ʻOku finangalo ʻa Sihova ki he kakai kotoa pē, tatau ai pē pe ko e hā honau tuʻungá, ke ako fekauʻaki mo ia pea mo hono Puleʻanga fakahēvaní. (1 Tīmote 2:3, 4) ʻI he ʻuhinga ko iá, ʻoku faʻu ʻe he Kau Fakamoʻoni ʻa Sihová ʻa e Tohi Tapu mo e ʻū tohi tokoni ki he ako Tohi Tapú maʻá e kakai tokolahi taha ʻe ala lavá, ʻo kau ai ʻa e kau tulí. Ko hono moʻoní, ko ʻemau kautahá kuo nau faʻu ʻa e ʻū tohi ʻe laui afe ʻi he faʻunga ʻo e vitiō lea fakanoa, a ʻa ia ʻoku ala maʻu ʻi he lea fakanoa ʻe 100 tupu! Kuo anga-fēfē ʻemau faʻu pea tufaki ʻa e ʻū tohi ko ení? Pea ko e hā ʻa e ngaahi fakalakalaka kuo mau fai ʻi he faai mai ʻa e taimí?

 Ko e ʻū tohi lea fakanoá ʻoku faʻu ia ʻe he ngaahi timi liliu-lea takatakai he māmaní. Ko e mēmipa taki taha ʻi he timí ʻokú ne sivisiviʻi fakalelei ʻa e tohi ʻoku fiemaʻu ke nau liliú. Hokó, ʻoku nau fili ʻa e founga lelei taha ke ʻoatu ai ʻa e fakamatalá ʻi he lea fakanoá. ʻI he ʻosi iá, ʻoku nau hiki vitiō leva ʻa e tohí. ʻI he taimi ní, ko e timi ʻe 60 ʻoku nau fai tuʻumaʻu ʻa hono liliu ʻa e ʻū tohi tokoni ki he ako Tohi Tapú ki he lea fakanoá, pea ko e timi ʻe 40 ʻoku nau toki fai ia ʻi he taimi ʻe niʻihi.

 ʻI he kuohilí, naʻe mamafa ʻaupito hono faʻu ʻa e ngaahi vitiō lea fakanoá. Ko e ngaahi meʻa faitā vitioó mo e ngaahi naunau kehé naʻe mamafa ʻaupito ʻo ʻikai hangē ko ia he ʻaho ní. Pehē foki, ko e ngaahi vitioó naʻe hiki ia ʻi ha fale hiki, ʻa ia naʻe fiemaʻu ke tau langa pea taimi ʻe niʻihi ko hono toe fakaleleiʻi pē ha fale naʻe ʻosi ʻi ai. Ko hono fakakātoá, ʻe fakamoleki nai ha paʻanga ʻe 30,000 b tupu ke fokotuʻu ʻa e meʻa kotoa ki ha timi liliu-lea lea fakanoa.

 Koeʻuhi ke ngāueleleiʻaki ʻa e paʻanga tokoní, ko ʻetau kautahá kuo nau kumi ha ngaahi founga ke fakaleleiʻi mo fakafaingofuaʻi ʻa e liliu-leá. Kuo tau ngāueʻaki ʻa e naunau fakaeonopooni ʻa ia ʻoku ngāue lelei pea toe siʻisiʻi mo e fakamolé. ʻI he ʻikai ngāueʻaki ha fale hikí, ʻoku lava ʻa e ngaahi timi liliu-leá ʻo ʻai pē ha holisi lanu mata pea hiki ʻa e ngaahi vitioó ʻi honau ʻōfisí. ʻI hono fiemaʻu ha kau liliu-lea tokolahi, ko e fanga tokouá mo e fanga tuofāfiné ʻe lava ke nau hiki pē ʻenau kongá mei honau ʻōfisí pe mei honau ʻapí; pea ʻikai fiemaʻu ke ʻalu ki ha fale hiki.

 Kuo tau toe faʻu foki ha ngaahi polokalama fakakomipiuta ke tokoni ki heʻenau ngāué. Ko e ngaahi fakalelei peheé kuó ne holoki ʻa e vaeua ʻo e taimi ʻoku fiemaʻu ki ha timi liliu-lea ke nau faʻu ha tohi ʻi he lea fakanoá. ʻOku houngaʻia hotau fanga tokouá ʻi he ngaahi fakalakalaka ko ení. ʻOku pehē ʻe ha tokoua ko Alexander: “Ko e ngaahi vitiō lea fakanoá ʻoku lahi ange ia he taimí ni ʻi he ki muʻá. ʻOku ou fiefia lahi ʻaupito ai. ʻOku ou sio he ngaahi vitioó ʻi he ʻaho kotoa.”

 ʻI he ngaahi ʻahó ni, ʻoku siʻi hifo ʻi he $5,000 ke fakakakato ʻa e fiemaʻu ha timi liliu-lea. Ko hono olá, ʻoku mau lava ke faʻu ʻa e ngaahi vitiō lea fakanoa ʻi he ngaahi lea lahi ange.

 ʻI he ʻosi hono hiki ʻe ha timi ha tohi ʻi he lea fakanoá, ko e vitioó kuo pau ke aʻu ki he faʻahinga ʻoku nau fiemaʻu iá. ʻI he kuohilí, naʻa tau faʻu ʻa e ngaahi kāsete vitiō mo e DVD, ka naʻe mamafa, fakamole taimi, pea lahi mo e ngāué. Naʻe ʻave ʻa e ngaahi vitioó ki ha kautaha ki hono hiki-tatau. Fakaʻosí, naʻe fakafolau leva ʻa e ngaahi kāsete vitiō mo e DVD ki he ngaahi fakatahaʻangá. ʻI he 2013 ʻataʻatā pē, naʻa tau fakamoleki ai ʻa e paʻanga ʻe 2 miliona tupu ʻi hono faʻu ʻa e ngaahi DVD lea fakanoá.

 Naʻe houngaʻia lahi ʻa e kau tulí ʻi he ngaahi tokonaki ko iá. Neongo ia, ko e ngaahi vitioó naʻe ʻikai ke faingofua maʻu pē hono ngāueʻakí, tautefito ʻi he ʻalu ke toe lahi ange ʻa e kāseté pe DVD. ʻI he ngaahi tuʻunga ʻe niʻihi, naʻe fiemaʻu ʻa e ngaahi DVD lahi ki hono hiki ha tohi Tohi Tapu ʻe taha. ʻOku manatu ha tokoua mei Pelēsila ko Gilnei: “ʻI he taimi naʻe fiemaʻu ai ke lau ha konga Tohi Tapu, naʻe pau ke mau kumi ʻa e foʻi kāsete totonú pea toki kumi leva ʻa e vēsí. Naʻe mātuʻaki faingataʻa.” Ko ha tuofefine ko Rafayane, naʻá ne ngāueʻaki ʻa e DVD lea fakanoá, ʻokú ne pehē: “Naʻe fakatupu helaʻia hono fai ʻa e ako fakafoʻituituí. Naʻa mau fakamoleki ʻa e taimi lahi ke kumi pē ʻa e ngaahi konga Tohi Tapú pe maʻuʻanga fakamatalá.” Pea ʻi he taimi naʻe ngāue fakamalanga ai ʻa e fanga tokouá mo e fanga tuofāfiné, te nau ʻave maʻu pē ʻa e ngaahi DVD pe kāseté, ʻa ia naʻe lava ke nau huluʻi ʻi he TV ʻa ha tokotaha mahuʻingaʻia. Naʻe aʻu ʻo ʻave ʻe he fanga tokoua ʻe niʻihi ʻenau mīsini DVD pē ʻanautolu. Neongo ia, naʻe ʻikai ke fuʻu fuoloa kuo aʻu mai ʻa e fanga kiʻi mīsini DVD toʻotoʻó, pea naʻe ngāueʻaki eni ʻe he fanga tokoua tokolahi. Ko Bobby ʻa ia ʻoku nofo ʻi ʻAmeliká, ʻokú ne pehē: “Kapau ʻe ʻosi haʻo fakahaaʻi ha konga Tohi Tapu peá ke loto ke toe fakahaaʻi mo ha konga Tohi Tapu ʻe taha, naʻe faʻa fiemaʻu ke ke liliu ʻa e foʻi DVD. Naʻe fiemaʻu ki heni ʻa e taimi pea naʻe fakangatangata ai ʻemau malava ke ngāueʻaki ʻa e Tohi Tapú ʻi he fetalanoaʻakí.”

 ʻI he 2013, naʻe tuku ange ʻe he kautaha ʻa Sihová ʻa e app JW Library Sign Language, ʻa ia naʻe malava ai e fanga tokouá ke download pea huluʻi ʻa e ngaahi vitiō lea fakanoá ʻi heʻenau telefoní pe tepiletí. Ko e app naʻe fuofua tuku ange ia ʻi he Talanoa Tuhutuhu Faka-ʻAmeliká. Pea ʻi he 2017 leva, naʻe toe fakaleleiʻi ia ke ala maʻu ai ʻa e ngaahi lea fakanoá kotoa. Naʻe fiefia lahi ʻa e fanga tokoua mo e fanga tuofāfine takatakai he māmaní. ʻOku pehē ʻe Juscelino, ko ha tokoua mei Pelēsila: “ʻOku ʻikai lava ke u tui ki ai! Naʻá ku hanganaki fakakaukau ki he anga hono fakahaaʻi mai ʻe he Kulupu Pulé ʻa e ʻofa kiate kimautolu kau tulí pea mo ʻenau loto ke mau fakalakalaka ʻi he moʻoní, ʻo hangē pē ko e faʻahinga ʻoku nau malava ke leá. Naʻá ku fiefia lahi, pea naʻe ueʻi au ʻe he app ke toe ako lahi ange ʻa e Tohi Tapú.”

 ʻI he ʻahó ni, ʻoku mau faʻu ʻa e ngaahi vitiō lea fakanoa kotoa pē ʻi he fakaʻilekitulōniká, pea tufaki atu ia ʻi heʻetau uepisaití pea ʻi he app JW Library Sign Language. Ko hono olá, ko e ʻū tohi lea fakanoá ʻoku lava ke liliu, hiki pea tufaki ʻi ha ngaahi ʻaho siʻi, kae ʻikai ʻi ha laui māhina pe laui taʻu. Ko hono moʻoní, ko e ʻū tohi ʻi he lahi taha ʻo e ngaahi lea fakanoá, ʻoku tuku ange fakataha pē mo e ʻū tohi ʻi he ngaahi lea ʻoku leaʻakí.

 Fakatokangaʻi ʻa e fakamatala mei hotau fanga tokoua mo e fanga tuofāfine ʻoku tulí. Ko ha tuofefine ko Klízia ʻokú ne pehē: “Ko e hā ha toe kautaha ʻoku nau tokanga lahi ki he kau tulí ʻo nau loto-lelei ke tokonaki ʻa e meʻakai fakalaumālie ʻo faingofua ke ala maʻu? ʻOku ʻikai ha meʻa ʻi he māmaní ʻe ala fakahoa ki he meʻa kuo fai ʻe he kautaha ʻa Sihová maʻa kimautolú.” ʻOku pehē ʻe Vladimir: “Ko e ngaahi vitioó ʻoku ne fakahaaʻi mai kiate au ko e tokanga ʻa Sihova ki he kakai tulí ʻoku lahi tatau pē mo ʻene tokanga ki he kakai ʻoku nau lava ʻo fanongó.”

 Ko ʻetau ngaahi vitiō lea fakanoá ʻoku ʻi ai maʻu pē ʻa e fakamatala ko ení: “Ko e tohí ni ʻoku tokonaki ia ko ha konga ʻo ha ngāue fakaeako Tohi Tapu ʻi māmani lahi ʻa ia ʻoku poupouʻi ʻaki ʻa e ngaahi tokoni loto-fiefoaki.” ʻOku mau houngaʻia moʻoni ʻi hoʻo meʻaʻofá, ʻa ia ko e lahi tahá ʻoku fakafou ʻi he donate.pr418.com. Ko e ngaahi tokoni fakapaʻanga ko ení ʻoku mau malava ai ke faʻu ʻa e Tohi Tapú pea mo e ʻū tohi tokoni ki he ako Tohi Tapú maʻá e kakai kotoa pē, kau ai ʻa e faʻahinga ʻoku nau ngāueʻaki ʻa e lea fakanoá.