ʻOku tau fiemaʻu lahi ha ngaahi fale ke ngāueʻaki ki he lotu kia Sihová koeʻuhi ʻi he taʻu taki taha ʻoku papitaiso ai ʻa e laui kilu. ʻI he ʻuhinga ko ení, kuo fokotuʻutuʻu ai ʻe he ngaahi Potungāue Tisaini/Langa Fakalotofonua takatakai ʻi he māmaní ke langa pe fakaleleiʻi ʻa e ngaahi feituʻu faiʻanga lotu laka hake ʻi he 2,700 lolotonga ʻa e taʻu fakangāue 2020. a

 Ko e meʻa pangó, ko e ngaahi fokotuʻutuʻu ko ení ne fakafeʻātungiaʻi ia ʻe he mahaki fakaʻauha COVID-19. Ke maluʻi hotau fanga tokouá mo e fanga tuofāfiné pea talangofua ki he ngaahi tuʻutuʻuni ʻa e puleʻangá, naʻe taʻofi fakataimi ai ʻe he Kōmiti Pulusi ʻo e Kulupu Pulé ʻa e lahi taha ʻo e ngaahi langa ʻi māmani lahí. Kae kehe ʻi he lolotonga ʻa e taʻu fakangāue 2020, naʻe langa pea fakaleleiʻi ʻa e ngaahi fale faiʻanga lotu laka hake ʻi he 1,700 ki muʻa ke hoko ʻa e mahaki fakaʻauhá. Tānaki atu ki ai, naʻe kakato ʻa e ngāue langa laka hake ʻi he 100 tupú ʻi he ngaahi vaʻá. Fakatokangaʻi ʻa e founga kuo maʻu ʻaonga mei ai hotau fanga tokouá ʻi he kakato ha langa ʻe ua.

 Vaʻa Kameluni. Ko e vaʻa ki muʻá ʻi Douala naʻe fuʻu siʻisiʻi ʻaupito pea naʻe fiemaʻu ki ai ʻa e ngāue lahi. Naʻe fakakaukau ʻa e Kōmiti Pulusí ke fakaleleiʻi ʻa e vaʻá, ka ke fakahoko ení ʻe lahi ange ʻa e fakamole ki hono fakaleleiʻí ʻi he mahuʻinga totonu ʻo e falé. Naʻa nau toe kumi foki ki ha faingamālie ke langa ha fale foʻou pe fakatau ha fale kuo ʻosi fokotuʻu kae fakaleleiʻi. Ka naʻe ʻikai fakahoko ha taha ʻo e ngaahi meʻa ní.

 Lolotonga iá, naʻe toki ʻilo ʻe he fanga tokouá ʻoku palani ʻa e puleʻanga fakalotofonua ʻi he faka-Tokelau ʻo Douala ke ngaahi ha hala puleʻanga ʻo ofi ki he taha ʻo ʻetau Holo ʻAsemipilií. Koeʻuhi ko e hala foʻou ko ení, ʻe faingofua ange ki he fefonongaʻakí pea mo fakaʻatā ʻa e ʻuhila, vai mo e alā meʻa pehē ke aʻu ki he feituʻú. Ko e meʻa tofu pē eni naʻe fiemaʻu ʻe he vaʻá. Ko ia naʻe tali ʻe he Kulupu Pulé ke langa ha vaʻa foʻou ʻi he konga kelekele ʻo e Holo ʻAsemipilií.

 Naʻe ngāue fakataha ʻa e kau ngāue kautaha langá mo e kau Fakamoʻoní ʻi he langa ko ení pea naʻe tokoni eni ke fakasiʻisiʻi ai ʻa e fakamolé mo ʻikai mole taimi. Ko hono moʻoní, ko e mahuʻinga fakakātoa ʻo e langá naʻe siʻisiʻi ʻaupito ia ʻi he meʻa naʻa nau ʻamanekiná he naʻe hao ʻa e paʻanga laka hake ʻe ua miliona ʻAmelika! Naʻe malava ki he fāmili Pētelí ke nau hiki ki he fale foʻoú ki muʻa siʻi pē pea mafola ʻa e COVID-19.

 Ko e kau Pēteli ʻi Kameluní kuo nau maʻu ʻaonga ʻi he maʻu ʻa e nofoʻanga mo e feituʻu ngāue lelei ange pea ʻoku nau vakai ki he vaʻa foʻoú ko ha meʻaʻofa ia meia Sihova. Naʻe pehē ʻe ha ongo meʻa mali ʻe taha, “ʻOkú ma loto ke ngāue mālohi ange pea fakahaaʻi ʻa e lahi ʻema fakamahuʻingaʻi ʻa e meʻaʻofa ko ení.”

 ʻŌfisi Liliu-Lea Tuʻu Mavahe Tojolabal, Mekisikou. ʻI he ngaahi taʻu lahi, ko e timi liliu-lea Tojolabal naʻa nau ngaue ʻi he vaʻa ʻo ʻAmelika Lotolotó ofi ki he Kolo ʻo Mekisikoú. Kae kehe ko e lea Tojolabal ʻoku leaʻaki tefito ia ʻi Altamirano mo Las Margaritas ʻa ia ko hono mamaʻó ko e kilomita ʻe 1,000 nai mei he vaʻá! Ko e olá naʻe faingataʻa ai ki he kau liliu-leá ke nau ʻilo ki ha ngaahi liliu fakamuimui ʻi he lea Tojolabal. Pea faingataʻa foki ki he vaʻá ke maʻu ha fanga tokoua mo e fanga tuofāfine taau ofi atu ke tokoni ki he liliu-leá mo e hiki-leʻo ʻi he lea ko iá.

 ʻI he ngaahi ʻuhinga ko ení, naʻe loto ai ʻa e Kōmiti Hiki-Tohi ʻo e Kulupu Pulé ke hiki ʻa e timi liliu-leá ki ha feituʻu ʻoku leaʻaki ai ʻa e Tojolabal. Ke aʻusia ení, naʻe fili ʻa e vaʻá ke fakatau mai ha fale ʻo fakaleleiʻi. Naʻe maʻamaʻa ange ia ʻi hano toe langa ha ʻōfisi foʻou pe totongi fakamāhina ha ʻōfisi.

 ʻOku fakamatalaʻi ʻe ha tokotaha liliu-lea ʻa e anga ʻene maʻu ʻaonga mei aí: “ʻI he taʻu ʻe hongofulu kuó u ngāue ai ko ha liliu-lea ʻi he vaʻá, naʻe ʻikai ʻaupito ke u fetaulaki mo ha fāmili ne nofo ofi mai pea lea ʻi heʻeku leá. ʻI he taimí ni ʻoku tuʻu ʻemau ʻōfisí ʻi loto ʻi he feituʻu ʻoku leaʻaki ai ʻa e lea Tojolabal. ʻOku ou fetuʻutaki maʻu pē mo kinautolu ʻi he ʻaho kotoa pē. Kuó u ako ʻa e ngaahi foʻi lea foʻou pea ʻoku toe ola lelei ange ʻeku ngāué.”

 Ki he taʻu fakangāue 2021, ʻoku ʻi ai ha palani ke fai ha ngāue ki he ngaahi ʻŌfisi Liliu-Lea Tuʻu Mavahe mo e ngaahi akoʻanga Fakateokalati ʻe 75, ʻo kapau ʻe malava. ʻE hokohoko atu ʻa e ngāue lalahi ʻe valu ʻi he ngaahi vaʻá ʻo kau ki ai ʻa e ngāue langa foʻou ʻo e ʻuluʻi ʻapitangá ʻi Ramapo, Niu ʻIoke, pehē foki ki he hiki ʻo e ongo vaʻa ʻo ʻĀsenitina mo ʻĪtalí. ʻOku toe ʻi ai foki ʻa e fiemaʻu ki ha ngaahi Fale Fakatahaʻanga foʻou laka hake ʻi he 1,000 pea fakaleleiʻi ʻa e 4,000 lahi ange. Tānaki atu ki ai, ko e ngaahi feituʻu faiʻanga fakataha laka hake ʻi he 6,000 ʻoku ʻikai ke ʻi ha tuʻunga lelei pea ʻoku fiemaʻu ke fakafoʻou.

 ʻOku anga-fēfē hono fakapaʻanga ʻa e ngāue langa mo e fakaleleiʻi ko ení? ʻI ha lāulea ki he ngāue ʻa e ʻŌfisi Liliu-Lea Tuʻu Mavahe ʻo Tojolabal, naʻe tali ai ʻa e fehuʻi ko ení ʻe Tokoua Lázaro González ko ha taha ʻo e Kōmiti Vaʻa ʻi ʻAmelika Lotolotó. “Ko e ngaahi feituʻu ʻoku tokangaʻi ʻe homau vaʻá ʻoku ʻikai haʻamau paʻanga feʻunga. Kapau naʻe ʻikai ʻa e tokoni ʻa e fanga tokoua ʻi māmani lahí heʻikai malava ke langa ʻa e ngaahi ʻōfisi liliu-lea ko ení ki homau kaungātui tuʻufonuá. Koeʻuhi ko e tokoni kuo fai ʻe he fanga tokoua ʻi māmani lahí kuo malava ai ke hiki ʻa e kau liliu-leá ʻo nofo ofi ʻi he ngaahi feituʻu ʻoku leaʻaki ai ʻenau leá tonu. ʻOku mau ʻoatu ʻemau fakamālō loto-moʻoni ki hotau fetokouaʻaki ʻi māmani lahí ki heʻenau foaki nima-homó.” Ko hono moʻoní, ʻoku malava ʻa e ngaahi ngāue langa ko ení koeʻuhi ko hoʻomou meʻaʻofa ki he ngāue ʻi māmani lahí ʻa ia ʻoku fakahoko lahi eni ʻi he donate.pr418.com.