‘I he kamata‘anga ‘o Sepitemá, ‘e fakakau ‘i he Polokalama Ngāue ki he Fakatahá Mo‘ui mo e Ngāue Fakafaifekaú ha sīpinga tu‘uaki fo‘ou ‘e fakakaveinga ‘aki ‘a e “Ako‘i ‘a e Mo‘oní.” Ko ‘emau taumu‘á ke fakamamafa‘i ‘a e tefito‘i mo‘oni ‘o e Tohi Tapú, ‘o ngāue‘aki ha fehu‘i mo ha konga Tohi Tapu.

Kapau ‘oku tau ‘ilo‘i ha mahu‘inga‘ia, ‘oku lava ke tau fakatupulekina ha fakatu‘amelie ki he‘etau ‘a‘ahi hokó ‘aki hono tuku ha tohi pe ko hono hulu‘i ha vitiō mei he jw.org. ‘Oku totonu ke tau feinga ke foki hili ha ngaahi ‘aho si‘i ke hoko atu ‘i he ‘uluaki fetalanoa‘akí. Ko e tu‘uaki fo‘ou ko ení mo e konga ‘oku vahe‘i ki he tokotaha akó ‘e makatu‘unga ia ‘i he ngaahi vahe kuo fakanounou‘i ‘i he tohi What Can the Bible Teach Us? (‘a ia ‘oku te‘eki ala ma‘u ‘i he lea faka-Tongá), ko e tatau faingofua eni ‘o e tohi Ako‘i ‘e he Tohi Tapú. Ko e tohi Ako‘i ‘e he Tohi Tapú ‘oku lava ke tau ma‘u ai ha ngaahi fakamatala mo ha ngaahi konga Tohi Tapu ke tokoni‘i kitautolu ke fai ha ngaahi toe ‘a‘ahi pe fakahoko ha ako Tohi Tapu ‘o ngāue‘aki pē ‘a e Tohi Tapú.

Ko e hala pē ‘e taha ‘oku taki atu ki he mo‘uí. (Māt. 7:13, 14) ‘I he‘etau talanoa ki he kakai ‘oku nau ‘i he ngaahi lotu kehekehe mo e puipuitu‘a kehekehe, kuo pau ke tau lave ki he ngaahi mo‘oni ‘o e Tohi Tapú ‘e fakamānako kia kinautolú. (1 Tīm. 2:4) ‘I he‘etau talanoa lahi ange ‘i he ngaahi kaveinga kehekehe mei he Tohi Tapú pea pōto‘i ange ‘i he‘etau “tofa totonu ‘a e folofola ‘o e mo‘oní,” ‘e tupulaki ange ai ‘etau fiefiá pea tau lavame‘a ‘i hono ako‘i ‘a e mo‘oní ki he ni‘ihi kehé.—2 Tīm.2:15.