Ko e fakamālohi fakakaukengí ʻokú ne lōmia ʻa Haiti. Ko e faihia fakamālohí ʻokú ne ʻai ke faingataʻaʻia ʻa ʻAfilika Tonga, Mekisikou mo e ngaahi fonua kehe ʻo ʻAmelika Latiná. Naʻa mo e ʻi he ngaahi feituʻu ʻoku ʻalu ke siʻisiʻi ange ai ʻa e fakamālohí, kuo hoko hono līpooti ʻo e maumau-laó ke ne ʻai ke ongoʻi ʻikai ke malu mo loto-mafasia ai ʻa e kakaí.

 Ko e hā ʻoku leaʻaki ʻe he Tohi Tapú ʻo fekauʻaki mo e maumau-lao ʻoku hoko ʻi māmani lahí?

 Naʻe tomuʻa tala ʻe he Tohi Tapú ko e maumau-laó ko ha konga ia ʻo e fakaʻilonga ʻo e “fakaʻosiʻosi ʻo e fokotuʻutuʻu lolotongá.” (Mātiu 24:3) ʻI hono fakamatalaʻi ʻa e ngaahi meʻa ʻa ia ʻe faʻuʻaki ʻa e fakaʻilonga ko iá, naʻe pehē ʻe Sīsū Kalaisi:

•   “Koeʻuhi ko e fakautuutu ʻa e maumau-laó, ʻe fakaʻaʻau ʻo momoko ʻa e ʻofa ʻa e tokolahi.”​—Mātiu 24:12.

 Naʻe toe tomuʻa tala ʻe he Tohi Tapú “ʻi he ngaahi ʻaho fakaʻosí” ko e kakaí ʻe ‘ʻikai ke nau maʻu ʻa e mapuleʻi-kitá, anga-kakaha, ʻikai ʻofa ki he lelei.’ (2 Tīmote 3:1-5) Ko e tōʻonga siokita peheé ʻokú ne pouaki ʻa e tōʻonga maumau-lao ʻoku tau sio ai ʻi he ʻaho ní.

 Ka ʻoku tau maʻu ʻa e ngaahi ʻuhinga lelei ki ha ʻamanaki. ʻOku talaʻofa ʻe he Tohi Tapú ʻoku vavé ni ke toʻo ʻosi atu ʻa e maumau-laó.

•   “ʻOku toe siʻi pē, pea ʻe ʻikai toe ʻi ai ʻa e kau fulikivanú; te ke fakasio ʻa e feituʻu naʻa nau ʻi aí, ka ʻe ʻikai te nau ʻi ai. Ka ko e anga-vaivaí te nau maʻu ʻa e māmaní, pea te nau maʻu ʻa e fiefia lahi ʻi he melino hulu fau.”​—Saame 37:10, 11.

 Ako lahi ange fekauʻaki mo e pōpoaki Fakatohitapu ʻo e ʻamanakí pea mo e ʻuhinga ʻe lava ke ke fakapapauʻi ko e ngaahi meʻa ʻoku tau sio ai ʻi he ʻaho ní ko hono fakahoko ia ʻo e ngaahi kikite Fakatohitapú. Vakaiʻi ʻa e ngaahi kupu hono hokó.

 “Ko ha ʻAmanaki Moʻoni ki ha Kahaʻu Lelei Ange”

 “Ko e Hā ʻa e Fakaʻilonga ʻo e ‘Ngaahi ʻAho Fakaʻosí’ pe ‘Taimi Fakamui’?”

 “Naʻe Tomuʻa Tala ʻe he Tohi Tapú ʻa e Anga ʻo e Fakakaukau mo e Tōʻonga ʻa e Kakaí he ʻAho Ní?”