Ko e kakai takatakai he māmaní ʻoku nau hokosia ʻa e vela lahi fakaʻulia ʻa e ʻeá pea mo e ngaahi fakatamaki kehe fakatupunga ʻe he feliuliuaki ʻa e ʻeá. Fakatokangaʻi ʻa e ngaahi līpooti ko ení:

•   “Ko e toki māhina Sune vela taha eni ʻi he māmaní talu mei hono lēkooti ʻa e fua māfaná ʻi he taʻu ʻe 174 kuo maliu atú.”​—National Oceanic and Atmospheric Administration, U.S. Department of Commerce, Siulai 13, 2023.

•   “Ko ʻĪtali, Sipeini, Falanisē, Siamane mo Pōlani ʻoku nau fehangahangai kotoa mo ha vela lahi fakaʻulia ʻa e ʻeá pea mo e fakafuofua ko e fua māfana ʻo e ʻeá ʻe kaka ʻo aʻu ki he tikilī Selosiasi ʻe 48 [118°F] ʻi he motu ko Sisilī mo Sātiniá – ʻo ngalingali ko e fua māfana vela taha ia kuo faifai ange ʻo lēkooti ʻi ʻIulopé.”​—European Space Agency, Siulai 13, 2023.

•   “ʻI he fakaʻaʻau ke māfana ange ʻa e foʻi palanité, ʻoku ʻamanekina ʻe toe lahi ange, fakautuutu ange mo hokohoko ange ʻa e ʻuha lahí, ʻo taki atu ki he ngaahi tāfea lahi ange.”​—Stefan Uhlenbrook, ko ha talēkita ʻi he Kautaha Fakamatala ʻEa ʻi Māmani Lahí, Siulai 17, 2023.

 ʻOkú ke hohaʻa ʻi he fakautuutu ʻa e ngaahi līpooti fekauʻaki mo e fakatamaki fakatupunga ʻe he feliuliuaki ʻa e ʻeá? Fakakaukau ki he meʻa ʻoku leaʻaki ʻe he Tohi Tapú fekauʻaki mo e kaveinga mahuʻinga ko ení.

 ʻIo. Ko e vela lahi fakaʻulia ʻa e ʻeá ʻi māmani lahí mo e ngaahi fakatamaki kehe fakatupunga ʻe he feliuliuaki ʻa e ʻeá ʻoku fehoanaki ia mo e ngaahi meʻa naʻe tomuʻa tala ʻe he Tohi Tapú ʻe hoko ʻi hotau taimí. Ko e fakatātaá, naʻe kikiteʻi ʻe Sīsū te tau sio ki he “ngaahi meʻa fakamanavahē,” pe “ngaahi meʻa anga-kehe mo fakailifia.” (Luke 21:11; Good News Translation) Ko e fakautuutu ʻa e māfana ʻo e ʻeá ʻi māmani lahí kuó ne ʻai ʻa e tokolahi ke nau manavahē naʻa hanga ʻe he faʻahinga ʻo e tangatá ʻo fakaʻauha ʻa e foʻi māmaní.

 ʻIkai. Naʻe fakatupu ʻe he ʻOtuá ʻa e māmaní ke hoko ko hotau ʻapi tuʻuloa; heʻikai ke ne fakaʻatā ʻa e faʻahinga ʻo e tangatá ke nau fakaʻauha ia. (Saame 115:16; Tangata Malanga 1:4) Ko hono moʻoní, kuó ne talaʻofa te ne “fakaʻauha ʻa e faʻahinga ʻoku nau fakaʻauha ʻa e māmaní.”​—Fakahā 11:18.

 ʻOku fakahaaʻi mai ʻe he Tohi Tapú ko e ʻOtuá ʻe lava pea te ne maluʻi ʻa e māmaní mei he fakatamaki fakaeʻātakaí.

•   “[Ko e ʻOtuá] ʻokú ne fakanonga ʻa e fuʻu matangí; ʻoku hoko ʻo sīlongo ai ʻa e ngaahi peau ʻo e tahí.” (Saame 107:29) Ko e ʻOtuá ʻokú ne maʻu ʻa e mālohi ke puleʻi ʻa e ngaahi ʻelemēniti ʻo natulá. ʻOkú ne malava ke fakaleleiʻi ʻa e ngaahi palopalema fakaeʻātakai ʻa ia ʻokú ne lolotonga fakatupunga ʻa e kakaí ke nau faingataʻaʻia ʻi he ngaahi fakatamaki lahi fakatupunga ʻe he feliuliuaki ʻa e ʻeá.

•   “ʻOkú ke tokangaʻi ʻa e māmaní, ʻo ʻai ia ke fua lahi pea mahu ʻaupito.” (Saame 65:9) ʻI he tāpuaki ʻa e ʻOtuá, ko e māmaní ʻe hoko ko ha palataisi.

 Ke ako lahi ange fekauʻaki mo e talaʻofa ʻa e Tohi Tapú ke fakaleleiʻi ʻa e ʻātakaí, sio ki he kupu “Ko Hai Te Ne Fakahaofi ʻa e Māmaní?”