ʻI Sanuali 2021, naʻe fanongonongo ʻe he Kulupu Pulé ʻa e tuku ange ʻo ha tohi tokoni ako Tohi Tapu foʻou, ko e Fiefia ʻi he Moʻuí ʻo Taʻengata! a Naʻe anga-fēfē hoʻo fakafeangaí ʻi he fanongonongo ko ení? Ko Matthew, mei Kānata, ʻokú ne pehē: “Naʻá ku fiefia lahi! Pea naʻe tupulaki ʻeku fiefiá lolotonga ʻa e ngaahi malanga mo e vitiō naʻe fakamatalaʻi ai ʻa e ʻuhinga naʻe faʻu ai ʻa e tohí pea mo e founga hono ʻahiʻahiʻi iá. Naʻe ʻikai ke u faʻa tatali ke sio ki ai mo kamata ngāueʻaki ia.”

 Ko e Fiefia ʻi he Moʻuí ʻo Taʻengata! naʻe fakahaaʻi ai ha founga foʻou ki hono fakahoko ʻo e ngaahi ako Tohi Tapú. Neongo ia, ʻoku ʻikai ko e meʻa pē ia ʻoku kehe ai ʻa e tohi foʻoú mei he ngaahi tohi tokoni ako ki muʻá. Kapau ʻokú ke ngāueʻaki ha tatau kuo pulusi ʻo e Fiefia ʻi he Moʻuí ʻo Taʻengata! te ke fakatokangaʻi nai ʻi hoʻo ala ki aí ʻoku kehe pē ia. Ke sio ki hono ʻuhingá, tau vakai ofi angé ki he founga naʻe ngaohi ai ʻa e tohí.

 Pepa matolu. Ko e hā naʻe fiemaʻu ai ení? Ko e Fiefia ʻi he Moʻuí ʻo Taʻengata! ʻoku ʻi ai ʻa e ngaahi fakatātā lanu fakaʻofoʻofa ʻe 600 tupu, ʻo meimei liunga hongofulu ia ʻi he fakatātā ʻi he tohi Akoʻi Mai! Ko e tohi foʻoú ʻoku lahi foki ai mo e ʻatā ʻa ia ʻoku ʻikai ke ʻi ai ha fakamatala pe fakatātā ʻi he ngaahi pēsí. Ko e ongo tafaʻaki ko ení ʻoku hoko ia ko ha palopalema: ʻI he manifi ʻa e pepá, ko e ngaahi fakatātā ʻi he tafaʻaki ʻe taha ʻo ha peesi ʻe lava ke ʻasi ia ʻi he tafaʻaki ʻe taha ʻo e pēsí. Ke fakaʻehiʻehi mei he hoko ení, ko e fanga tokoua ʻi he Potungāue Pulusi Fakavahaʻapuleʻangá (IPD), ʻi Wallkill, Niu ʻIoke, ʻAmeliká, naʻa nau tesi ʻa e kalasi pepa ʻe fā ʻa ia ʻoku tau lolotonga ngāueʻaki ʻi heʻetau ngaahi feituʻu faiʻanga pulusí. Ko e Kōmiti Hiki-Tohi ʻo e Kulupu Pulé naʻa nau sivisiviʻi ʻa e kalasi pepa taki taha pea fili ʻa e pepa ʻoku ʻikai ke fuʻu manifí. Neongo ko e pepa ko ení ʻoku laka hake hono totongí ʻi he pēseti ʻe 16 ʻi he pepa ʻoku tau ngāueʻaki ki he lahi taha ʻo ʻetau ʻū tohí, ʻoku fakaʻatā ai ʻa e kau ako Tohi Tapu taki taha ke nau lau ʻa e peesi taki taha ʻo e Fiefia ʻi he Moʻuí ʻo Taʻengata! ʻo ʻikai fakaheleleuʻi ʻe he ngaahi fakatātā ʻi he tafaʻaki ʻe taha ʻo e pēsí.

 Takafi laminate kehe. Ko e takafi ʻo e tohi foʻoú ʻi heʻete ala ki aí ʻoku kehe ia mei he ngaahi takafi ʻo ʻetau ʻū tohi kehé koeʻuhí ʻoku faʻuʻaki ia ha laminate kehe. ʻI he ʻikai ngāueʻaki ʻa e laminate gloss anga-mahení, ko e tohi foʻoú ʻoku ngāueʻaki ai ʻa e laminate matte, ʻa ia ʻokú ne ʻai ʻa e fakatātā ʻi he takafí ke ʻilonga lelei ange. ʻOku toe tokoni foki ʻa e laminate ke maluʻi ʻa e tohí mei heʻene mangaungau ʻi hano toutou ngāueʻaki. Kae kehe, ko e laminate matte ʻoku liunga nima hono totongí ʻi he laminate gloss. Ko ia naʻe feinga ʻa e ngaahi vaʻa kehekehe ke fakatau ha laminate matte maʻamaʻa ange.

 Ko e hā naʻe fili ai ke ngāueʻaki ʻa e ngaahi naunau mamafa ange ko ení? Ko ha tokoua ʻoku ngāue ʻi he IPD ʻokú ne fakamatala: “ʻOku mau ʻamanekina ke ngāueʻaki lelei ʻa e tohi ko ení, ko ia ʻoku mau loto ke tauhi ʻa hono tuʻunga fakaʻofoʻofá neongo hono toutou ngāueʻakí.” Ko Eduardo, ʻoku ngāue ʻi he ʻŌfisi Pulusi ʻi he vaʻa Pelēsilá, ʻokú ne pehē: “ʻOku mau fiefia lahi ke sio ki he founga kuo ngāueʻaki ai ʻe he kautaha ʻa Sihová ʻa e ngaahi naunau lelei ke faʻuʻaki ʻa e tohi ko ení ke fakaʻofoʻofa, tolonga pea faingofua ke ngāueʻaki, ʻi he taimi tatau ʻoku ngāuefakapotopotoʻaki ʻa e paʻanga tokoní.”

 Naʻe kamata hono pulusi ʻa e Fiefia ʻi he Moʻuí ʻo Taʻengata! ʻi Maʻasi 2021. Ko e lolotonga eni ʻa e mahaki fakaʻauha COVID-19, ʻa ia naʻe hoko ia ko ha pole. Koeʻuhi ko e fiemaʻu ke nofo maʻu ʻa e Pētelí, naʻe ʻikai ke lava ʻo toe haʻu ha kau ngāue pole ʻo tokoni ʻi Pēteli, pea naʻe ʻikai lava ke nau fakaafeʻi ha fanga tokoua foʻou ke ngāue ko e kau Pēteli. Ko hono olá, ko e ngaahi feituʻu faiʻanga pulusi ʻe niʻihi naʻe ʻikai tokolahi feʻunga ʻa e kau ngāué, pea naʻe tāpuni ʻa e faiʻanga pulusi ʻe niʻihi koeʻuhi ko e tuʻutuʻuni mei he puleʻangá.

 Naʻe anga-fēfē hono ikuʻi ʻa e ngaahi pole ko ení? ʻI he taimi naʻe malava ke toe fakaava ai ʻa e ngaahi feituʻu faiʻanga pulusí, naʻe ʻi ai ʻa e fanga tokoua mo e fanga tuofāfine mei he ngaahi potungāue kehe ʻi Pēteli naʻe vaheʻi fakataimi ke tokoni ʻi he pulusí. “Ko ʻenau laumālie feilaulauʻi-kitá mo ʻenau loto-lelei ke ako ki ha ngāue foʻoú naʻe mahuʻinga taʻehanotatau ki hono fakakakato ʻo e ngāué,” ko e lea ia ʻa Joel, ʻoku ngāue ʻi he IPD.

 Neongo ʻa e ngaahi polé, kuo mau ʻosi pulusi ʻa e tatau ʻe laui miliona ʻo e Fiefia ʻi he Moʻuí ʻo Taʻengata! Ko hono faʻu iá ʻoku fiemaʻu ki ai ʻa e ngaahi naunau kehekehe, ʻo kau ai ʻa e ngaahi peleti pulusi, laʻi laminate, pepa, vaitohi mo e meʻa fakapipiki. ʻI he ʻuluaki māhina pē ʻe nima ʻo e pulusí, laka hake ʻi he tola ʻAmelika ʻe $2.3 miliona naʻe ngāueʻaki ki he naunaú ʻataʻatā pē. Ke fakasiʻisiʻi ʻa e fakamolé, kuo mau tokanga ke pulusi pē ʻa e ʻū tohi ʻoku fiemaʻu ʻe he ngaahi fakatahaʻangá.

 ʻOku anga-fēfē ongoʻi ʻa e kau faiako Tohi Tapú mo ʻenau kau akó fekauʻaki mo e tohi tokoni ako Tohi Tapu foʻou ko ení? Ko Paul, ko ha tokoua ʻi ʻAositelēlia, ʻokú ne pehē: “ʻOku mātuʻaki fakafiefia ke ngāueʻaki ʻa e Fiefia ʻi he Moʻuí ʻo Taʻengata! ʻo u fiefia ai ke fakahoko ʻa e ngaahi ako Tohi Tapú. Ko e faʻunga ʻo e tohí ʻoku mātuʻaki fakamānako pea anga-fakafetalanoaʻaki moʻoni. Kuo fakatahaʻi lelei ai ʻa e fakamatala māʻalaʻala, ngaahi fehuʻi fakaueʻiloto, ngaahi vitiō, fakatātā, saati mo e meʻa ke fai ʻe he tokotaha akó. Ko ha tisaini pōtoʻi ia ʻokú ne ueʻi au ke fakaleleiʻi ʻeku founga fakafaiakó.”

 Ko ha tokotaha ako Tohi Tapu ʻi ʻAmelika ʻokú ne pehē: “ʻOku ou saiʻia ʻaupito ʻi he tohi foʻoú. ʻOku tokoniʻi au ʻe he fakatātaá ke mahinoʻi ʻa e ngaahi poini tefitó. Ko e ngaahi vitioó ʻoku aʻu ki hoku lotó pea ueʻi au ke fai ha meʻa.” Ko e tokotaha ako ko ení ʻokú ne ako tuʻo ua ʻi he uike pea maʻu maʻu pē ʻa e ngaahi fakataha ʻa e fakatahaʻangá.

 ʻOku kei toe ʻa e tatau ʻe laui miliona ʻo e Fiefia ʻi he Moʻuí ʻo Taʻengata! ke pulusi ʻi he ngaahi lea lahi. Ko hono moʻoní, ʻi he aʻu mai ki he ʻaho ní, kuo tali ʻe he Kulupu Pulé ke pulusi ʻa e tohi ko ení ʻi he lea ʻe 710, ʻo laka hake ʻaki ia ʻa e lea ʻe 340 ʻi he lea naʻe tali ke pulusi ai ʻa e tohi Akoʻi Mai!

 ʻOku anga-fēfē hono feau ʻa e fakamole ki he pulusí? Fakafou ʻi he ngaahi tokoni ki he ngāue ʻi māmani lahí, ko e lahi ʻoku fai fakafou ʻi he donate.pr418.com. ʻOku mau houngaʻia ʻi hoʻo laumālie nima-homó, ʻa ia ʻoku tokoni kiate kimautolu ke faʻu ʻa e ngaahi tohi tokoni ako Tohi Tapu maʻá e faʻahinga ʻoku nau loto ke ako fekauʻaki mo Sihová pea “fiefia ʻi he moʻuí ʻo taʻengata.”​—Saame 22:26.