ʻI Sanuali 24, 2023, naʻe ʻunuakiʻi ʻe he kau faisaienisí ʻa e Uasi ʻo e ʻAho Fakaʻauhá a ʻo toe ofi ange ki he tuʻuapoó, ʻa ia ʻokú ne fakatātaaʻi ʻa e ngataʻanga ʻo e māmaní.

•   “Ko e ‘Uasi ʻo e ʻAho Fakaʻauhá’ ʻa ia ʻokú ne fakafofongaʻi ʻa e tuʻunga fakatuʻutāmaki ʻoku ʻi ai ʻa e faʻahinga ʻo e tangatá naʻe ʻunuakiʻi ʻi he ʻaho Tūsité ʻo toe ofi ange ki he tuʻuapoó lolotonga ʻa e tau ʻi ʻIukalainé, ngaahi fepaki fakaniukiliá mo e feliuliuaki ʻa e ʻeá.”​—AFP International Text Wire.

•   “Naʻe fakahaaʻi ʻe he kau faisaienisí ʻi he ʻaho Tūsité ko e ‘Uasi ʻo e ʻAho Fakaʻauhá’ kuo ʻunuakiʻi ia ki muʻa ki he toe pē ʻa e sekoni ʻe 90 ki he tuʻuapoó​—ko e taimi ofi taha ia ʻa e faʻahinga ʻo e tangatá ki ʻāmaketone.”​—Ongoongo ABC.

•   “Kuo fakatokanga mai ha pēnolo ʻo ha kau faisaienisi fakavahaʻapuleʻanga ko e hokohoko atu ʻa e moʻui ʻa e faʻahinga ʻo e tangatá ʻoku ʻi ha tuʻunga fakatuʻutāmaki ange ia ʻi ha toe taimi ki muʻa.”​—The Guardian.

 ʻOku fakaofi mai ʻa e ngataʻanga ki he faʻahinga ʻo e tangatá mo hotau foʻi palanité? ʻOku fiemaʻu ke tau manavahē ki he meʻa ʻoku tuku tauhi mai ʻi he kahaʻú? Ko e hā ʻa e lau ʻa e Tohi Tapú?

 Fakatatau ki he Tohi Tapú, ʻe “kei tuʻu ai pē ʻa e foʻi māmaní ʻo taʻengata” pea ʻe ʻi ai ʻa e kakai te nau “nofo ai ʻo taʻengata.” (Tangata Malanga 1:4; Saame 37:29) Ko ia ko e faʻahinga ʻo e tangatá heʻikai ke nau fakaʻauha ʻa e māmaní pe ʻai hotau foʻi palanité ke ʻikai toe lava ʻo nofoʻi.

 Kae kehe, ʻi he Tohi Tapú ʻoku lave ai ki ha ngataʻanga. Ko e fakatātaá, ʻoku pehē ai “ʻoku fakaʻaʻau ke mole atu ʻa e māmaní.”​—1 Sione 2:17.

•   Ke ʻiloʻi ʻa e meʻa ʻoku ʻuhinga ki ai ʻa e Tohi Tapú ʻi he lave fekauʻaki mo e ngataʻanga ʻo e māmaní, lau ʻa e kupu “ʻOku Vavé Ni ke Ngata ʻa e Māmaní? Ko e hā ʻa e ʻApokalifa?”

•   Ke ako fekauʻaki mo e meʻa ʻoku leaʻaki ʻi he Tohi Tapú ki he taimi ko ia ʻe hoko ai ʻa e ngaahi meʻa ʻi he māmaní, lau ʻa e kupu “ʻE Ngata ʻAfē ʻa e Māmaní?”

 ʻE lava ke tokoniʻi kitautolu ʻe he Tohi Tapú ke tau hanganaki fakakaukau pau neongo ʻa e ngaahi palopalema ʻoku lolotonga hoko ʻi he māmaní. Anga-fēfē?

•   ʻOku ʻomai ʻe he Tohi Tapú kiate kitautolu ʻa e faleʻi ʻaonga. (2 Tīmote 3:16, 17) Ko e fakatātaá, lau ʻa e kupu “Founga ke Mapuleʻi Ai ʻa e Hohaʻá” ke sio ki he founga ʻe lava ke tokoniʻi ai koe ʻe he Tohi Tapú ke hanganaki fakakaukau pau neongo ʻa e ngaahi pole ʻi he moʻuí.

•   ʻOku tokonaki mai ʻe he Tohi Tapú ʻa e ʻamanaki alafalalaʻanga ki he kahaʻú. (Loma 15:4) ʻOku fakamatalaʻi ai ʻa e meʻa ʻoku lava ke tau ʻamanekina he taimí ni pea mo e kahaʻú, ʻa ia ʻoku tokoni ke tau hanganaki falala pau ʻi he hoko ʻa e ngaahi meʻa ʻi he māmaní.

 Ke ke maʻu ʻaonga lahi taha mei he Tohi Tapú, ʻoku mau fakaafeʻi loto-māfana koe ke ke ʻahiʻahiʻi ʻemau polokalama ako Tohi Tapu taʻetotongi mo ha faiakó ʻi he ʻahó ni.