ʻI Maʻasi 2020, ʻi he taimi naʻe fanongonongo ai ʻe he Kautaha Moʻui ʻa Māmaní ʻa e mahaki fakaʻauha COVID-19, naʻe ʻikai ala fakakaukau atu ʻa e tokolahi ʻe kei mafola pē ʻi he māmaní ʻi ha taʻu ʻe taha mei ai. Ko e kakai ʻe laui miliona, kau ai ʻa e niʻihi ʻo e Kau Fakamoʻoni ʻa Sihová, kuo uesia fakaesino, fakaeongo mo fakapaʻanga kinautolu ʻe he mahaki fakaʻauhá. Kuo anga-fēfē hono fokotuʻutuʻu mo tufaki ʻe he Kau Fakamoʻoni ʻa Sihová ʻa e tokoní lolotonga ʻa e faingataʻa ko ení?

 ʻI he malumalu ʻo e tataki ʻa e Kōmiti Kouʻotineita ʻo e Kulupu Pule ʻa e Kau Fakamoʻoni ʻa Sihová, naʻe fokotuʻu ʻa e Kōmiti Tokoni Fakatamaki (DRC) ʻe 950 tupu takatakai ʻi he māmaní ke ngāue ki he COVID-19. ʻI he tuʻunga ʻe niʻihi, kuo nau fokotuʻutuʻu ki ha tokoni fakalotofonua, pea ʻi he ngaahi tuʻunga ʻe niʻihi, kuo maʻu ʻaonga ʻa e Kau Fakamoʻoní mei he tokoni ʻa e puleʻangá. Kuo toe fokotuʻu ʻe he DRC ʻa e ngaahi tokoní ʻi ha tuʻunga lahi ange.

 Ko e fakatātaá, fakakaukau angé ki he tuʻunga ʻi Palakueí. Naʻe līpooti ʻi ha nusipepa ʻe taha koeʻuhi ko e uesia fakaʻekonōmika ʻi he mahaki fakaʻauhá, “ko e kau Palakuei tokolahi ʻoku nau fiekaia ʻi honau ngaahi ʻapí tonu.” Ka ko e DRC ʻi Palakueí naʻa nau ʻosi kamata tufaki ʻa e fanga kiʻi kofukofu ʻoku faʻo ai ʻa e ʻū meʻa ʻo fakafuofua ki ha uike ʻe ua​—ko e meʻakai feʻunga mo e naunau ki he fakamaʻá ki ha fāmili ʻo e toko fā. Ko e kofukofu taki taha naʻe tola ʻAmelika ʻe $30 hono mahuʻingá.

 ʻOku anga-fēfē hono maluʻi ʻe he kau ngāue tokoni ko ení kinautolu pea mo e niʻihi kehé mei he COVID-19? ʻOku nau tui ʻa e ngaahi meʻa maluʻi he matá pea tauhi ʻa e vā mamaʻó. ʻOku nau toe fakapapauʻi ko e ngaahi kautaha ʻoku nau ʻomai ʻa e meʻakaí ʻoku nau fakamaʻa ia pea ʻoku nau mātuʻaki tokanga ki he tuʻunga malú. ʻOku kau heni ʻa hono fakapapauʻi ko e faʻahinga kotoa ʻoku nau faʻo ʻa e fanga kiʻi kofukofú ʻoku nau tui ʻa e ngaahi teunga maluʻí, fakamaʻa ʻenau ngaahi meʻalelé pea tauhi ʻa e ngaahi kofukofú ʻi he ngaahi feituʻu ʻoku ʻosi fakamaʻa. Fakaʻosí, ko e faʻahinga ʻoku nau ʻave ʻa e fanga kiʻi kofukofú ʻoku nau tauhi ʻa e vā mamaʻó mei he fanga tokoua ʻoku nau ʻave ki aí.

 ʻI Sanuali 2021, naʻe tali ʻe he Kōmiti Kouʻotineitá ke ngāueʻaki ʻa e tola ʻAmelika ʻe 25 miliona ki he tokoni ki he COVID-19. ʻOku levaʻi lelei ʻe he ngaahi vaʻá mo e Ngaahi Kōmiti Tokoni Fakatamakí ʻa e paʻanga tokoni ko ení pea feinga mālohi ke kumi ki he totongi lelei taha ki he ngaahi naunau ʻoku fiemaʻú. Ko e fakatātaá, ʻi Sili, ko e fanga tokoua naʻa nau fokotuʻutuʻu ʻa e ngāue tokoní naʻa nau loto ke fakatau ha lenitile kilokalami ʻe 750 (pāuni ʻe 1,653). Ka ko e totongi ʻo e lenitilé naʻe liunga ua ia ʻi ha māhina pē taha! ʻI he hili ha houa mei heʻenau loto-taha ke fakatau ʻa e lenitile ʻi he totongi ko ia kuo hikí, naʻe tala ange ʻe he tokotaha tuʻuaki koloá naʻe ʻi ai ha tokotaha fakatau ʻe taha naʻá ne toki fakafoki mai ʻene ʻota lenitilé. Ko ia ʻi he ʻikai ke fakatau ia ʻaki ʻa e totongi kuo hiki ʻa ia naʻa nau ʻosi felotoi ki aí, naʻe toe fakatau atu ʻe he tokotaha tuʻuaki koloá ʻa e lenitilé ki hotau fanga tokouá ʻi he totongi ko ia ʻo e māhina ki muʻá!

 Kae kehe, ʻi he ʻalu atu hotau fanga tokouá ke ʻomai ʻa e lenitilé, naʻe feinga ʻa e tokotaha tuʻuaki koloá ke ne kaniseli ʻa e aleá, ʻo tukuakiʻi kinautolu ki he ʻikai ke nau tufotufa tatau ʻa e meʻakaí, ʻo hangē ko e ngaahi kautaha kehé. Hili ha lotu fakalongolongo, naʻe tala ange ʻe he taha hotau fanga tokouá ki he tokotaha tuʻuaki koloá kuo fai ha savea ʻi he fakatahaʻanga taki taha ke ʻiloʻi pe ko hai ʻoku fiemaʻu tokoni lahi tahá. Naʻe toe fakamatalaʻi ʻe he tokouá koeʻuhi ko e kehekehe ʻo e puipuituʻa fakafonua ʻo e tokotaha taki taha, ko e kofukofu tokoni taki taha ʻe faʻo pē ai ʻa e ngaahi meʻa ʻe ʻaonga lahi taha ki he fāmili ʻoku nau maʻu iá. Fakaʻosí, naʻa nau fakapapauʻi ki he tokotaha tuʻuaki koloá ko e paʻanga tokoni mo e ngāue kotoa ʻoku fakahoko maʻá e Kau Fakamoʻoni ʻa Sihová ʻoku fai ʻi he loto-lelei pē. Naʻá ne ʻohovale. Naʻe ʻikai ngata pē ʻi he loto-lelei ʻa e tokotaha tuʻuaki koloá ke tuku hifo ʻa e totongí ka naʻá ne toe foaki mo e lenitile kilokalami ʻe 400 (pāuni ʻe 882) ki he ʻota hono hoko ʻa e fanga tokouá.

 Ko Lusu, ko ha uitou taʻumotuʻa ʻi Laipīlia, ʻokú ne nofo mo ha toko nima ʻi hono fāmilí. ʻI haʻanau kai pongipongi pea lāulea ki he konga Tohi Tapu fakaʻahó, naʻe fakatokangaʻi ʻe he mokopuna taʻu fitu ʻo Lusu naʻe ʻikai ke toe ʻi ai ha meʻakai ʻi honau falé. Naʻá ne ʻeke ange, “Ko e hā te tau kaí?” Naʻe fakapapauʻi ange ʻe Lusu naʻá ne ʻosi lotu ki ha tokoni pea naʻá ne tuipau ʻe tokonaki ʻa Sihova maʻa kinautolu. ʻI he efiafi pē ko iá, naʻe tā mai ha mātuʻa ʻi he fakatahaʻangá kia Lusu ke ne ʻalu ange ʻo ʻomai ha meʻakai. ʻOkú ne pehē: “Naʻe tala mai ʻe hoku mokopuná ko ʻene toki ʻiloʻi eni ʻoku fanongo mai ʻa Sihova mo tali ʻa e ngaahi lotú koeʻuhí naʻe tali ʻe Sihova ʻeku lotú.”

 Ko ha fefine ʻi he Lepupilika Temokalati ʻo Kongó ʻokú ne kaungāʻapi mo ha fāmili Fakamoʻoni. Hili ʻene sio ki hono maʻu ʻe he fāmilí ʻa e meʻakai mei honau kaungātuí, naʻá ne pehē: “Hili ʻa e mahaki fakaʻauhá, te u hoko ko e taha ʻo e Kau Fakamoʻoni ʻa Sihová koeʻuhi kuo nau tokangaʻi honau fanga tokouá mo e fanga tuofāfiné lolotonga ʻa e taimi faingataʻa ko ení.” Naʻe ʻeke ange ʻe hono husepānití, “Te ke hoko ko e taha ʻo e Kau Fakamoʻoni ʻa Sihová koeʻuhí pē ko ha tangai laise?” Naʻá ne tali ange, “ʻIkai ʻaupito, ka ko e tangai laise ko iá ko e fakamoʻoni ia ʻo e ʻofa moʻoní.”

 Ko e Kau Fakamoʻoni ʻa Sihová kuo malava ke nau ngāue vave ki he ngaahi fiemaʻu hotau fanga tokouá mo e fanga tuofāfiné lolotonga ʻa e mahaki fakaʻauha ko ení koeʻuhi ko hoʻo tokoni nima-homó. Fakamālō atu ki hoʻo ngaahi tokoni kuó ke fai ʻo ngāueʻaki ʻa e ngaahi founga ʻoku fakamatalaʻi ʻi he donate.pr418.com.