‘UHINGA ‘OKU MAHU‘INGA AÍ: Ke ma‘u ‘a e hōifua ‘a Sihová, kuo pau ki he kau ako Tohi Tapú ke fakatapui ‘enau mo‘uí kiate ia mo papitaiso. (1 Pita 3:21) Ko e malu fakalaumālié ‘e toki ma‘u ia ‘e he fa‘ahinga ‘oku mo‘ui ‘o fehoanaki mo ‘enau fakatapuí. (Saame 91:1, 2) ‘Oku fakatapui ‘a e Kalisitiané kia Sihova—kae ‘ikai ki ha tangata, ki ha ngāue pe ko ha kautaha. Ko ia ai, ‘oku fiema‘u ke fakatupulekina ‘e he kau akó ‘a e ‘ofa mo e hounga‘ia ki he ‘Otuá.—Loma 14:7, 8.

FOUNGA HONO FAI IÁ:

• Lolotonga ‘a e akó, lāulea ki he me‘a ‘oku fakahaa‘i ‘e he fakamatalá ‘o fekau‘aki mo Sihová. Faka‘ai‘ai ke lau faka‘aho ‘a e Tohi Tapú pea lotu “ma‘u pē” kia Sihova.—1 Tes. 5:17; Sēm. 4:8

• Fakalototo‘a‘i ho tokotaha akó ke ‘ai ‘a e fakatapui mo papitaisó ko ha taumu‘a fakalaumālie. ‘Ikai ko ia pē, tokoni‘i ia ke a‘usia ha taumu‘a ‘oku faingofua hangē ko hono fai ha tali ‘i he fakatahá pe faifakamo‘oni ki he kaungā‘api pe kaungāngāue. Manatu‘i ‘oku ‘ikai fakamālohi‘i ‘e Sihova ha taha ke tauhi ange kiate ia. Ko e fakatapuí ko ha fili fakafo‘ituitui ia.—Teu. 30:19, 20

• Faka‘ai‘ai ho tokotaha akó ke fai ‘a e ngaahi liliu ‘oku fiema‘ú kae lava ke fakafiefia‘i ‘a Sihova pea hoko ‘o taau ke papitaiso. (Pal. 27:11) Koe‘uhi ko ha tō‘onga pau pe natula ‘oku hoko ia ko hano konga, ko ha tokotaha ako Tohi Tapu ‘e fiema‘u nai ha tokoni hokohoko ke to‘o atu hono anga‘itangata motu‘á kae ‘ai ha anga‘itangata fo‘ou. (‘Ef. 4:22-24) Vahevahe mo ia ha kupu mei he kupu hokohoko he Taua Le‘ó ko e “Liliu ‘e he Tohi Tapú ‘a e Mo‘uí”

• Lave ki he fiefia kuó ke ma‘u ‘i he tauhi kia Sihová.—‘Ai. 48:17, 18