ʻI Mē 23, 2023, naʻe fakatokanga ai ki he kakaí ha ʻōfisa māʻolunga ki he moʻui leleí ʻi ʻAmelika fekauʻaki mo hono uesia ʻe he mītia fakasōsialé ʻa e toʻutupu tokolahi.

•   “Neongo ko e mītia fakasōsialé ʻe ʻaonga nai ki he fānau ʻe niʻihi, kuo fakamoʻoniʻi ʻe lava ke ne uesia foki ʻa e tuʻunga fakaʻatamai mo e moʻui lelei fakalūkufua ʻa e fānaú.”​—Social Media and Youth Mental Health: The U.S. Surgeon General’s Advisory, 2023.

 Naʻe lave ʻa e līpooti ko ení ki ha ngaahi ako naʻe fai ʻoku fakamatalaʻi ai ha ngaahi ʻuhinga ki he hohaʻa ko ení.

•   Ko e fānau ʻi he taʻu 12 ki he taʻu 15 “ʻa ia ʻoku nau fakamoleki ʻa e ngaahi houa laka hake ʻi he houa ʻe tolu ʻi he ʻaho ki he mītia fakasōsialé ʻoku liunga ua ʻenau tuʻu laveangofua ke maʻu ha ngaahi palopalema fakaʻatamai ʻo kau ai ʻa e ngaahi fakaʻilonga ʻo e loto-mafasiá mo e loto-moʻuá.”

•   ʻI he toʻu ko ia ʻo e kau taʻu 14, “ko hono ngāueʻaki lahi ange ʻa e mītia fakasōsialé ʻokú ne fakatupunga ʻa e taʻemamohe, houtamaki ʻi he ʻinitanetí, fōtunga hā mai ʻikai lelei, ongoʻi ʻikai loko ʻi ai hao mahuʻinga mo e loto-mafasia lahi ange. Ko e kotoa ení ʻoku lahi ange nai ʻene ʻasi ʻi he tamaiki fefiné ʻi hono fakahoa atu ki he tamaiki tangatá.”

 ʻE lava fēfē ke maluʻi ʻe he ngaahi mātuʻá ʻenau fānaú mei he ngaahi fakatuʻutāmaki ko ení? ʻOku tokonaki mai ʻe he Tohi Tapú ʻa e faleʻi ʻaonga.

 Kau ki ai. ʻI he tuʻunga ko ha mātuʻa, fakakaukau ki he ngaahi fakatuʻutāmakí pea fili leva pe ʻoku totonu ke ngāueʻaki ʻe hoʻo kiʻi tamá ʻa e mītia fakasōsialé pe ʻikai.

•   Tefitoʻi moʻoni Fakatohitapu: “Akoʻi ha kiʻi tama ʻi he hala ʻoku totonu ke ne ʻalu aí.”​—Palōveepi 22:6, fakamatala ʻi lalo.

•   Ke ako lahi ange, lau ʻa e kupu “ʻOku Totonu ke Ngāueʻaki ʻe Heʻeku Kiʻi Tamá ʻa e Mītia Fakasōsialé?”

 Kapau te ke fakaʻatā hoʻo kiʻi tamá ke ne ngāueʻaki ʻa e mītia fakasōsialé, tokanga ki he ngaahi fakatuʻutāmaki ʻe ala hokó pea lāuʻilo ki he ngaahi meʻa ʻoku fai ʻe hoʻo kiʻi tamá ʻi he ʻinitanetí. ʻO anga-fēfē?

 Maluʻi hoʻo kiʻi tamá mei he ngaahi fakamatala fakatupu maumaú. Akoʻi hoʻo kiʻi tamá ke ne ʻiloʻi ia pea fakaʻehiʻehi mei ai.

•   Tefitoʻi moʻoni Fakatohitapu: “Ko e fehokotaki fakasino taʻetāú mo e faʻahinga kotoa pē ʻo e taʻemaʻá pe mānumanú, tuku ke ʻoua naʻa fai ha talanoa ki ai ʻi homou lotolotongá, . . . pehē foki ki he tōʻonga fakamā pe talanoa launoa pe fakakata fakalielia.”​—ʻEfesō 5:3, 4.

•   Ke maʻu ha ngaahi fokotuʻu ʻaonga, lau ʻa e kupu “Akoʻi Hoʻo Taʻu Hongofulu Tupú ki he Founga ke Ngāueʻaki Fakapotopoto Ai ʻa e Mītia Fakasōsialé.”

 Fokotuʻu ha ngaahi fakangatangata. Ko e fakatātaá, fokotuʻu ha ngaahi lao ki he taimi mo e lōloa hono ngāueʻaki ʻe hoʻo kiʻi tamá ʻa e mītia fakasōsialé.

•   Tefitoʻi moʻoni Fakatohitapu: “Mou mātuʻaki tokanga maʻu pē ki he anga hoʻomou laká ke . . . hoko ko e faʻahinga ʻoku fakapotopoto, ʻo ngāue lelei taha ʻaki ho taimí.”​—ʻEfesō 5:15, 16.

•   Ngāueʻaki ʻa e talanoa tā fakatātā Ngāueʻaki Fakapotopoto ʻa e ʻInitanetí ke tokoniʻi hoʻo kiʻi tamá ke ne mahinoʻi ʻa e ʻuhinga ʻoku fiemaʻu ai ʻa e ngaahi fakangatangatá.