“Ko e palopalema fakaʻatamai ʻoku moʻua ai ʻa e toʻutupú ʻoku ʻi he tuʻunga fakatuʻutāmaki​—pea kuo mau fakatokangaʻi ko e tupuʻanga tefitó ʻa e mītia fakasōsialé.”​—Toketā Vivek Murthy, ʻŌfisa Pule Fakafaitoʻo ʻa ʻAmeliká, New York Times, Sune 17, 2024.

 ʻE lava fēfē ke maluʻi ʻe he ngaahi mātuʻá ʻenau fānaú mei he ngaahi fakatuʻutāmaki ʻo e mītia fakasōsialé? ʻOku ʻomai ʻe he Tohi Tapú ʻa e faleʻi ʻaonga.

 Fakakaukau ki he tefitoʻi moʻoni Fakatohitapu ʻe ua ko ení.

 “Ko e tokotaha fakapotopotó ʻokú ne fakakaukauʻi ʻene laka taki taha.”​—Palōveepi 14:15.

 ʻI he fakakaukau ki he ngaahi fakatuʻutāmakí, ʻoua te ke ongoʻi halaia ke taʻofi hoʻo kiʻi tamá mei hono ngāueʻaki ʻa e mītia fakasōsialé. Ki muʻa ke ke fakaʻatā hoʻo kiʻi tamá ke ne ngāueʻaki ʻa e mītia fakasōsialé, fakapapauʻi ʻokú ne matuʻotuʻa feʻunga ke muimui ki he fakangatangata ʻo e taimi ʻoku vaheʻi ke ne ngāueʻaki ai ʻa e mītia fakasōsialé, maʻu ʻa e ngaahi kaungāmeʻa lelei pea fakaʻehiʻehi mei he ngaahi ʻata taʻetāú.

•   Ke ako lahi angé, lau ʻa e ongo kupu “ʻOku Totonu ke Ngāueʻaki ʻe Heʻeku Kiʻi Tamá ʻa e Mītia Fakasōsialé?” mo e “Akoʻi Hoʻo Taʻu Hongofulu Tupú ki he Founga ke Ngāueʻaki Fakapotopoto Ai ʻa e Mītia Fakasōsialé.”

 “Ngāue lelei taha ʻaki ho taimí.”​—ʻEfesō 5:16.

 Kapau te ke fakaʻatá hoʻo kiʻi tamá ke ne ngāueʻaki ʻa e mītia fakasōsialé, fokotuʻu ha lao ki hono ngāueʻaki iá pea fakamatalaʻi ʻa e ʻaonga ʻo e ngaahi lao ko ení ki hono maluʻi iá. Hoko ʻo fakatokanga meʻa ki he ngaahi liliu ʻi he tōʻonga hoʻo kiʻi tamá ʻa ia ʻoku hā mei ai ʻa e fiemaʻu ke fakangatangata ʻene ngāueʻaki ʻa e mītia fakasōsialé.

•   Ngāueʻaki ʻa e vitiō tā fakatātā Ngāueʻaki Fakapotopoto ʻa e ʻInitanetí ke tokoniʻi hoʻo kiʻi tamá ke ne mahinoʻi ʻa e ʻuhinga ʻoku fakangatangata ai ʻene ngāueʻaki ʻa e mītia fakasōsialé.

 ʻOku pehē ʻe he Tohi Tapú ʻoku tau moʻui ʻi he “ngaahi taimi fakalilifu ʻa ia ʻe faingataʻa ke fekuki mo ia.” (2 Tīmote 3:1-5) ʻI he taimi tatau, ʻokú ne tokonaki mai ʻa e faleʻi ʻaonga ʻe lava ke ne tokoniʻi kitautolu ke fekuki mo ia. Laka hake ʻi he ngaahi maʻuʻanga fakamatala Fakatohitapu ʻe 20 ki he ngaahi mātuʻá mo ʻenau fānaú ʻe lava ke maʻu ia ʻi he kupu ko ení ʻa ia ko e hōloa fakaʻatamai ʻa e toʻutupú.