Ki he kakai tokolahi takatakai ʻi he māmaní, ko e feinga ke feau ʻa e fiemaʻú ko ha fāinga hokohoko ia​—pea ʻoku hoko ʻo toe faingataʻa ange.

•   Fakatatau ki ha līpooti fakamāmanilahi ki muí ni mai, a kuo “mātuʻaki hōloa ʻa e vāhenga fakamāhina ʻa e kau ngāué.” ʻOku fakatokanga mai ai kapau heʻikai fai ha meʻa fekauʻaki mo ia, ʻe “fakautuutu ʻa e ʻikai ha vahevahe tataú” pea ʻe hōloa mo e “tuʻunga moʻui ʻa e kau ngāue tokolahi mo honau ngaahi fāmilí.”

 ʻE malava ʻa e ngaahi founga-pulé ʻo tālangaʻi ʻa e fakautuutu ko eni ʻo e palopalema fakaʻekonōmiká pe naʻa mo hono fakaleleiʻi iá?

 ʻOku fakamatalaʻi ʻi he Tohi Tapú ʻoku ʻi ai ha founga-pule ʻe lava pea te ne fakaleleiʻi ʻa e ngaahi palopalema fakaʻekonōmika kotoa pē, ʻo kau ai ʻa e ʻikai ha vahevahe tataú. ʻOku pehē ai “ʻe fokotuʻu ʻe he ʻOtua ʻo langí ha puleʻanga,” ko ha founga-pule pē taha ke ne tokangaʻi ʻa e ngaahi meʻa kotoa ʻo e māmaní. (Taniela 2:44) ʻI he malumalu ʻo e founga-pule ko iá, ʻe ʻikai ha taha ʻe ngalo pe liʻaki. (Saame 9:18) Ko e Puleʻanga ʻo e ʻOtuá te ne fakapapauʻi ʻe maʻu ʻe hono kau tangataʻifonuá ʻa e meʻa ʻoku nau fiemaʻu ke nau fiefia aí. Ko e tokotaha kotoa ʻe malava ke nau fiefia ʻi he ola lelei ʻo ʻenau ngāue mālohí.​—ʻAisea 65:21, 22.