tola ʻAmelika ʻe $1,500 he taʻu. Tānaki atu ki ai, ʻi he taʻu taki taha ʻoku fakamoleki ʻe he potungāue MEPS Programming ʻa e tola ʻAmelika ʻe $10,000 ke fakatau mai ʻa e ngaahi naunau mei he ngaahi kautaha kehekehe ke fakapapauʻi ʻe lele lelei ai pē ʻa e app ʻi he ngaahi komipiuta, tepileti, mo e telefoni foʻoú.

 Kuo holoki lahi ʻe he JW Library ʻa e paʻanga naʻe fakamoleki ki hono pulusi, fakatakafi mo hono fakafolau ʻa e ʻū tohí. Ke fakatātaaʻí, fakakaukau ki he kiʻi tohi Ko Hono Vakaiʻi Fakaʻaho ʻa e Tohi Tapú. Naʻa tau pulusi ʻa e tatau ʻe meimei 12 miliona ʻo e Vakaiʻi ʻa e Tohi Tapú​—2013. Ka ko e pulusinga 2020, naʻa tau pulusi pē ʻa e kiʻi tohi ʻe nima miliona nai​—neongo naʻa tau maʻu ha toe kau malanga ʻe toko 700,000 nai ʻi māmani lahi. Ko e hā naʻe fai ai ʻa e liliú? Koeʻuhi ko e tokolahi hotau fanga tokouá mo e fanga tuofāfiné ʻoku nau lau ʻa e konga tohi fakaʻahó he taimí ni ʻi he JW Library. a

 ʻOku toe tokoniʻi ʻe he JW Library ʻa e faʻahinga ʻoku nau ngāueʻaki iá ʻi he ngaahi founga lahi ʻaupito. Ko Geneviève, ʻoku nofo ʻi Kānata, ʻokú ne ongoʻi kuo ʻai ʻe he app ke toe hokohoko ange ʻene ako fakafoʻituituí. “Ko e moʻoni, kapau naʻe fiemaʻu ke u tānaki ʻa e fatunga tohi ki he akó, ʻoku ʻikai ke u tui te u ako he pongipongi kotoa,” ko ʻene leá ia. “Ka ko e app, ʻoku ou toʻo hake pē ʻeku tepiletí pea ʻoku maʻu ai ʻa e meʻa kotoa ʻoku ou fiemaʻú. Ko ʻeku ako tuʻumaʻú kuó ne fakaivimālohiʻi ʻeku tuí pea fakalolotoʻi hoku tuʻunga fakalaumālié.”

 Kuo fakamoʻoniʻi ʻa e ʻaonga ʻa e app ʻi he lolotonga ʻa e mahaki fakaʻauha COVID-19. Ko Charlyn, mei ʻAmelika, ʻokú ne fakamatala: “Kuo teʻeki ke u sio ki ha taha ʻo ʻetau ʻū tohi foʻou kuo pulusí ʻo laka hake ʻi he taʻu ʻe taha talu mei he mafola ʻa e COVID-19 ʻi māmani lahí. Ka ko e JW Library kuó ne hanganaki fafangaʻi fakalaumālie kitautolu, pea ʻoku ou fakamālō kia Sihova ki he tokonaki anga-ʻofa ko ení.”

 Ko Faye, ʻokú ne nofo ʻi he ʻOtu Motu Filipainí, ʻokú ne fakamāʻopoʻopo ʻa e anga ʻo e ongoʻi ʻa e tokolahi. ʻOkú ne pehē: “Ko e kotoa ʻeku moʻui fakalaumālié mo ʻeku taimi-tēpilé ʻoku fakatahatahaʻi ia ʻi ha app mālohi ʻe taha. Ko e meʻa ia ʻoku ou fuofua lau ʻi he pongipongí. Ko e meʻa ia ʻoku ou fanongo ki ai lolotonga ʻeku fai ʻeku ngaahi ngāue fakaʻahó. Ko e meʻa ia ʻoku ou ngāueʻaki ke teuteu ai ki he fakatahá. Ko e meʻa ia ʻoku ou ngāueʻaki ke teuteu ki heʻeku ako Tohi Tapú. ʻOku ou sio vitiō ai ʻi heʻeku ʻataá. ʻOku ou lau ai ʻa e ngaahi kupu pe ko e Tohi Tapú ʻi heʻeku tatali ki ha meʻa. ʻOku mahuʻinga taʻehanotatau ia.”

 ʻOku toe fakamoʻoniʻi ʻa e mahuʻinga taʻehanotatau ʻo e app ʻi he ngāue fakafaifekaú. Ko e fakatātaá, lolotonga ʻa e malangá, ko ha tuofefine ʻi Kameluni naʻá ne loto ke ngāueʻaki ha veesi Tohi Tapu naʻá ne sio naʻe ngāueʻaki ʻe ha tuofefine ʻe taha ʻi he ngaahi uike siʻi ki muʻá. Kae kehe, naʻe ʻikai ke ne manatuʻi ʻa e vēsí. ʻOkú ne fakamatala: “Ko e meʻa mālié, naʻá ku manatuʻi ha kupuʻi lea mei ai. Naʻá ku fakaava ʻa e app, ʻalu ki he Tohi Tapú, pea fekumi ki he kupuʻi leá. Tuai-e-kemo, naʻá ku maʻu ʻa e vēsí. ʻI hono ngāueʻaki ʻa e app, ʻoku malava ke u maʻu ʻa e ngaahi veesi lahi ʻa ia ʻoku faʻa ngalo ʻiate au.”

 Ko hoʻo ngaahi tokoni anga-ʻofa ʻo ngāueʻaki ʻa e ngaahi founga ʻoku fakamatalaʻi ʻi he donate.pr418.com kuo ʻai ai ke malava ke mau faʻu, tokangaʻi mo fakaleleiʻi ʻa e JW Library app maʻa hotau fanga tokoua mo e fanga tuofāfine ʻi māmani lahí. Fakamālō atu ki hoʻo laumālie nima-homó.

1. ʻOkatopa 2013—Tuku ange ʻa e app ʻo fakakau ai ʻa e Liliu Tohi Tapu Māmani Foʻoú kuo fakaleleiʻí

2. Sanuali 2015—Ala maʻu ai ʻa e ʻū tohi kehe ʻi lea faka-Pilitāniá, pea mo e lea ʻe laui ngeau kehe ki mui ai

3. Nōvema 2015—Tānaki atu ki ai ʻa e fakaʻilongá

4. Mē 2016—Tānaki atu ki ai ʻa e konga ʻo ui ko e Fakataha

5. Mē 2017—Tānaki atu ki ai ʻa e konga ki he hiki Noutí

6. Tīsema 2017—Tānaki atu ki ai ʻa e Study Bible

7. Maʻasi 2019—Malava ke download ʻa e ngaahi hiki-leʻo, sio hangatonu ʻi he ʻinitanetí ʻi he vitioó, pea ala maʻu mo e Tataki Fakaefekumi

8. Sanuali 2021—Tānaki atu ki ai mo e ngaahi tafaʻaki ki he Fiefia ʻi he Moʻuí ʻo Taʻengata!