Lolotonga ʻa Siulai 2022, naʻe līpooti ʻa e liliu fakaʻulia ʻa e māfana ʻo e ʻeá ʻi māmani lahi:

•   “ʻOku fakatokanga ʻa Siaina ki ha vela fakaʻulia ʻa e ʻeá ki he ngaahi kolo lalahi ofi he 70 ko e tuʻo uá ia ʻi he māhiná ni.”​—Siulai 25, 2022, CNN Wire Service.

•   “Ko e ngaahi vela vaó kuo hoko takatakai ia ʻi ʻIulope tupu mei he māfana fakaʻulia ko ia ʻa e ʻeá.”​—Siulai 17, 2022, The Guardian.

•   “Ko e ngaahi kolo lalahi ʻi ʻAmeliká naʻe lēkooti ai ʻi he Sāpaté ʻa e vela lahi fakaʻulia ʻa e ʻeá ʻi ha toe taimi ki muʻa ʻo aʻu atu ki he Matāfanga Fakahahaké pea mo e konga ʻo e tafaʻaki Fakatongá mo e feituʻu Fakahihifó.”​—Siulai 24, 2022, The New York Times.

 Ko e hā ʻoku hoko ai ʻa e ngaahi meʻa kotoa ko ení? ʻE faai atu pē ʻo ʻikai toe lava ha nofo ʻi he māmaní? Ko e hā ʻa e lau ʻa e Tohi Tapú?

 ʻIo. Ko e vela fakaʻulia ko ia ʻa e ʻeá ʻi māmani lahí ʻoku fehoanaki ia mo e meʻa naʻe tomuʻa tala ʻe he Tohi Tapú fekauʻaki mo hotau taimí. Ko e fakatātaá, naʻe kikiteʻi ʻe Sīsū te tau sio ki he “ngaahi meʻa fakamanavahē,” pe “ngaahi meʻa anga-kehe mo fakailifia.” (Luke 21:11; Good News Translation) Ko e tupulaki ʻa e māfana fakamāmanilahi ʻa e ʻeá kuó ne ʻai ʻa e tokolahi ke nau manavahē naʻa maumauʻi ʻe he faʻahinga ʻo e tangatá ʻa e māmaní.

 ʻIkai. Naʻe fakatupu ʻe he ʻOtuá ʻa e māmaní ke hoko ko e ʻapi tuʻuloa ʻo e faʻahinga ʻo e tangatá. (Saame 115:16; Tangata Malanga 1:4) ʻI he ʻikai ke fakaʻatā ʻa e faʻahinga ʻo e tangatá ke nau fakaʻauha ʻa e māmaní, te ne “fakaʻauha ʻa e faʻahinga ʻoku nau fakaʻauha ʻa e māmaní,” ʻo hangē ko ia kuó ne talaʻofá.​—Fakahā 11:18.

 Fakakaukau ki ha kikite ʻe ua ʻoku fakahaaʻi ai ʻa e toe meʻa kuo talaʻofa mai ʻe he ʻOtuá:

•   “ʻE fiefia ʻa e toafá mo e fonua pakukaá, pea ʻe mavava ʻa e toafa tokaleleí pea matala ʻo hangē ko e lilé.” (ʻAisea 35:1) Heʻikai fakaʻatā ʻe he ʻOtuá ke hoko ʻa e māmaní ko ha toafa taʻenofoʻi, ka te ne toe fakaleleiʻi ʻa e ngaahi feituʻu kuo maumauʻí.

•   “ʻOkú ke tokangaʻi ʻa e māmaní, ʻo ʻai ia ke fua lahi pea mahu ʻaupito.” (Saame 65:9) ʻI he tāpuaki ʻa e ʻOtuá, ʻe hoko ʻa e māmaní ko ha palataisi.

 Ke ako lahi ange fekauʻaki mo e anga hono fakahoko ʻe he feliuliuaki ʻa e ʻeá ʻa e kikite Fakatohitapú, lau ʻa e kupu “Feliuliuaki ʻa e ʻEá mo Hotau Kahaʻú​—Lau ʻa e Tohi Tapú.”

 Ke ako lahi ange fekauʻaki mo e talaʻofa ʻa e Tohi Tapú ke fakaleleiʻi ʻa e ʻātakaí, sio ki he kupu “Ko Hai Te Ne Fakahaofi ʻa e Māmaní?”