Ki he kakai tokolahi, ko e vahevahe tatau fakamatakalí ʻoku kei hoko pē ko ha misi ʻoku teʻeki fakahoko.

•   “Ko e lau-lanú ʻoku hokohoko atu ʻene fakatupunga ʻa e maumau lahi ʻi he ngaahi kautaha, ngaahi faʻunga fakasōsiale, pea ʻi he moʻui fakaʻaho ʻi he sōsaieti kotoa pē. ʻOku hokohoko atu ʻene pouaki ʻa e ʻikai ha vahevahe tataú.”​—António Guterres, Sekelitali Seniale ʻa e UN.

 ʻE faifai ange pea hoko moʻoni ha vahevahe tatau fakamatakali? Ko e hā ʻa e lau ʻa e Tohi Tapú?

 ʻOku akoʻi mai ʻe he Tohi Tapú ʻa e anga ʻo e vakai ʻa e ʻOtuá ki he kakai mei he ngaahi matakali kehekehe.

•   “[Ko e ʻOtuá] naʻá ne ngaohi mei he tangata pē taha ʻa e puleʻanga kotoa pē ʻo e tangatá ke nau nofo ʻi he funga kotoa ʻo e māmaní.”​—Ngāue 17:26.

•   “ʻOku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.”​—Ngāue 10:34, 35.

 ʻOku fakahaaʻi mai ʻi he Tohi Tapú ko e kotoa ʻo e faʻahinga ʻo e tangatá ko e fāmili pē ʻe taha pea ʻoku tali ʻe he ʻOtuá ʻa e kakai mei he matakali kotoa pē.

 Ko e vahevahe tataú ʻe fakahoko moʻoni ia ʻe he Puleʻanga ʻo e ʻOtuá, ko ha founga-pule fakahēvani. ʻE akoʻi ʻe he founga-pule ko iá ʻa e kakaí ki he founga ke nau fakafeangai ai ki he niʻihi kehé ʻi he founga totonú. Ko e kakaí te nau ako ʻa e founga ke ikuʻi ai ha faʻahinga ongoʻi lau-lanu pē ʻoku nau maʻu nai.

•   “[ʻE] ako ai ʻa e kau nofo ʻi he fonuá ʻo fekauʻaki mo e māʻoniʻoní.”​—ʻAisea 26:9.

•   “Ko e ola ʻo e māʻoniʻoni moʻoní ko e melino, pea ko e fua ʻo e māʻoniʻoni moʻoní ko e nonga mo e malu tuʻuloa.”​—ʻAisea 32:17.

 ʻI he ʻahó ni, ko e laui miliona ʻo e kakaí ʻoku nau ako mei he Tohi Tapú ʻa e founga ke fakafeangai ai ki he niʻihi kehé ʻi he fakaʻapaʻapa mo e ngeia.

•   Ke ako lahi ange, lau ʻa e ʻīsiu ʻo e makasini Awake! ʻoku fakakaveinga “ʻOku ʻi Ai ha Faitoʻo ki he Tomuʻa Fehiʻá?”

•   Lau ʻa e kupu “Talanoa ki he Fānaú Fekauʻaki mo e Lau-Lanú” ke ako ki he founga ʻe lava ke lāulea ai ʻa e ngaahi mātuʻá ki he kaveinga ko ení ʻi ʻapi.