ʻI he ʻOlimipiki ʻo e 2024, ʻoku fakafuofua ko e kakai ʻe nima piliona nai te nau mamata ki he feʻauhi ʻa e kau ʻatelita mei he ngaahi fonua ʻe 206. “ʻOku tau kau ki ha kātoanga ʻokú ne fakafāʻūtahaʻi ʻa e māmaní ʻi he melino,” ko e lau ia ʻa Thomas Bach, ko e palesiteni ʻo e Kōmiti ʻOlimipiki Fakavahaʻapuleʻangá. “Tau kātoangaʻi ʻa e ʻOlimipiki ko ení ʻi he laumālie ʻo e nofo melino, ʻi he tuʻunga ko kitautolu pē taha ʻa e faʻahinga ʻo e tangatá, ʻoku fāʻūtaha neongo ʻetau kehekehé.”

 ʻE lava ʻe he ʻOlimipikí ʻo aʻusia ha ngaahi taumuʻa taumamaʻo pehē? ʻOku ʻi ai ha ʻamanaki ki ha melino mo ha fāʻūtaha moʻoni?

 Ko e ʻOlimipiki ʻo e taʻu ní kuo kau ki ai ʻa e meʻa lahi ange ʻi he sipotí pē. ʻI he ngaahi feʻauhí kuo fakamamafaʻi ai ʻa e ngaahi ʻīsiu fakasōsialé mo e fakapolitikalé ʻa ia ʻokú ne fakamavahevaheʻi ʻa e kakaí. Ko e ngaahi ʻīsiu ko ení ʻoku kau ki ai ʻa e ngaahi totonu ʻa e tangatá, lau lanú, kehekehe fakalotú mo e ngaahi fefaikehekeheʻakí.

 Ko e ngaahi feʻauhi ʻi he sipoti fakavahaʻapuleʻangá hangē ko e ngaahi ʻOlimipikí ko ha taimi fakafiefia. Kae kehe, ko e ngaahi feʻauhi ko ení ʻokú ne toe fakaeʻa pea pouaki ʻa e ngaahi tōʻonga mo e fakakaukau fakatupu māvahevahe ʻo ʻikai ke taki atu ki he melino mo e fāʻūtaha tuʻuloá.

 Naʻe tomuʻa tala ʻe he Tohi Tapú ʻa e ngaahi tōʻonga te ne ʻai ke faingataʻa hono maʻu ʻa e fāʻūtahá ʻi he ʻahó ni. (2 Tīmote 3:1-5) Ke lau lahi ange fekauʻaki mo e kikite Fakatohitapu ko ení, lau ʻa e kupu “Did the Bible Predict the Way People Think and Act Today?”

 ʻOku ʻomai ʻe he Tohi Tapú ʻa e ʻamanaki moʻoni ki ha melino mo e fāʻūtaha ʻi māmani lahi. ʻOku talaʻofa mai ai ko e kakai kotoa ʻi he māmaní te nau fāʻūtaha ʻi he malumalu ʻo e founga pule fakahēvani ʻa e “Puleʻanga ʻo e ʻOtuá.”​—Luke 4:43; Mātiu 6:10.

 Ko e Tuʻi ʻo e Puleʻanga ko iá ʻa Sīsū Kalaisi, te ne ʻomai ʻa e melinó ki he māmaní kotoa. ʻOku pehē ʻe he Tohi Tapú:

•   “ʻE tupu ʻāfaʻafa ai ʻa e māʻoniʻoní, pea ko e melinó ʻe hulu fau.”​—Saame 72:7.

•   “Te ne fakahaofi ʻa e masiva ʻoku tangi ki ha tokoní . . . Te ne fakahaofi kinautolu mei he fakafeʻātungiá pea mei he fakamālohí.”​—Saame 72:12, 14.

 Naʻa mo e ʻahó ni, kuo fakafāʻūtahaʻi ʻe he ngaahi akonaki ʻa Sīsuú ʻa e kakai ʻe laui miliona ʻi he ngaahi fonua ʻe 239. ʻI he tuʻunga ko e kau Kalisitiané, ko e Kau Fakamoʻoni ʻa Sihova takatakai ʻi he māmaní kuo nau ako ke hoko ʻo fakamelino. Ke ʻiloʻi ʻa e foungá, lau ʻa e kupu ʻo e ʻīsiu ʻo e Taua Leʻo ʻoku fakakaveinga ko e “Fakangata ʻa e Tāufehiʻá.”