Ko Sihová ʻokú ne saiʻia ke ne akoʻi ʻene kakaí. Ko hono olá, kuo fokotuʻu ʻe heʻene kautahá ha ngaahi akoʻanga ke akoʻi ai ʻa e kau akó ke nau fakahoko honau ngaahi vāhenga-ngāué. Ko e taha ai ko e Ako Maʻá e Kau ʻEvangeliō ʻo e Puleʻangá (SKE). ʻI he ngaahi taʻu ki muí ni maí, kuo fakahanga ʻe he kautaha ʻa e ʻOtuá ʻa e tokangá ʻo ʻikai ngata pē ki he akó kae pehē foki ki he ngaahi fale ʻe fakahoko ai ʻa e ngaahi ako fakateokalatí. Ko e taumuʻa tefitó ke fakaleleiʻi ʻa e ʻātakai ʻe fai ai ʻa e akó maʻá e kau akó mo e kau faiakó. ʻOku anga-fēfē tokoni hoʻomou ngaahi meʻaʻofá ke aʻusia ʻa e taumuʻa ko iá?

 ʻI he ngaahi taʻu lahi, ko e ngaahi ako fakateokalatí kuo fakahoko pē ʻi he ngaahi Fale Fakatahaʻangá mo e ngaahi Holo ʻAsemipilií. Ko ia, ko e hā kuo tau langa pe fakaleleiʻi ai ki muí ni mai ʻa e ngaahi fale ko ia ʻoku ngāueʻaki tāfataha pē he taimí ni ki he ngaahi ako fakateokalatí? Fakakaukau angé ki ha ʻuhinga ʻe tolu.

 Lahi ange ʻa e fiemaʻú. “Kuo līpooti mai ʻe he ngaahi ʻōfisi vaʻá ʻa e lahi ko ia ʻa e fiemaʻu ʻi he malaʻe malangá,” ko e fakamatala ia ʻa Christopher Mavor, ko ha tokotaha tokoni ki he Kōmiti Ngāue ʻa e Kulupu Pulé. “Ko e fakatātaá, ʻi he 2019, naʻe fakafuofua ʻe he vaʻa ʻi Pelēsilá ko ha kau maʻu tohi fakamoʻoni ako ʻe toko 7,600 naʻe toe fiemaʻu ko ia ke nau tokangaʻi ʻa e ngaahi fiemaʻu ʻo e ngaahi feituʻu ʻi he malumalu honau vaʻá.” Ko e vaʻa ʻi ʻAmeliká ʻoku nau līpooti ha fiemaʻu lahi ki ha kau tāimuʻa taukei ʻa ia ʻe lava ke nau akoʻi ʻa e niʻihi kehé ʻi he faifakamoʻoni makehe ʻi he ngaahi feituʻu kakai ʻi he ngaahi kolo lalahí, faifakamoʻoni ʻi he taulangá pea mo e faifakamoʻoni ʻi he pilīsoné. ʻOku toe ʻi ai foki mo e fiemaʻu ki ha fanga tokoua ke nau ngāue ʻi he Potungāue Tisaini/Langa Fakalotofonuá pea mo e Kōmiti Fetuʻutaki Fakafalemahakí. Ko e kau maʻu tohi fakamoʻoni ako mei he SKE ʻe lava ke nau feau ʻa e ngaahi fiemaʻu ko ení.

 Toe tokolahi ange ʻa e kau akó. Ko e ngaahi vaʻa lahi kuo nau maʻu ʻa e ngaahi tohi kole mei ha kau ako lahi ange ʻo laka ange ia ʻi he tokolahi ko ia ʻo e kau ako ʻe lava ke nau talí. Ko e fakatātaá, ʻi Pelēsila, naʻe maʻu ʻe he vaʻá ha ngaahi tohi kole SKE ʻe 2,500 ʻi he taʻu pē ʻe taha. Ka koeʻuhí ko e siʻisiʻi ʻa e ngaahi fale ke fakahoko ai ʻa e akó, ko e kau ako pē ʻe toko 950 naʻe lava ke tali ʻe he vaʻá.

 Nofoʻanga feʻungamālie. ʻI he taimi ʻoku fakahoko ai ʻa e akó ʻi ha Fale Fakatahaʻanga pe ʻi ha Holo ʻAsemipilī, ko e kau akó ʻoku nau faʻa nofo ʻi he ngaahi ʻapi ʻo e fanga tokoua mo e fanga tuofāfine fakalotofonuá. Ko e fokotuʻutuʻu ko iá ʻoku ngāue lelei ia ʻi he ngaahi fonua ʻa ia ʻoku siʻisiʻi pē ʻa e ngaahi ako ʻoku fakahoko ai he taʻu taki taha. Ka ʻi he taimi ʻe lahi ange ai ʻa e ako ʻe faí, heʻikai malava nai ki he kau malanga fakalotofonuá ke nau tauhi ʻa e kau akó ʻi he laui māhina ʻi he taʻu. Ko ia ʻoku tokonaki leva ʻa e ngaahi nofoʻanga ʻoku ofi ki he loki akó pea ʻoku tisaini pē maʻá e kau akó.

 Ko ha fale mo ha loki ako ʻe taha, pehē foki ki ha nofoʻanga ki he kau faiakó mo ha kau ako nai ʻe toko 30 fakataha mo ha toe ngaahi fiemaʻu kehe, ʻe lava ke aʻu ʻo tola ʻAmelika ʻe laui miliona fakakātoa ʻa e fakamole ki aí, ʻo makatuʻunga ʻi he feituʻu ʻoku tuʻu aí mo ha toe ngaahi ʻuhinga kehe.

 Ko e ngaahi akoʻangá ʻoku faʻa fokotuʻu ia ʻi ha feituʻu lōngonoa ʻi tuʻa ʻi he kolo lahí kae ofi pē ki ha senitā ʻo e fefonongaʻakí. ʻOku toe fai foki ʻa e tokanga ki he ngaahi feituʻu ko ia ʻoku tokolahi ai ʻa e kau malangá koeʻuhi ke nau lava ʻo tokoni ki hono fakalele ʻa e akó pea mo hono fakaleleiʻi ʻa e ngaahi falé mo e ngaahi meʻangāué.

 Ko e ngaahi falé ʻoku fakanaunau ʻaki ia ʻa e ngaahi laipeli, feituʻu ako, komipiuta, mīsini pulusi mo e ngaahi naunau kehe. ʻOku faʻa ʻi ai foki mo e loki kai ʻa ia ʻe lava ke kai fakataha ai ʻa e kau akó mo e kau faiakó. ʻOku toe ʻi ai foki mo ha feituʻu feʻunga ke nau fakamālohisino ai pea pehē foki ki he fakafiefiá.

 ʻOku fai foki mo e tokanga makehe ki he loki akó. “Naʻa mau kumi faleʻi ki he Potungāue Ako Fakateokalatí ke nau tokoni mai ki hono tisaini ʻo e ngaahi loki ako ʻa ia te ne toe fakaleleiʻi ange ʻa e ʻātakai ki he akó,” ko e fakamatala ia ʻa Troy, ʻokú ne ngāue mo e Potungāue Tisaini/Langa ʻi Māmani Lahi ʻi Warwick, Niu ʻIoke. “Naʻe ʻomai ʻe he fanga tokouá ʻa e fakahinohino fekauʻaki mo e lahi ʻo e loki akó pea mo hono tisainí, pehē foki ki he māmá mo e ngaahi naunau fakaleʻolahi mo e vitiō ʻa ia ʻoku fiemaʻú.” ʻI he fekauʻaki mo hono fokotuʻu ʻa e naunau fakaleʻolahí, ʻoku pehē ʻe Zoltán, ko ha faiako SKE ʻi Hungali: “ʻI he kamataʻangá, naʻe ʻikai ke ʻi ai haʻamau maika, ko ia naʻa mau faʻa fakamanatu ange ki he kau akó ke nau lea leʻo-lahi. Ka ʻi he taimi ní ʻi he ʻi ai ko ia ʻa e maika ʻi he tesi taki taha, kuo fakaleleiʻi ʻa e palopalemá!”

 Kuo anga-fēfē maʻu ʻaonga ʻa e kau faiakó mo e kau akó mei he ngaahi fale ko eni kuo fakaleleiʻí? “Ko ha ʻātakai mātuʻaki nonga ia,” ko e lea ia ʻa Angela, naʻá ne kau ki he SKE ʻi Palm Coast, Fololita, ʻAmelika. “Ko e ngaahi meʻa kotoa pē naʻe fakakaukauʻi lelei ʻaupito, kau ki ai ʻa e fokotuʻutuʻu ʻo e ngaahi loki akó mo homau ngaahi lokí koeʻuhí ke mau lava ʻo tokangataha ki he akó.” Ko Csaba, ko ha faiako ʻi Hungali, ʻokú ne houngaʻia ʻi he ngaahi faingamālie ke kai fakataha mo e kau akó. ʻOkú ne pehē ʻi he ngaahi taimi ko ení, “ʻoku faʻa fiefia ʻa e kau akó ke nau talanoa tauʻatāina mo vahevahe mai kiate kimautolu ʻenau ngaahi hokosiá. ʻI he foungá ni, ʻoku mau hoko ai ʻo ʻiloʻi lelei ange ʻa e kau akó. Ko hono olá leva, ʻe lava ke mau ngāueʻaki ola lelei ange ʻa e akó ʻo fakatatau ki heʻenau ngaahi fiemaʻú.”

 ʻOku vakai ʻa e kau akó mo e kau faiakó ki he ngaahi fale faiʻanga ako ko eni kuo fakaleleiʻí ko ha tāpuaki mei hotau “Faiako Maʻongoʻongá,” ko Sihová. (ʻAisea 30:20, 21) Ko ha tuofefine ʻi Filipaini ʻa ia naʻá ne kau ki he SKE ʻi ha fale naʻe liliu ko ha feituʻu faiʻanga ako ʻokú ne pehē: “Ko e ʻātakai ʻo e akoʻangá ʻokú ne fakamanatu mai ʻoku ʻikai ko ha kau ako pē kimautolu ka ko kimautolú ko ha kau fakaafe makehe ʻa Sihova. ʻOkú ne loto ke tau fiefia ʻi heʻetau ako fakaʻauliliki ʻene Folofolá.”

 Ko e ngaahi fale faiʻanga akó ʻe lava ke langa, monomono pea tauhi ia koeʻuhí ko hoʻomou ngaahi tokoní, ‘a ia ko e lahi tahá ʻoku fai fakafou ʻi he donate.pr418.com. Fakamālō lahi atu ki hoʻo nima-homó.