ʻOku fakafuofua ki he kakai ʻe toko nima piliona ʻoku nau mamata ʻi he Ipu ʻa Māmani ʻa e FIFA ʻa ia naʻe kamata fakahoko ʻi Nōvema 20 ki Tīsema 18, 2022. Ko e tokolahi ʻoku nau ongoʻi ko e ngaahi feʻauhi sipoti peheé ʻokú ne maʻu ʻa e malava ke fakahoko ʻa e meʻa lahi ange ʻi hono fakafāʻūtahaʻi pē ʻa e kakaí ko e kau mamata.

•   “Ko e sipotí ʻokú ne maʻu ʻa e mālohi ke liliu ʻa e māmaní. ʻOkú ne maʻu ʻa e mālohi ke ne ueʻi ha taha. ʻOkú ne maʻu ʻa e mālohi lahi ke fakafāʻūtahaʻi ʻa e kakaí ʻi ha toe founga.”​—Nelson Mandela, palesiteni mālōlō ʻo ʻAfilika Tonga.

•   “Ko e soká . . . ʻokú ne fakafāʻūtahaʻi ʻa e kakaí ʻi he ʻamanaki, fakafāʻūtahaʻi ʻi he fiefia, fakafāʻūtahaʻi ʻi hono mamahiʻi e vaʻingá, fakafāʻūtahaʻi ʻi he ʻofa, pehē foki ki he ngaahi matakalí.”​—Gianni Infantino, palesiteni ʻo e FIFA. a

 ʻE lava ʻe he feʻauhi Ipu ʻa Māmaní pe ko ha faʻahinga sipoti pē ʻo aʻusia ʻa e ngaahi taumuʻa māʻolunga pehē? ʻOku ʻi ai koā ha ʻamanaki ki ha melino mo e fāʻūtaha?

 Ko e feʻauhi Ipu ʻa Māmani ʻo e taʻu ní kuo kau ki ai ʻa e meʻa lahi ange ʻi he soká pē. Ko e ngaahi taú kuó ne kamataʻi ʻa e ngaahi tālanga ʻi he ʻīsiu fakasōsiale mo fakapolitikale kau ai ʻa e totonu ʻa e tangatá, lau-lanú mo e ʻikai vahevahe tatau fakaʻekonōmiká.

 Neongo ia, ko e tokolahi ʻoku nau ʻiloʻi ko e ngaahi feʻauhi sipoti fakavahaʻapuleʻangá hangē ko e Ipu ʻa Māmaní ʻoku hoko ia ko ha meʻa fakafiefia. Kae kehe, neongo ko e loto ia ʻo e kakai tokolahi ke pehē, ka ko e ngaahi feʻauhi ko ení heʻikai ke ne tokonaki mai ʻa e fāʻūtaha tuʻuloá. ʻI hono kehé, ʻoku faʻa hā mei ai ʻa e ngaahi fakakaukau mo e tōʻonga fakatupu māvahevahe ʻa ia naʻe pehē ʻe he Tohi Tapú te ne fakaʻilongaʻi ʻa e vahaʻa taimi ʻoku ui ko e “ngaahi ʻaho fakaʻosí.”​—2 Tīmote 3:1-5.

 ʻOku maʻu ʻi he Tohi Tapú ha ʻamanaki moʻoni ki ha fāʻūtaha ʻi māmani lahi. ʻOku talaʻofa mai ai ko e kakai kotoa ʻi he māmaní ʻe fakafāʻūtahaʻi kinautolu ʻi he malumalu ʻo ha founga-pule fakahēvani ʻoku ui ko e “Puleʻanga ʻo e ʻOtuá.”​—Luke 4:43; Mātiu 6:10.

 Ko e Tuʻi ʻo e Puleʻanga ko iá, ʻa Sīsū Kalaisi, te ne fakapapauʻi ʻe ʻi ai ʻa e melino ʻi māmani lahi. ʻOku pehē ʻe he Tohi Tapú:

•   “ʻE tupu ʻāfaʻafa ai ʻa e māʻoniʻoní, pea ko e melinó ʻe hulu fau.”​—Saame 72:7.

•   “Te ne fakahaofi ʻa e masiva ʻoku tangi ki ha tokoní . . . Te ne fakahaofi kinautolu mei he fakafeʻātungiá pea mei he fakamālohí.”​—Saame 72:12, 14.

 Naʻa mo e ʻi he ʻahó ni, ko e ngaahi akonaki ʻa Sīsuú kuó ne ʻosi fakafāʻūtahaʻi ʻa e kakai ʻe laui miliona ʻi he fonua ʻe 239. Kuo nau ako ke tuku ange ʻa e tāufehiʻá. Ke ako lahi ange, lau ʻa e ngaahi kupu hokohoko ʻi he kaveinga “Fakangata ʻa e Tāufehiʻá.”