ʻI ʻOkatopa 9, 2024, naʻe tuku ange ai ʻe he World Wildlife Fund ha līpooti fakatupu tokanga fekauʻaki mo e uesia ʻoku fakatupunga ʻe he ngāue ʻa e tangatá ki he fanga manu kaivaó. Naʻe fakahaaʻi ai naʻe “laka hake ʻi he taʻu ʻe 50 kuohilí (1970-2020), naʻe fakaʻavalisi ko e tokolahi ʻo e fanga manu kaivaó kuo holo ʻaki ia ʻa e 73%.” Naʻe ʻomai ʻe he līpōtí ha fakatokanga: “ʻOku mau leaʻaki ʻi he tuipau ko e meʻa ʻe hoko ʻi he taʻu ʻe nima ka hokó te ne fakaeʻa mai ai ʻa e kahaʻu ʻo e moʻui ʻe ʻi ai ʻa e Māmaní.”

 Ko e kakai tokolahi ʻoku nau ʻohovale ʻi he līpooti ko ení. ʻOku tau ʻofa ʻi hotau foʻi palanite fakaʻofoʻofá pea fehiʻa ʻi he sio ki he faingataʻaʻia ʻa e fanga manu kaivaó. ʻOku tau ongoʻi peheé koeʻuhi naʻe fakataumuʻa ʻe he ʻOtuá ke tau tokangaʻi ʻa e fanga manú.​—Sēnesi 1:27, 28; Palōveepi 12:10.

 Ka te ke fifili nai, ‘ʻE malava ke tau maluʻi ʻa e fanga manu kaivao ʻi he māmaní mo honau ʻātakaí? Ko e hā ʻa e lau ʻa e Tohi Tapú?’

 Neongo ʻetau ngaahi feinga lelei tahá, ko e kahaʻu ʻo e fanga manu kaivao ʻi he māmaní ʻoku ʻa e ʻOtuá tokotaha pē ia. ʻOku tomuʻa tala ʻi he Tohi Tapú ʻo fakatatau ki he Fakahā 11:18, ko e ʻOtuá te ne “fakaʻauha ʻa e faʻahinga ʻoku nau fakaʻauha ʻa e māmaní.” ʻOku akoʻi mai ʻe he veesi ko ení ha meʻa ʻe ua:

1.  1. Ko e ʻOtuá te ne taʻofi ʻa e kakaí mei hono maumauʻi fakaʻaufuli pe ko hono fakaʻauha ʻa e māmaní.

2.  2. ʻE vavé ni ke ngāue mai ʻa e ʻOtuá. ʻOku anga-fēfē ʻetau ʻiloʻi iá? Koeʻuhí kuo ʻikai ha taimi ʻi he hisitōliá ʻe mātuʻaki fakatuʻutāmaki ange ka ko e ʻahó ni, ʻa e feinga ko ia ʻa e faʻahinga ʻo e tangatá ke nau fakaʻauha ʻa e fanga manu kaivaó.

 Ko e hā ʻe fai ʻe he ʻOtuá ke fakaleleiʻiʻaki ʻa e palopalema ko ení? Te ne ngāueʻaki hono puleʻanga fakahēvaní pe Puleʻangá ke pule mai ki he māmaní kotoa. (Mātiu 6:10) Ko e puleʻanga ko iá te ne tokonaki mai ki he faʻahinga talangofua ʻo e tangatá ʻa e ako ʻoku nau fiemaʻú ki he founga ke tokangaʻi mo maluʻi ai ʻa e fanga manu kaivao ʻo e māmaní.​—ʻAisea 11:9.