HANGANAKI LEʻO!
Mate ʻa e Toko Ono Miliona ʻi he COVID—Ko e Hā ʻa e Lau ʻa e Tohi Tapú?
Fakatatau ki he Kautaha Moʻui ʻa Māmaní (WHO), ʻi he aʻu ki Mē 23, 2022, ko e kakai ʻe toko 6.27 miliona kuo nau mate ko e tupu mei he COVID-19. Neongo ia, ʻi ha ongoongo naʻe tuku ange ʻi Mē 5, 2022, naʻe fakafuofua ʻa e WHO ko e kau maté naʻe toe tokolahi ange ia ai. ʻOku fakahaaʻi ai lolotonga ʻa e 2020 mo e 2021, “ko e tokolahi fakakātoa ʻo e kau mate tupu mei he mahaki fakaʻauha COVID-19 pe felāveʻi mo iá . . . naʻe fakafuofua ki he toko 14.9 miliona.” ʻOku ʻi ai ha lave ʻa e Tohi Tapú ki he ngaahi fakatamaki fakalotomamahi ko iá?
Naʻe tomuʻa tala ʻe he Tohi Tapú ʻe ʻi ai ʻa e ngaahi mahaki fakaʻauha
Naʻe tomuʻa tala ʻe Sīsū ʻe ʻi ai ʻa e ngaahi mahaki fakaʻauha pe “ngaahi mahaki fakalilifu,” lolotonga ʻa e vahaʻa taimi ʻoku ui ko e “ngaahi ʻaho fakaʻosí.”—Luke 21:11, Contemporary English Version; 2 Tīmote 3:1.
Ko e kikite ʻa Sīsuú ʻoku fakahoko ʻi he ʻahó ni. Ke ako lahi ange ki ai, lau ʻa e kupu “Ko e Hā ʻa e Fakaʻilonga ʻo e ‘Ngaahi ʻAho Fakaʻosí’ pe ‘Taimi Fakamui’?”
ʻOku tokonaki mai ʻe he Tohi Tapú ʻa e fakafiemālie
“[Ko e] ʻOtua ʻo e fakafiemālie kotoa pē . . . ʻokú ne fakafiemālieʻi kitautolu ʻi he kotoa ʻo hotau ngaahi ʻahiʻahí.”—2 Kolinitō 1:3, 4.
Ko e tokolahi kuo mole hanau ʻofaʻanga ʻi he maté kuo nau maʻu ʻa e fakafiemālie mei he pōpoaki ʻa e Tohi Tapú. Ako lahi ange ki ai ʻi he kupu ko e “Fekuki mo e Mamahí—Meʻa ʻe Lava Ke Ke Fai he ʻAho Ní” mo e “Ko e Tokoni Lelei Taha ki he Faʻahinga ʻOku Mamahí.”
ʻOku fakahaaʻi mai ʻe he Tohi Tapú ʻa e fakaleleiʻanga tuʻuloá
“Ke hoko mai ho Puleʻangá. Ke fai ho finangaló, ʻo hangē ko ia ʻi hēvaní, ke pehē foki ʻi māmani.”—Mātiu 6:10.
ʻOku vavé ni ke fakapapauʻi ʻe he “Puleʻanga ʻo e ʻOtuá” ko e faʻahinga ʻe moʻui ʻi he māmaní “ʻe ʻikai ha taha ʻoku nofo ai te ne pehē: ‘ʻOku ou puke.’” (Maʻake 1:14, 15; ʻAisea 33:24) Sio ʻi he vitiō Ko e Hā ʻa e Puleʻanga ʻo e ʻOtuá? ke ako fekauʻaki mo e founga-pule fakahēvani ko ení pea mo e meʻa te ne fakahokó.
ʻOku mau fakaafeʻi atu koe ke ako lahi ange fekauʻaki mo e lau ʻa e Tohi Tapú koeʻuhi ke ke lava mo ho fāmilí ʻo maʻu ʻaonga mei he faleʻi fakapotopoto mo e ngaahi talaʻofa fakaofo ʻoku maʻu mei aí.