ʻI he 2023, naʻe ʻiloʻi ʻe he kau mataotao ʻi he moʻui leleí ko e ongoʻi taʻelatá ko ha palopalema mafatukituki ia ʻi he moʻuí ʻoku nau fiemaʻu ke fai ha tokanga ki ai. ʻOku ʻi ai ha fakaleleiʻanga ki he ongoʻi taʻelatá?

•   “ʻI he taimi ʻoku tau ongoʻi taʻelata ai pea fakamavaheʻi kitautolu mei he niʻihi kehé, ʻe lava ke ne uesia lahi ʻetau moʻui leleí mo ʻetau fiefiá,” ko e lau ia ʻa Toketā Vivek Murthy, ko e ʻōfisa pule fakafaitoʻo ʻa ʻAmeliká. Ka ʻokú ne toe pehē: “ʻOku malava ke tau fai ha meʻa ki ai.” Anga-fēfē? “ʻE lava ke tau fai ha fanga kiʻi ngāue ʻi he ʻaho taki taha ke fakaivimālohiʻi hotau vahaʻangatae mo e niʻihi kehé.” a

 ʻOku ʻikai ke tau ongoʻi taʻelata pē ʻi heʻetau fakamavaheʻi-kitá. Ko e niʻihi ʻoku nau ongoʻi taʻelata nai naʻa mo e ʻi he haʻohaʻonga ʻo e kakaí. Tatau ai pē pe ko e hā ʻa e tupuʻanga ʻo ʻetau ongoʻi taʻelatá, ʻe lava ke tokoni mai ʻa e Tohi Tapú. ʻOku ʻi ai ʻa e faleʻi ʻaonga ʻe lava ke ne tokoniʻi kitautolu ke ikuʻi ʻaki ʻa e ongoʻi taʻelatá fakafou ʻi hono fakaivimālohiʻi hotau vahaʻangatae mo e niʻihi kehé.

 Hoko ko ha tokotaha ʻoku fetuʻutaki lelei. ʻOku kau ki heni ʻa e ʻikai ngata pē ho vahevahe atu hoʻo ngaahi ongoʻí kae hoko foki ko ha tokotaha ʻoku fanongo lelei. Ko e lahi ange hoʻo fakahāhā ʻa e mahuʻingaʻia ki ha tokotaha, ko e mālohi ange ia hoʻomo vahaʻangataé.

•   Tefitoʻi moʻoni Fakatohitapú: “ʻOua ʻe kumi pē ki he lelei ʻa kimoutolú, kae kumi foki ki he lelei ʻa e niʻihi kehé.”—Filipai 2:4.

 ʻOua ʻe fakangatangata ho ngaahi kaungāmeʻá. Loto-lelei ke fakakaungāmeʻa mo e faʻahinga ʻoku motuʻa ange pe kei talavou ange ʻiate koé pe ki he faʻahinga ʻoku kehe honau anga-fonuá pe fonua ʻoku nau hau mei aí.

•   Tefitoʻi moʻoni Fakatohitapú: “Mātuʻaki fakaava atu ʻe kimoutolu foki homou lotó.”—2 Kolinitō 6:13.

 Ki ha fakamatala lahi ange ki he founga ke fakatupulekina ai ha kaumeʻa mālohi mo e niʻihi kehé, lau ʻa e kupu “Fakalato ʻEtau Fiemaʻu ha Kaungāmeʻá.”